Հապճեպ ու սննդարար Աննա Գևորգյանի հետ

Հապճեպ ու սննդարար Աննա Գևորգյանի հետ

Հեղինակ՝ Աննա Գևորգյան


Մայիսյան հաղթանակներն ու Շուշիի ազատագրումը ոգևորող ու ներշնչող է անգամ տնային տնտեսուհիների համար: Այդ իսկ պատճառով իմ ավանդական «Հապճեպ ու սննդարար» էջում որոշեցի պատրաստել Շուշվա ավանդական ճաշատեսակներից մեկը։ Արցախյան խոհանոցը տնտղող տնտեսուհու մտքին առաջինն անշուշտ ժենգյալով հացն է գալիս, սակայն չնայած իր աննախադեպ տարածվածությանը մայրաքաղաքում այն պատրաստելու համար պարզապես չես գտնի համապատախան բաղադրամասերը՝ կանաչեղենը: Շուշիի ավանդական ճաշացանկից հաջորդ «հաջողակը», որ արժանացավ իմ ուշադրությանը կորկոտն էր: Այս աննկարագրելի պարզ ու համեղ ճաշատեսակը պիտի եփվեր ողջ գիշեր, դրանով իսկ հեռու էր հապճեպ պատրաստվող ճաշատեսակների ցանկից։ Վերջապես ընտրությունս կանգ առավ բրնձով լցոնած հավի վրա: Պետք է խոստովանեմ, որ այն ինձ անծանոթ էր, երբեք չէի համտեսել ու չէի էլ պատրաստել: Եթե ինքներդ գիտեք այս ճաշատեսակը, հաստատ գլխի կնկնեք, որ սյն իմ  կողմից փոքրիկ մետամորֆոզի է ենթարկվել: Օրիգինալ տարբերակում միջուկի մեջ, ոչ թե չամիչ էր այլ հոնի չիր և երկրորդ տարբերությունն այն է, որ ես պատրաստեցի, ոչ թե ջրով կաթսայով մեջ՝ գազօջախի վրա, այլ թավայով՝ ջեռոցում։



5 բաժին բրնձով լցոնած հավ պատրաստելու համար, մեզ անհրաժեշտ են հետևյալ բաղադրիչները՝

Հավ – մեկ ամբողջական - 2500 դր

Բրինձ – 300 գր - 200 դր

Սալորաչիր – 100 գր - 300 դր

Չամիչ կամ հոնի չիր - 100 գր - 200 դր

Սոխ – 1 հատ - 50 դր

Կարագ – 50 գր -100 դր

Չորացրած կանաչի

Աղ/պղպեղ

Պատրաստման տևողությունը՝ 45 րոպե։ Ծախսը՝ 3350 դր։


Հավը նախապես մոտ քսան րոպե դնել աղաջրի մեջ, որ մաքրվի տհաճ հոտ ու համից, հետո լավ լվանալ։

Նախապես պատրաստել բրնձով փլավ, կարելի է մի քիչ հում թողնել։Կարագով տապակել սոխը, լցնել փլավի վրա։ Տապակել չրեղենը, ավելացնել բրնձի վրա ու խառնել։

Համեմել հավը, դանակով մի քանի տեղ ծակել միսը մինչ ոսկորը, որպեսզի մեջը հում չմնա, լցոնել փլավով, կարել եզրը և դնել ջեռոցի մեջ։Եթե փլավը ավելացած լինի, կարող եք լցնել այն թավայի մեջ, որում եփվելու է հավը, յուղը կծորի վրան և ավելի կհամեղացնի ուտելիքը։ Եփել մինչև կարմրելը։


 

 

 

 

 


 

6393

(*). նշվածները պարտադիր են լրացման

 

Տվյալներ չկան
^ Վեր