Անուն հանածները. Մերլին Մոնրո

Հեղինակ՝ Անի Սմբատի

Շաբաթն արդեն կես է ընկել, իսկ վաղվանից սկսվում է ուիքենդային հրավառությունը։ Եվս մի քանի օր, ու երկար սպասված ամառը վերջապես կգա, չնայած եղանակը բոլորովին հակառակն է խոստանում։ Բայց ձևացնենք, որ ես դա չասեցի։ Եթե չեք համբերում, թե երբ եք ամառային զով երեկոներն անցկացնելու լավ շրջապատի ու խմիչքի ընկերակցությամբ, բայց արդեն հոգնել եք վոդկա-սփրայթ, ռոմ-կոլա, ջին-տոնիկ դասական զույգերից, ապա այս շարքն իսկը ձեզ համար է։ Ամեն շաբաթ ես կներկայացնեմ որևէ հայտնի մարդու պատվին անվանված կամ հատուկ նրա համար բարմենի մոգոնած կոկտեյլը, դրա բաղադրությունը, իսկ երբեմն նաև՝ կոկտեյլի ստեղծման հետևում թաքնված պատմությունը։ 

Ամռան հենց առաջին օրը՝ հունիսի 1-ին, ծնվել է ամերիկյան կինոդերասանուհի, երգչուհի, 1950-ականների սեքս-սիմվոլ, հազարավոր կանանց և տղամարդկանց համար գեղեցկության ու կանացիության մարմնացում Մերլին Մոնրոն։ Նրա կենսագրության հեղինակ Ջորջ Բարիսի խոսքով՝ Մերլինը բառացիորեն «շամպայն էր շնչում», և ոչ այլինչ, քան հանրահայտ Dom Perignon։ Մերլինի խոսքով՝ այդ փրփրուն գինու մեկ բաժակը կարող էր ստիպել նրան զարթնել առավոտյան ու վեր կենալ անկողնուց։ Մի անգամ նա նույնիսկ լոգանք էր ընդունել՝ օգտագործելով թանկարժեք շամպայնի 350 շիշ։ Դերասանուհու պատվին կոչված կոկտեյլն առաջին անգամ նրա համար պատրաստվել է Լոս Անջելեսում 1959-ին՝ «Ջազում միայն աղջիկներն են» ֆիլմի նկարահանումների ավարտից հետո։ Մերլինը խնդրել էր շամպայնով ավելի կանացի կոկտեյլ պատրաստել իր համար։

«Մերլին Մոնրո» կոկտեյլը հենց Dom Perignon շամպայնով է պատրաստվում, որի գինը սկսում է 170 դոլարից և սրընթաց աճում՝ կախված հնեցման ժամկետից, բայց եթե նման ճոխություն առայժմ չեք կարող ձեզ թույլ, ապա կարելի է ընտրել Moёt & Chandon Brut Imperial։

Եվ այսպես, կոկտեյլի բաղադրիչները՝

120 մլ շամպայն/ փրփրուն գինի

30 մլ կալվադոս/ խնձորի բրենդի

1 ճ/գդ գրենադին

Շամպայնի բաժակի մեջ լցնել բրենդին ու գրենադինը և միայն վերջում՝ շամպայնը։ Ընդ որում, որքան շամպայնը չոր լինի, այնքան կընդգծվի կալվադոսի խնձորային համը։ Կոկտեյլը զարդարել լիմոնի կեղևով կամ փայտիկներին ամրացված կոկտեյլային բալերով։ «Մերլին Մոնրո» կոկտեյլը նախատեսված է ռոմանտիկ երեկոյի համար, իսկ գրենադինի շնորհիվ դուր կգա հատկապես քաղցրի սիրահարներին։