10 ոսկե կանոն food photographer-ների համար

10 ոսկե կանոն food photographer-ների համար

Հեղինակ՝ Նունե Այլանջյան


Forbes ամսագիրն անդրադարձել է Instagram-ի լավագույն food-լուսանկարիչներին, ովքեր ունեն հազարավոր հետևորդներ, իսկ նրանց լուսանկարներին նայելիս քիչ է մնում սմարթֆոնիդ էկրանն ուտես:

Լավագույնների գլխավոր եռյակը բացում է food stylist Ջոան Փայը: Նրա աշխատանքային գործիքը iPhone 5 –ը և Canon 5D Mark II-ն է: Նախընտրում է VSCO Cam, Snapseed, Afterlight և Picfx ֆիլտրերը:

Երկրորդ տեղում Սարկա Բաբիկան է: Սարկայի առանձնահատկությունն այն է, որ ուտեստներն ինքն անձամբ է պատրաստում: Նա լուսանկարում է iPhone 5-ով և կիրառում VSCO Cam ֆիլտրը:

Փառքի դափնին Forbes-ը տալիս է Ադրիանա Ադարմին: Նա հիմնականում շեշտադրում է գույները, լուսանկարում Canon 5D-ով և կիրառում After light ֆիլտրը:


21-րդ դարում բնավ պարտադիր չէ ունենալ պրոֆեսիոնալ տեսախցիկ և լինել լուսանկարիչ ուտելիքն անմահացնելու համար: Ցանկացած օգտատիրոջ էջում էլ կարելի է հանդիպել ուտեստների լուսանկարների, սակայն դրանցից շատերը, մեղմ ասած, ախորժակը փակող են։ Իրականում գոյություն ունեն մի շարք կանոններ, որոնց հետևելու դեպքում միայն Ձեր կերակուրը սոցցանցերում կունենա ավելի գեղեցիկ և ախորժաբեր տեսք:

1. Ձեզ զգացեք՝ ինչպես տանը

Ամեն ինչ սկսվում է ազատությունից: Թվում է՝ բոլորն էլ կարող են ռեստորանում կամ սրճարանում հանել իրենց սմարթֆոնն ու լուսանկարել կերակուրը, իրականում դա ոչ բոլորի մենաշնորհն է: Պետք է պատրաստ լինեք Ձեզ վրա կրել սեղանակիցների հայացքներն ու լսել անծանոթների փսփսոցները:

2. Անձայն գործեք

Անջատեք սմարթֆոնի ձայնը: Ոչ միշտ է հնարավոր առաջին փորձից ստանալ ֆանտաստիկ կադր։ Որպեսզի ամենանգամ լուսանկարելիս մարդիկ չպտտվեն Ձեր կողմ, պարզապես անջատեք սմարթֆոնի ձայնը և շարունակեքչարչարվել: Սակայն միևնույն ժամանակ, պետք չէ չարաշահել Ձեր սեղանակցի համբերությունը:

3. Ընտրեք թարմ հատվածը

Լուսանկարեք միայն թարմ մթերքներ: Եթե Ձեր առջև դրված աղցանը զարդարող հազարի տերևները խամրած են կամ դեղնած, ապա Ձեզ ոչ մի ֆիլտր չի փրկի: Բայց, եթե, այնուամենայնիվ ցանկանում եք լուսանկարել Ձեր դեֆեկտավոր ուտելիքն ու այն ներկայացնել դրական լույսի ներքո, շրջեք վնասված մթերքներն ու լուսանկարեք լավ վիճակում գտնվող կողմից:

4. Կադրը պիտի շնչի

Մի ծանրաբեռնեք Ձեր սեղանն այլ պարագաներով: Կերակրի շուրջ ազատ տարածություն ստեղծեք: Օգտագործված անձեռոցիկը կամ կիսատ բաժակը կարող է թափթփված տեսք հաղորդել լուսանկարին: Եթե ուտեստն այդքան էլ ախորժաբեր տեսք չունի, բայց անպայման ուզում եք դրա մասին պատմել համայն աշխարհին, ապա լուսանկարեք դրա միայն մեկ հատվածը:

5. Մի մոռացեք վառ գույների մասին

Հնարավորության դեպքում ուտեստը զարդարեք բնական մթերքներով կամ թարմ բանջարեղենով: Այդ ամենը ոչ միայն գեղեցիկ տեսք է հաղորդում ուտեստին, այլև օգնում հետագայում լուսանկարը ֆիլտրելիս: Որքան բնական, վառ գույներ կան ուտեստում, այդքան լուսանկարի հաջողությունն ավելի մեծ է:

6. Ի՞նչ էիր, ի՞նչ դարձար

Եթե ինքներդ եք պատրաստում Ձեր կերակուրը, ապա ուտեստը լուսանկարեք «նախքան» և «հետո» ձևաչափով: Ցույց տվեք դրա պատրաստման ընթացքն ու ավարտը: Սովորաբար տեսնում ենք վերջնական տարբերակը, սակայն երբեմն ընթացքում արված լուսանկարն ավելի գրավիչ ու տեսարժան է:

7. Մտեք կադր

Ուտեստը լուսանկարելիս կարող եք ինքներդ էլ կադրում երևալ, իհարկե, այդ ամենը պետք է անել շատ զգույշ և խնամքով, որովհետև բոլորս հոգնել ենք ծամող, խմող սելֆիներից: Լուսանկարվեք ուտեստի հետ այնպես, որ երևա Ձեր ձեռքը՝ գդալը բռնելիս: Այս դեպքում ևս ավելորդ զգուշավորությունը չի խանգարի, եթե, իհարկե, չեք ցանկանում,որ Ձեր անխնամ եղունգները դառնան Instagram-ում քննարկման առարկա:

8. Մաքրությունը կարևոր է

Սպասքի մաքրությունն առաջնային է: Որքան էլ Ձեր ուտեստը լինի ախորժաբեր ու կոկիկ պատրաստված, միևնույն է՝կկորցնի իր փայլը, եթե մատուցվի կեղտոտ սպասքով: Ուշադիր եղեք, որպեսզի լուսանկարելիս ափսեի եզրերը կամ բաժակը մաքուր լինեն:

9. Եղեւ լոյս

Լուսավորությունը կարևոր է: Ակումբներում կամ փաբերում զուր է փորձել որևէ ուտեստ լուսանկարել, որովհետև լուսավորությունը բարենպաստ չէ: Եթե ցանկանում եք, որ Ձեր ֆոտոյով հիանա ամբողջ Instagram-ը, ապա աշխատեք կերակուրը տեղափոխել լուսավոր տարածք կամ գոնե միացրեք սմարթֆոնի լուսարձակիչը, թեև դա այդքան էլ խորհուրդ չի տրվում: Ի դեպ, եթե տաք ապուր եք ուտում, մի սպասեք մինչև այն սառչի, լուսանկարեք հենց գոլորշու ներքո:

10. Թագադրեք

Մի մոռացեք tag-երի և hashtag-երի մասին: Ի վերջո, եկեք խոստովանենք, որ ուտեստները մենք լուսանկարում ենք ոչ միայն սեփական արխիվի, այլև մեզ հետևող օնլայն լսարանի համար։ Նպատակներից մեկն է ներգրավվել ավելի շատ հետևորդների: Օգտագործեք որքան հնարավոր է շատ hashtag-եր և tag-եր: Եվ թող Ձեր ուտեստի մասին ամբողջ Instagram-ն իմանա:

2135

(*). նշվածները պարտադիր են լրացման

 

Արեւիկ Մարտ 17, 2016
Շնորհակալություն պիտանի խորհուրդների ու նրբանկատության համար:
^ Վեր