«Hans & Franz»՝ մուտքը միայն մսակերների համար

«Hans & Franz»՝ մուտքը միայն մսակերների համար

Հեղինակ՝ Նունե Այլանջյան


Մոտ մեկ տարի առաջ մեր քաղաքում սկսվեց գինու բարերի իսկական տարափ, այնպիսի տպավորություն էր, որ Երևանում ջրի փոխարեն մարդիկ գինի են խմում, սակայն կատաղի մրցավազքում հաղթեցին ընդամենը մի քանի գինու բարեր, որովհետև իրենք առաջինն էին: Հիմա ժամանակները փոխվել են, մարդիկ ուզում են բացի խմելուց նաև համեղ ուտել, իսկ դա հաճելի է անել ոճային միջավայրում:

Սարյան 8 հասցեում բացված «Hans & Franz»-ը meat&grill ռեստորան է, որտեղ մատուցվում է միս, համեղ միս, շատ միս, այլ կերպ ասած՝ նրբերշիկի տեսականիից մինչև հավի և խոզի բարբիքյու: Սա մեր քաղաքի դեռևս առաջին գրիլ ռեստորանն է, որը համոզված ենք, սկիզբ կդնի գրիլ բարերի և ռեստորանների նոր սերնդի, բայց մինչ այդ այցելենք «Հանս Ընդ Ֆրանց»:

---------------------------

Պլյուսներ

---------------------------



Հյուրասիրություն: Երևանում շատ քիչ են այն վայրերը, որտեղ մատուցողը բարևելուց հետո վերադառնում է ոչ թե մենյուով, այլ՝ թրմօղիով, (перцовка) դա, իսկապես հուզիչ է, անգամ հոգիդ ու մարմինդ ջերմացնող: Սակայն խորհուրդ՝ այն խմեք միայն մի լավ ուտելուց հետո, շատ թունդ է:

Մատուցում-խորհրդատվություն: Սովորաբար մատուցողները փորձում են այցելուի վրա շատ փող աշխատել, դա բնական է, սակայն երբ քեզ համոզում են վերցնել մի բան, որը դու չես ուզում ու չգիտես էլ ինչ է, դա շատ տհաճ է: Մոռացեք այդ մասին: Այստեղ նման բան չկա: Ցանկության դեպքում ձեզ մանրամասն կբացատրեն ուտեստի բաղադրությունն ու խորհուրդ կտան, թե ինչ ու որքան վերցնել, որ և՛ կշտանաք, և՛ շատ չվնասեք ձեր դրամապանակի պարունակությանը:

Կառավարեք մսի ջերմաստիճանը: Այստեղ, ի տարբերություն մյուս վայրերի, ինքներդ կարող եք որոշել, թե ինչ աստիճան եփված կամ խորովված լինի միսը: Սեղաններին դրված է ցուցանակ, պարզապես մատուցողին ասեք ձեր նախընտրած ջերմաստիճանը:

Բացի մսից: Իհարկե, մի քիչ չափազանցված է, որ բուսակերներն այստեղ անելիք չունեն, որովհետև մենյույում առկա են նաև նրանց համար նախատեսված համեղ ուտելիքներ՝ աղցաններ, խավարտ, բոլորն էլ հարմար գներով:

Չծխողների սրահ: Հաճելի է տեսնել մի վայր, որտեղ  չծխողները կարող են առանձնանալ ու մաքուր օդում վայելել իրենց բարբիքյուն:

Մսագործին հյուր: Հենց ոտք եք դնում տարածք միանգամից զգացվում է, որ այստեղ բրուտալ մթնոլորտ է, պատից կախված է մսագործական դեկորատիվ դանակ-կացինը, աթոռները կաշվեպատ են, իսկ նստարանների վրա փռված է արջի մորթին՝ հուսով ենք արհեստական:

---------------------------

Մինուսներ

---------------------------



Դրսում տեղ չկա: Գարնանային երեկոները, բնականաբար հաճելի է անցկացնել դրսում, «Hans & Franz»-ը ձեզ տալիս է այդ հնարավորությունը, սակայն ուշ ժամերին հույս չունենաք, որ ձեր բարբիքյուն կարող եք բացօթյա միջավայրում վայելել: Չնայած կարող եք նախապես ամրագրել ձեր տեղը:

Հատուկ հյուրերի համար միշտ էլ տեղ կա:  Փաստորեն այստեղ երբեմն կարելի է հանդիպել նաև օլիգարխների, որոնց համար միշտ էլ տեղ կա, եթե չկա էլ՝ կստեղծեն: Նման դեպքի ականատես լինելն այդքան էլ հաճելի չէ, որովհետև դու ներսում նստած ես, քանի որ դրսում տեղ չկա, հետո տեսնում ես, որ սեղան են դուրս հանում, որովհետև եկել է ոմն բարձրաստիճան պաշտոնյա: Հասկանալի է, որ չեն կարող ասել՝ տեղ չունենք, բայց գոնե դա այցելուների աչքի առջև այնպես նրբորեն արվի, որ մարդիկ իրենց, մեղմ ասած, վատ չզգան:

Ուշացող մոխրամանները: Հասկանալի է, որ պիկ ժամերին մատուցողների գործը կրկնապատկվում է ու ամեն ինչ հասցնելը դառնում է դժվար, սակայն, գրողը տանի, ես այցելու եմ ու տասնյակ վայրերի միջից ընտրել եմ ձեզ և դուք ուշացնում եք իմ մոխրամանը, այլ բան լսել չեմ ուզում:

Ապակողմնորոշող զուգարանային սիմվոլները: Այս վայրի պետքարաններում կախված հայելիները կարող են վեհորեն զարդարել ցանկացած նախասրահ, սակայն այս առակս այլ բան կուսուցանե: Տղամարդկանց ու կանանց զուգարանների դռների վրա կախված ցլերի գլուխները գրեթե նույնն են, պետք է շատ ուշադիր նայես՝ հասկանալու համար, որ երկար կոտոշներովը դա տղամարդկանցն է, իսկ կարճը՝ կանանցը:

6400

(*). նշվածները պարտադիր են լրացման

 

Տվյալներ չկան
^ Վեր