Անհավանական տոների շքերթ

Անհավանական տոների շքերթ

Հայ առաքելական եկեղեցու ամենասիրված տոներից մեկը՝ Սուրբ Սարգիսը, այս տարի նշում են հունվարի 23-ին։ Ավանդույթի համաձայն տոնի նախօրեին դեռևս չամուսնացած աղջիկները աղի բլիթ են ուտում, որպեսզի երազում տեսնեն իրենց ապագա ամուսնուն։ Սովորույթի ուժով հայերը հավատում են այս գուշակությանը, ինչն այլ ազգերի մարդկանց մոտ միգուցե միայն ժպիտ կհարուցի։ Ընդհանրապես, մարդիկ, ովքեր հաղորդակցվում են  միայն իրենց ազգի մշակույթի հետ, հաճախ են զարմանում այլոց սովորույթներով կամ տոներով: Մինչդեռ աշխարհում գոյություն ունեցող տոների մեջ կան յուրահատուկ, երբեմն տարօրինակ, բայց անչափ գրավիչ երևույթներ:


Ծովահենները չեն վերացել. ծովահենների միջազգային օր

Տոնը ծնունդ է առել 1995-ին ԱՄՆ-ում, երկու ընկեր այնքան էին տարվել ծովահեններերի մասին տարաբնույթ պատմություններով, որ միմյանց հետ անդադար խոսում էին այդ մասին։ Հետագայում նրանց հոբբին վարակեց շատերին ու դուրս եկավ ընկերական շրջապատից։ Ավելին՝  ինտերնետի շնորհիվ այն լայնորեն տարածվեց աշխարհում: Ու հիմա ամեն տարի սեպտեմբերի 19-ին մոլորակի տարբեր անկյուններում կարելի հանդիպել ծովահենի հագուստով մարդկանց, ովքեր  խոսում են տարօրինակ՝ ծովահեններին բնորոշ բառապաշարով։


Առաջնագծում կապիկներն են. կապիկների կերուխումի տոն

Տոնը նշվում է Թայլանդի Լոպբուրի գավառում: Ամեն տարի գրեթե 600 կապիկ մասնակցում է այս իրադարձությանը։ Տեղացիները նրանց «հրավիրում» են ընթրիքի Ռամա աստծու տաճարի մոտ: Լոպբուրիի  բնակիչները կապիկներին ապահովում են քաղցրավենիքներով, մրգերով և այլ ուտելիքներով: Բնակիչների համոզմամբ,  նրանց կատարած նվիրատվությունն ամբողջ տարի հաջողություն է բերում համայնքին:


Գունավորենք զմիմյանս. գույների փառատոն Նյու-Դելիում

Հնդկական այս ազգային տոնը նվիրվում է գարնան գալստին, ինչպես նաև կյանքի վերածննդին և չարի վտարմանը: Երկու օր տևող տոնը սկսվում է լիալուսնի ժամանակ, քանի որ ըստ լեգենդի հենց այդ օրն է վախճանվել չար ոգի Հոլիկան: Տոնը նշում են Հնդկաստանի գրեթե բոլոր քաղաքներում. վառում են ահռելի խարույկներ, որոնք խորհրդանշում են ձմռան ավարտն ու չար ոգիների մահը: Հնդիկները կրակի մեջ այրում են Հոլիկայի խրտվիլակը: Իսկ առավոտյան սկսվում է խրախճանքը. մարդիկ իրար վրա են նետում  գունավոր պարկեր և միմյանց վրա գույնզգույն ջրեր շաղ տալիս:


Կարմիրների պատերազմը. Լա Տոմատինա

Ամենամյա տոնը, որը սկսել են նշել 1945-ից,  անցկացվում է իսպանական Վալենսիայից քիչ հեռու գտնվող Բունյոլ քաղաքում: Ամբողջ աշխարհից 40 000  զբոսաշրջիկ է ժամանում պատերազմական տոնին մասնակցելու նպատակով։ Ռազմի դաշտում գլխավոր «զենքը» լոլիկն է: Մեկ շաբաթ տևող փառատոնը ներառում է  իսպանական կրքոտ պարեր, գույնզգույն հրավառություն: Այս տոնի ընթացքում  1 000 տոննա լոլիկ կարմրացնում է Բունյոլի փողոցները:

7007

(*). նշվածները պարտադիր են լրացման

 

Տվյալներ չկան
^ Վեր