Յուրաքանչյուր հաճախորդ՝ ինչպես առաջինը

Reservin Armenia-ն մշտապես հետազոտություններ է անցկացնում իր գործընկեր հաստատություններում, սպասարկման որակը ստուգելու համար: Այս ստուգումների արդյունքում իր մշտական բարձր դիրքն է ունեցել El Garden սրճարանը, որի սպասարկող անձնակազմը մշտապես առանձնանում է իր պրոֆեսիոնալիզմով։

Արդեն ավանդույթ է ձևավորվել, որ ամեն չորեքշաբթի Reservin Armenia-ն ներկայացնում է սպասարկման ոլորտի «գուրու»-ներին՝ մարդկանց ովքեր օրն ի բուն, լուռ ու մունջ, մշտապես ժպիտով ու բարեհամբույր սպասարկմամբ մեր հանգիստը դարձնում են էլ ավելի հաճելի։ Այս անգամ, մեր ավանդական սյունակի հերոսը El Garden սրճարանի մատուցող Վահան Զարոյանն է։ Մասնագիտությամբ մանկավարժ մատուցողը մեզ պատմեց երկու մասնագիտությունների նմանության, հաճելին օգտակարի հետ համատեղելու մասին։

«Մեկ տարուց ավել է, ինչ աշխատում եմ որպես մատուցող և այս մեկ տարին իմ աշխատանքային գրքույկում ամենաերկար գրանցված ժամկետն է։ Սպասարկման ոլորտը հարուստ ոլորտ է և հատկապես մատուցման մեջ անընդհատ հանդիպում ես մարդկանց, ովքեր քեզ համար իսկական բացահայտում են: Ու ակամայից աշխատանքը հաճելի է դառնում, երբ գործ ես ունենում տարբեր մարդկային որակների, հոգեբանությունների ու տեսակների հետ։ Աշխատանքն էլ իր հերթին ավելի հետաքրքիր է դառնում, երբ շփվում ես տարբեր բնագավառի մարդկանց, օրինակ՝ շոու-բիզնեսի ներկայացուցիչների հետ, երբեմն էլ նրանք քեզ ընկեր են դառնում։

Ի՞նչ ես սովորել մատուցողի աշխատանքի ընթացքում:

Սովորել եմ զիջել: Երևի թե դա սպասարկման ոլորտի կարևոր նախապայմանն է:

Մատուցողի աշխատանքը թերևս հեշտ գործ չէ։ Ի՞նչ դժվարությունների ես հանդիպել աշխատանքի ընթացքում։

Երբեմն լինում են պրոբլեմատիկ հաճախորդներ, որոնց հետ պետք է լեզու գտնել: Այդ ժամանակ ինձ օգնում է մանկավարժի իմ մասնագիտությունը: Չէ՞ որ ի վերջո բոլոր մարդիկ էլ հոգու խորքում երեխաներ են։

Հաճախորդներին օգնու՞մ ես ընտրություն կատարել, ի՞նչ ես առաջարկում երբ խնդրում են քո օգնությունը:

Այդ ժամանակ ես իմ նախընտրածն եմ առաջարկում, բայց, իհարկե, պետք է ուշադրություն դարձնել նաև, թե ով է պատվիրատուն և պետք է փորձել կռահել, թե նրան ինչ դուր կգա: Օրինակ ես, սիրում եմ El Ball, և երբ պետք է հաճախորդին զարմացնել, միշտ դա եմ առաջարկում, քանի որ թե՛ համեղ է և թե՛ գեղեցիկ:

Հե՞շտ է ժպտալ երբ տրամադրություն չունես:

Ես միշտ եմ ժպտում, դա ինձ մոտ արդեն կարծես սովորություն է դարձել: Ես պարտավոր եմ անգամ 100-րդ հաճախորդի մոտ թողնել այնպիսի տպավորություն, իբրև նա իմ առաջին հաճախորդն է: