Հապճեպ ու սննդարար Աննա Գևորգյանի հետ

21-րդ դարում յուրաքանչյուր մարդու օրվա ռիթմն այնպես կտրուկ աճեց, որ 24 ժամվա ընթացքում հասցնել ավարտել բոլոր գործերը գրեթե հերոսության է հավասար։ Գործն էլ ավելի բարդացավ հենց այն երիտասարդ ու գործունյա մայրիկների համար, ովքեր աշխատանքին զուգահեռ կրում են ընտանիքի բարեկեցության պարտականությունը։

Հաղորդավարուհի, դերասանուհի Աննա Գևորգյանը, հաջողակ կարիերայից զատ ունի նաև երջանիկ ընտանիք։ Շոու բիզնեսի անտանելի աշխատաժամանակի մեջ Աննան հասցնում է ոչ միայն բոլորին ժպտալ էկրաններից, այլև մեծացնել երկու հրաշք բալիկների։ Ու թվացյալ խելահեղ ռիթմի մեջ փոքր ինչ անհավանական է թվում, Աննայի ամենահասությունը։

Ինքը՝ Աննան, հաղորդավարությունից զատ ստիպված յուրացրեց 21-րդ դարի մայրիկ լինելու «մասնագիտությունը», ինչը ենթադրում է, որ ծանր աշխատանքային օրվանից հետո, նա հասցնում է կերակրել իր բալիկներին ու ամուսնուն՝ առողջ, սննդարար ու կարևորը համեղ ճաշատեսակներով։

Այդ իսկ պատճառով Reservin Armenia-ի հետ համատեղ Աննան որոշեց ստեղծել նոր սյունակ։ Այս սյունակում, հաղորդավարուհին կներկայացնի արագ ու համեղ պատրաստվող ճաշատեսակների իր բաղադրատոմսերը, խորհուրդներ կտա մայրիկներին, թե ինչպես խնայել ժամանակը խոհանոցում և ինչու չէ՝ գումարը։

Հեղինակ՝ Աննա Գևորգյան

Րիզոտտո Պրիմավեռա

Աշխատանքի բերումով հաճախ եմ լինում տարբեր սրճարաններում ու ռեստորաններում, որտեղ մատուցվող ցանկացած ուտելիք, փորձում եմ բաղդատել մասերի ու տանը ինքս պատրաստել։ Այս սովորության համաձայն, երևանյան սրճարաններում մատուցվող իտալական այս ուտեստը հայտնվեց իմ ճաշացանկում և ժամանակի ընթացքում այն դարձավ և՛ ընտանիքիս, և՛ ընկերներիս սիրելի կերակուրը։

Րիզոտտո Պրիմավեռան շատ թեթև սնունդ է։ Չնայած իր բաղադրամասերի առատությանը, այն կալորիականության տեսանկյունից այնքան էլ առատ չէ։ Այդ իսկ պատճառով այն ճաշակելիս կազմվածքի մասին չարժի մտահոգվել։ Շնորհիվ բացառապես բուսական ծագման բաղադրիչների այն հարմար է ոչ միայն առօրյա մատուցման համար, այլև որպես պասային ճաշատեսակ։ Սրան էլ գումարած հայրենական բանջարեղենի սննդային բարձր արժեքը և այս ճաշատեսակը միանշանակ կդառնա ձեր սեղանի թագուհին և հյուրեր ընդունելիս կարող է անփոխարինելի խավարտ լինել ձեր հիմնական ճաշատեսակի համար:

8 բաժին րիզոտտո պրիմավերա պատրաստելու համար մեզ անհրաժեշտ են հետևյալ բաղադրամասերը՝

Բրինձ -  500 գրամ – 350 դրամ

Սունկ – 250 գրամ – 400 դրամ

Գազար –  3 հատ – 100 դրամ

Պահածոյացված կանաչ ոլոռ – 250 գրամ – 400 դրամ

Պահածոյացված եգիպտացորեն – 250 գրամ – 400 դրամ

Բուսական յուղ – 100 գրամ

Աղ, սև և կարմիր պղպեղ։

Ընդհանուր՝ 1650 դրամ։

Պատրաստման ժամանակը՝ 25 րոպե։

Նախ պատրաստենք բրնձով փլավ՝ 2 բաժակ բրինձը տապակել բուսաական յուղով այնքան ժամանակ մինչև հատիկները դառնան անթափանց, ավելացնել մեկ բաժակ ջուր, աղ, փակել խուփն ու եփել դանդաղ կրակի վրա մինչև ամբողջ ջուրը գոլորշիանա:

Բրնձի եփվելուն զուգահեռ քերել գազարը, կտրատել սունկն ու միջին կրակի վրա տապակել դրանք բուսայուղով։ 5 րոպե անց ավելացնել ոլոռը, եգիպտացորենն ու համեմունքները։ Բանջարեղենը խառնում ենք բրնձի հետ և մատուցում: