Հեղինակ՝ Նունե Այլանջյան
Հայկական գրերի ստեղծողի մասին մեզ բավարար տեղեկություններ են հասել, սակայն դրանցից ոչ մեկում չի խոսվում Մաշտոցի նախընտրած ուտեստների մասին: Պարզապես, հաշվի առնելով, որ նա ծնվել է Հացեկաց գյուղում, կարելի է ենթադրել, որ սնվել է գյուղական բերքուբարիքով: Իսկ թե արդյո՞ք նա կցանկանար իր անունով շաուրմայանոց տեսնել՝ չենք կարող ասել: Այդուհանդերձ, Մաշտոցի 38 հասցեում գործում է «Մաշտոցի» շաուրմայանոցն ու պետք է խոստովանել, որ այստեղ մատուցվում է բավականին համեղ շաուրմա: Իհարկե այս վայրը նույնպես ունի ինչպես դրական, այդպես էլ բացասական կողմեր:
---------------------------
Պլյուսներ
---------------------------
Իդեալական շաուրմա: Եթե ինձ հարցնեն՝ ո՞րն է շաուրմայի իմ իդեալը, ես կպատասխանեմ՝ Մաշտոցինը: Այստեղ գտել են ճիշտ շաուրմա պատրաստելու ձևը: Այսինքն, շաուրմայում ոչ մի ավելորդ բան դուք չեք գտնի: Ձեզ երես չեն տա ավելորդ սոուսներով կամ հավելումներով, փոխարենը՝ կհամտեսեք ճիշտ ու համեղ պատրաստված շաուրմա:
Աշխարհագրական դիրքը: Պուշկին-Մաշտոց խաչմերուկը բիզնեսի համար ամենահարմար տեղերից մեկն է, իսկ երբ մատուցում ես համեղ շաուրմա, հաջողությունը գրեթե երաշխավորված է: Մինչ մտածում ես ուր գնալ և ի՞նչ ուտել՝ ընկերներդ արդեն քեզ քարշ են տալիս «Մաշտոցի շաուրմա»: Բացի այդ, այս շաուրմայանոցը շատ մոտ է «փաբաստանին», այսինքն, եթե փաբում հաց ուտել չես ուզում, արագ մտնում ես «Մաշտոցի շաուրմա», ուտում ու գնում գինարբուքը շարունակելու:
Ժամանակակից ինտերիերը: Կարծրատիպ կա, որ շաուրմայանոցները պետք է մի տեսակ ծանրացած օդով ու նույնքան ծանր ինտերիերով վայրեր լինեն, բայց նման բան չկա: «Մաշտոցի» շաուրմայանոց մտնելիս, եթե չիմանաք, որ այստեղ մատուցվում է շաուրմա, ձեզ կթվա, որ եկել եք burger club: Կարմիր կաշվեպատ նստատեղերն ու լուսավորությունը ամբողջովին տրամադրում են հաճելի ժամանցի՝ մեկ բաժին շաուրմայի շուրջ:
Մատուցումը: Այստեղ դուք չեք մոտենում դրամարկղին, այլ ձեզ են մոտենում և ընդունում պատվերը: Մատուցողուհիները հիմնականում բարեհամբույր են ու ժպտերես:
Այստեղ ձեզ կհիշեն: Մշտական հաճախորդ ունենալը յուրաքանչյուր վայրի համար մեծ ձեռքբերում է: Դրա համար որոշ ընկերություններ տարիներ ու մեծ գումարներ են ծախսում, բայց դրա համար պետք է ընդամենը մի բան՝ հարգալից մոտեցում հաճախորդի հանդեպ: Այստեղ դուք կստանաք դա, ավելին՝ այստեղ ձեզ կհիշեն: Հաջորդ անգամ, երբ վերադառնաք, ձեզ կժպտան արդեն որպես ծանոթի: Դա հաճելի է:
Wi - Fi: Բազմաթիվ այցելուների համար սա կարևոր նախապայման է: Եթե միայնակ եք եկել, ապա կարող եք համացանցում մի քիչ բզբզալ մինչև պատվերը բերեն: Իսկ պատվերը, որպես կանոն, չեն ուշացնում:
Հիգիենա: Այստեղ մաքուր է ու դա երևում է նաև անզեն աչքով: Բարեբախտաբար այսքան ժամանակ շաուրմայի միջից ավելորդ բաներ դուրս չեն եկել:
Կարմիր պղպեղը: Աղացած ու չորացրած պղպեղն այս վայրի անցաթղթերից մեկն է, փնտրեք այն ձեր սեղանի անկյունում ու անպայման ավելացրեք շաուրմային, եթե իհարկե կծվի սրահար եք:
---------------------------
Մինուսներ
---------------------------
Չունենք: Արտահայտություն, որը մեկ վայրկյանում կարող է փչացնել այցելուի տրամադրությունն, ավելին՝ նպաստել, որ հաջորդ անգամ նա ձեր տարածք ոտք չդնի: Երբ լսում ես՝« չունենք» արտահայտությունը, օրդ միանգամից մթնում է, մանավանդ, երբ սոված ես: Օրինակ, մի քանի անգամ այստեղ հավի մսով շաուրմա չեն ունեցել: Պետք է այնպես անել, որ այդ բառն այլևս չհնչի:
Կամ-կամ: Ամենավատ բաներից մեկը սպասարկման ոլորտում, որը կարող են առաջարկել այցելուին ու միանգամից կորցնել նրան: Այստեղ մի ժամանակ իշխում էր Pepsi-ն, իսկ Cola չկար: Այսինքն, եթե մուգ գույնի գազավորված ըմպելիք էիր ուզում պիտի Pepsi խմեիր: Լավ է, վերջերս այդ մենաշնորհը վերացավ:
Խմորեղեն: Ասեք՝ շաուրմա՛, իսկ հիմա՝ խմորեղե՜ն: Երկու բան, որ ընդհանրապես մեկը մյուսի հետ կապ չունեն: Այստեղ ավելացվել է խմորեղենի բաժին: Իհարկե մի լավ ուտելուց հետո կարելի է դեսերտին անցնել մեկ գավաթ սև սուրճով, բայց այդ դեպքում check-in լինելուց ի՞նչ անենք: Դա կդիտվի մոտավորապես այսպես՝ Nune Aylanjian eats cake at Mashtotsi Shaurma: Մի քիչ ծիծաղելի է:
.png)
