Հետաքրքիր հարցազրույցների շքերթը հարստացավ ևս մեկով՝ այս անգամ Մելինե Տոնոյանը հանդիպել և զրուցել է բոլորիս կողմից շատ սիրված և իր ջազային միքսերով գերած Արտյոմ Մանուկյանի հետ: Հարցազրույցը տեղի է ունեցել Kami Club-ում Գոռ Սուջյանի հետ համատեղ համերգից առաջ:
Մելինե,- Բարի երեկո, ես Մելինեն եմ reservin.am կայքից: Մենք արդեն մեկ տարի է զբաղվում ենք սննդի սպասարկման և ժամանցի վայրերում սեղանների ամրագրման ծառայությունների մատուցմամբ, այսինքն ցանկացած մարդ կարող է մեր կայքում գրանցված մոտ 400 հաստատություններից ընտրել իր համար ավելի ցանկալին և ամրագրել սեղան կամ առցանց, կամ էլ զանգահարելով մեր շուրջօրյա 060 273 000 հեռախոսահամարին: Մենք նաև ունենք ժամանցային բլոգ, որտեղ ներկայացնում ենք քաղաքում տեղի ունեցող հետաքրքիր միջոցառումները՝ հարցազրույցների կամ ֆոտոլուսաբանման տեսքով։ Եվ այսպես առաջին հարցը՝ ինչպե՞ս եք ծանոթացել Գոռ Սուջյանի հետ:
Արտյոմ,- Գոռի հետ առաջին անգամ հանդիպել եմ այն ժամանակ, երբ նա ելույթ էր ունենում Dorians խմբի հետ, ավելի ճիշտ, երբ խումբը դեռ նոր էր սկսում իրենց գործունեությունը: Դա մոտ 10-11 տարի առաջ էր, նրանք ելույթ էին ունենում Stop ակումբում: Ես այդ ժամանակ «Կատուներ» խմբում էի նվագում, Armenian Navy Band-ում, ես նայում էի Գոռին ու մտածում, որ այս տղան շատ լավ երաժիշտ է, ինքն էլ ինձ էր նայում ու նույն բանն էր մտածում :) , բայց շատ երկար ժամանակ որևէ լուրջ համագործակցություն չենք ունեցել և ամեն ինչ միայն դրանով էլ ավարտվում էր: Մի օր Dorians-ի մենեջերը մոտեցավ և ասաց, եթե մեր խումբը երբևէ դուետ ունենա, ապա այդ դուետը անպայման քո հետ պետք է լինի՝ և այդպես ծնվեց «Ես կուլամ» երգը: Դա եղավ մեր առաջին համագործակցությունը, իսկ որպես ավելի լուրջ և լայն համագործակցության օրինակ, կարող եմ նշել այս համերգային ծրագիրը, որտեղ ինքը իմ գործերից է երգելու, իսկ ես նվագելու եմ մի քանի բան նրա գործերից:
Մելինե,- Ի՞նչն է Ձեզ ոգեշնչում երաժշտություն գրելիս, ո՞րն է ձեր մուսան:
Արտյոմ,- Մոտ մեկ տարի առաջ թողարկվել է իմ առաջին ձայնասկավառակը՝ Citizen-ը, որի կայացման հարցում շատ մեծ ներդրում ունի իմ աղջկա ծնունդը, այդ սկավառակը պատրաստվել է իմ փոքրիկի “հովանավորության» ներքո, քանի դեռ ես զբաղված էի նրա կյանքում տեղի ունեցող փոքր քայլերին հետևելով, երաժշտությունը զուգահեռ գալիս էր իմ մտքի մեջ:
Մելինե,- Դուք ջազ ոճին հասել եք hip-hop-ից, ի՞նչը պատճառ հանդիսացավ այդպիսի կտրուկ փոփոխության համար
Արտյոմ,- Այոոո, շատ ճիշտ եք նշում, շատ դիպուկ էր: Կարծում եմ դրա պատճառը հայրս է՝ Արմեն Մանուկյանը, նա քաղաքի ամենահայտնի երաժշտագետներից է և մեր տանը միշտ ջազ երաժշտություն է հնչել, իսկ ես փոքր տարիքում ջազ շատ չէի սիրում, ավելի շատ hip-hop էի սիրում և լսում, և մինչև հիմա էլ շատ եմ լսում: Մի անգամ լսեցի Miles Davis-ի «Doo bop» ալբոմը, որը համարվում է ջազի և hip-hop առաջին համադրումը, դա մոտավորապես 90 թվականի ձայնասկավառակ է: Երբ ես լսեցի այդ ձայնասկավառակի երգերը, ես հաճելիորեն զարմացա, որ hip-hop ու ջազը կարող են միասին այդպիսի հետաքրքիր «դուետ» կազմել: Ես մտածեցի, որ փաստացի դա իմ և հորս սիրած ոճերի միքսն է և այդ միտքը ինձ շատ դուր եկավ: Ես սկսեցի լսել, սիրել և կատարել այդ ձայնասկաառակի բոլոր երգերը և ուսումնասիրել դրանց ստեղծման պատմությունը: Այդ երգերը ինձ տարան դեպի այլ ջազային կատարումներ, և ես կամաց կամաց մտա այդ ոճի մեջ, սկսեցի պարապել, նվագել այդ ոճի մեջ: Իսկ հայրս ինձ միշտ խորհուրդ է տվել ջազ երգերի ու երաժիշտների մասով, հաճախ էր գալիս և ասում՝ այ սա էլ լսի, այ սրա երգերն էլ իմացի :)
Մելինե,- Կարող եք սահմանել, թե ի՞նչ է Ձեզ համար երաժշտությունը.
Արտյոմ,- Ինձ մոտ 30 տարի պետք եկավ, որ ես հասկանամ, որ երաժշտությունը իմ համար ամեն ինչ է: Ինձ շրջապատող ցանկացած այլ բան հնարավոր է փոխարինել, բայց երաժշտությունը ինձ համար իրոք ամեն ինչ է, մնացած բաները հարաբերական ու փոփոխական են՝ փողը, ընկերությունը, առողջությունը, հայտնի լինելը, շրջապատը և այլն: Իսկ երաժշտությունը միշտ ինձ հետ է, իմ մեջ և Աստված չանի ես դրանից ինչ որ ձև զրկվեմ կամ սահմանափակում ունենամ:
Մելինե,- Այսինքն չկա ինչ որ բան, որը կարող է Ձեզ ստիպել հրաժարվել երաժշտությունից
Արտյոմ,- Կարծում եմ, որ ոչ, չկա. Ասեմ ավելին, դեպքեր են եղել, որ իմ կյանքի ամենադժվար պահերին ինձ փրկել է հենց երաժշտությունը: Չի կարող լինել այնպիսի դեպք, որ մի օր դուք իմանաք, որ ես դարձել եմ, օրինակ՝ ատամնաբույժ: Բացառվում է այդպիսի բան, ես երաժիշտ եմ:
Մելինե,- Ի՞նչ նոր ծրագրեր ու պլաններ ունեք
Արտյոմ,- Ինչպես գիտեք ես Լոս Անջելեսում եմ ապրում, իսկ դա մի այնպիսի վայր է, որտեղ միշտ ինչ որ նոր բաներ են տեղի ունենում, կյանքը շատ արագ է առաջ են գնում: Հիմա ես աշխատում եմ և նոր ձայնասկավառակ եմ գրում Police խմբի հայտնի կիթառահար Andy Summers-ի հետ, նաև հոլիվուդյան մի քանի ֆիլմերի համար սաունդթրեքեր եմ գրում: Շատ հետաքրքիր նոր նախագիծ ունեմ Achilax-ի հետ, ով hip-hop է երգում, իսկ հիմա ուզում է իրեն փորձել էլեկտրոնային և techno երաժշտության մեջ: Մենք միասին փորձում ենք հետաքրքիր բան ստանանք, jazz+techno+chill out ոճերի միքս, արդեն մի քանի track ունենք ձայնագրած, բայց դեռ թողարկում չենք արել: Ես պլանավորում եմ ամբողջ ձմեռ փակվել ստուդիայում, վերջացնել մշակումները և արդեն գարնանը կամ ամռանը նրա հետ գալ Հայաստան և հանդես գալ jazz+dance music+chill out համերգով: Այս պահի դրությամբ դա իմ ամենամեծ նախագիծն է, որի վրա աշխատում եմ:
Մելինե,- Այս անգամ ո՞րն էր Ձեր Հայաստան գալու հիմնական նպատակը.
Արտյոմ,- Ես եկել եմ Թումոյի հրավերով՝ իրենց մոտ դաս տալու համար, մոտ 2 շաբաթ Թումոյի երեխաների հետ եմ: Շատ շնորհակալ եմ այդ հնարավորության համար, անչափ հետաքրքիր է անցնում, ունեմ 25 երեխա, ում հետ պարապում եմ, աշխատում եմ ու, իրոք, շատ դրական ու անմոռանալի լիցքեր եմ ստանում:
Մելինե,- Ի՞նչ ակնկալիքներ ունեք Գոռի հետ ունեցած ու սպասվելիք հաջորդ համերգներից
Արտյոմ,- Իրականում Գոռի հետ ելույթ ունենալը արդեն անակնկալ է, նրա հետ աշխատելը շատ հետաքրքիր է: Համերգից առաջ մի քիչ մեր սպասվածից քիչ ժամանակ ունեցանք պատրաստվելու համար, մի քիչ լարված էինք, բայց կարծում եմ սկսելուն պես դա կանցնի: Չնայած դա էլ իր հերթին կարող է առիթ հանդիսանալ, որ բեմի վրա հետաքրքիր իմպրովիզներ լինեն:
Մելինե,- Շնորհակալություն հետաքրքիր հարցազրույցի համար
Արտյոմ,- Շնորհակալություն հետաքրքիր հարցերի համար:
Մեր մյուս հետաքրքիր հոդվածները կարդալու համար սեղմեք այստեղ, իսկ հաստատություններ բաժնում սեղան ընտրելու և ամրագրելու համար՝ այստեղ:
