Հեղինակ՝ Աննա Գևորգյան
Հացաբուլկեղենի վնասակարությունն արդեն երկար ժամանակ է թեժ քննարկումների առիթ է հանդիսանում, յուրաքանչյուր կին վստահ է, որ խմորով կերակուրը վնասակար է իր կազմվածքին և դա ժխտել իհարկե ոչ ոք չի կարող, սակայն պետք է հաշվի առնել մի շատ կարևոր հանգամանք՝ իրականում ավելորդ սանտիմետրերն ավելանում են, ոչ այնքան ալյուրից, որքան տարատեսակ հավելումներից, որոնք օգտագործվում են բուլկիներ, կեքսեր և այլ թխվածքներ պատրաստելիս, օրինակ՝ շաքարավազ, յուղ, խմորիչ և այլն:
Եթե ունեք ավելորդ քաշի խնդիր պարտադիր չէ հրաժարվել խմորով պատրաստված ամեն ինչից, բավական է միայն հանել ճաշացանկից քաղցր թխվածքները։ Ցորենահատիկները հարուստ են մի շարք վիտամիններով, որոնք նպաստում են մաշկի թարմացմանը, նյարդային համակարգի ճիշտ աշխատանքին, բարձրացնում են տրամադրությունը, էներգիայի աղբյուր են և բարելավում են նյութափոխանակությունը: Իհարկե սա այն դեպքում երբ չափաբաժինները ադեկվատի սանդղակը չեն անցնում։
Հացամթերքի մեծ սիրահար եմ ու խոստովանում եմ, որ չչարաշահել այն ոչ մի կերպ չեմ կարող, հատկապես որ վերջերս իմացա հենց այն խմորի բաղադրատոմսը, որով այսօր պատրաստելու ենք մեր կարկանդակը: Այս նույն խմորով կարող եք պատրաստել նաև չափազանց համեղ, փափուկ ու փխրուն հացեր, ողջ ընտանիքի համար։ Խմորը թխելուց հետո այն ևս մի քանի օր պահպանում է սկզբնական համն ու փափկությունը։
Խմոր
Մեզ անհրաժեշտ է ՝
1,5 կգ ալյուր - 600 դր
2 ճ/գդ խմորիչ - 100դր
2 հատ ձու - 130դր
1 սուրճի բաժակ ձեթ
0,5 լ գոլ ջուր
աղ
Թասի մեջ լցնել ալյուր, խմորիչ, աղ և խառնել, ավելացնել ձու, ձեթ, ջուր և հունցել խմորը։ Թողնել հանգստանա 20 րոպե։
Միջուկ՝
8-10հ ձու - 700դր
4-5 փունջ թարխուն - 300դր
Աղ/պղպեղ
Մինչ խմորը կհասնի, կտրատել նախապես խաշած ձուն և նախապես լվացված թարխունը։ Խառնել և համեմել: Քանի որ խմորը կպչուն է ալրոտել կամ ձեթ քսել սեղանին և ձեռքերին, բացել այն գրտնակի օգնությամբ, մեջտեղում լցնել միջուկը և փակել, այնպես ինչպես կցանկանաք, կամ կկարողանաք։ Թխել նախապես 180՝տաքացրած ջեռոցում 20 րոպե։
Պատրաստման տևողությունն է՝ 50 րոպե։
