Tom Collins փաբում կարելի է վայելել ոչ միայն հաճելի երաժշտություն, այլև հագեցնել քաղցը համեղ ուտեստներով: Իսկ երբ չեք կարողանում կողմնորոշվել և ընտրություն կատարել, օգնության է գալիս Ռոզա: Կարևորելով ժպիտն ու բարձր տրամադրությունը նա մշտապես ժպտում է հաճախորդներին՝ շատ հաճախ թաքցնելով սեփական վատ տրամադրությունը: Ռոզան Reservin-ին պատմեց մենյուն սովորելու, սիրելի տարրի և թեյավճարների մասին:
Արա՞գ ես մենյուն անգիր սովորել:
Մենյուն սովորելը հեշտ չէ: Դրա համար երկար ժամանակ է հարկավոր, երբ արդեն շատ ես աշխատում, սովորում ես ավելի հեշտ: Իսկ շատ արագ սովորելու համար փորձ է հարկավոր:
Երբ խնդրում են որևէ բան առաջարկել, ի՞նչ ես առաջարկում: Հասկանու՞մ ես, թե ինչ է պետք հաճախորդին:
Միշտ առաջարկում եմ այն, ինչ ինքս փորձել եմ և վստահ եմ, որ այն կարող է դուր գալ հաճախորդին: Երբեմն չեմ հասկանում, թե ինչ են ուզում պատվիրել, բայց եղել են դեպքեր, երբ հաճախորդը ներս է մտել և միանգամից հասկացել եմ ու հենց այդպես էլ եղել է:
Կա՞ մի բան, որն ամենաշատն ես սիրում այստեղ:
Բնականաբար, այն խմիչք է: Վերջերս է հայտնվել և դարձել իմ սիրելին: Դարչինի համով ռոմ, այս խմիչքը միշտ խորհուրդ եմ տալիս հաճախորդներին:
Պատվերները գրանցու՞մ ես, եղե՞լ է որ շփոթես:
Պատվերները չեմ գրանցում և արդեն չեմ շփոթում: 5 ամիս է ինչ աշխատում եմ այստեղ և ժամանակի ընթացքում ավելի եմ հմտանում մտապահելու հարցում:
Պատահու՞մ է այնպես, որ հաճախորդները սխալ արտասանեն ուտելիքի, կամ խմիչքի անունը:
Գրեթե ամեն օր այդպիսի դեպքեր լինում են: Շատ ծիծաղելի անուններ են ասում, բայց չեմ կարողանում վերհիշել դրանցից մեկը:
Հե՞շտ է ժպտալ, երբ դու ինքդ տրամադրություն չունես:
Շատ հաճախ, տրամադրություն չեմ ունենում, բայց ժպտում եմ հաճախորդներին: Ժպտալը շատ կարևոր է: Կան հաճախորդներ, ովքեր հենց իրենք են բարձրացնում տրամադրությունս, բայց երբեմն կան այնպիսիք, որ կարող են ավելի փչացնել:
Իսկ թեյավճարներն ազդու՞մ են տրամադրության վրա: Որքա՞ն է եղել ստացածդ ամենաշատ թեյավճարը:
Ես չգիտեմ, թե ով որքան է թեյավճար թողնում: Անկեղծ ասած, ես թեյավճարներին ուշադրություն չեմ դարձնում:
