Սուրեն Առուստամյանի համերգը Mezzo Classic House Club-ում

Սուրեն Առուստամյանի համերգը Mezzo Classic House Club-ում

Սեպտեմբերի 24-ին Մեցցո ակումբում տեղի ունեցավ բոլորիս կողմից շատ սիրված տաղանդավոր  երգիչ Սուրեն Առուստամյանի բլյուզ երեկոն: Դահլիճը ամբողջովին լեփ լեցուն էր Սուրենի երկրպագուներով:

Համերգը անցավ ջերմ, անմիջական ու շատ էներգետիկ միջավայրում: Սուրենը, լինելով իմպրովիզների սիրահար, այս անգամ էլ  պահը բաց չթողեց ու ելույթի ընթացքում հնարավորություն տվեց հանդիսատեսին իր հետ նվագել կիթառով: Դա շատ դրական արձագանք ստացավ հանդիսատեսի կողմից: Միջավայրը ավելի թեժացավ ընդմիջումից հետո, քանի որ ամբողջ ընդմիջումը Սուրենը ծախսեց երկրպագուներին ստորագրություններ տալու և նրանց հետ լուսանկարվելու վրա:  

Համերգի ընթացքում Սուրենը կատարեց ոչ միայն արտասահմանյան բլյուզ աստղերի այնպիսի հայտնի երգեր, ինչպիսին է  “Aint no sunshine” –ը, այլ նաև իր երգացանկից “Oh My Lord”, որը նա նվիրել է Հայոց Ցեղասպանության զոհերին:

Համերգից հետո Սուրենը հարցազրույց է տվել Reservin Armenia—ի լրագրող Մարի Սևոյանին: Հարցազրույցը և համերգի ֆոտոպատմությունը դիտեք ստորև՝

Մարի,-Ողջույն Սուրեն ջան, Ես Մարին եմ, ներկայացնում եմ Reservin Armenia ընկերությունը, որը բացի նրանից, որ իրենից ներկայացնում է ժամանցի վայրերում սեղանների առցանց  ամրագրման համակարգ, նաև ունի բլոգ, որտեղ մենք ներկայացնում ենք քաղաքում տեղի ունեցող հետաքրքիր միջոցառումներն՝ հարցազրույցների կամ ֆոտոլուսաբանման տեսքով։ Սկսենք։ Համերգը շատ ջերմ ու վառ անցավ, չնայած, որ ես նկատեցի, որ այս անգամ Deep Purple-ի երգերից չկատարեցիք:

Սուրեն,- Այո, ճիշտ եք նկատել, իրոք այս անգամ չկատարեցի (ժպիտով ու ծիծաղով);

Մարի,- Դուք սիրում եք իմպրովիզներ անել։ Ինչո՞վ է դա պայմանավորված, հանդիսատեսի՞ց եք զգում ու որոշում իմպրովիզացիա անել, թե՞ հենց ի սկզբանե այդպես եք պլանավորում համերգի ընթացքը:

Սուրեն,- Այո՜ անում եմ: Դա ինքնաբերաբար է ստացվում, նախ և առաջ պայմանավորված նրանով, որ բլյուզային ժանրը իմպրովիզացիոն ժանր է և այլ կերպ հնարավոր էլ չի ելույթ ունենալ: Երգերը ամեն անգամ տարբեր ձև են կատարվում, թե խմբի կողմից, թե՝ իմ: Հիմքը մնում է նույնը, բայց իմպրովիզները ամեն անգամ տարբեր են և գրեթե չեն կրկնվում։ Ելույթի ժամանակ ցանկացած իմպրովիզ, դա երկխոսություն է հանդիսատեսի հետ:

Մարի,- Ես նաև նկատեցի, որ այսօր դուք ելույթ եք ունենում ոչ թե Իենի  և մյուս աստղերի ստորագրությամբ Ձեր հայտնի կիթառով, այլ ուրիշ կիթառով։

Սուրեն,- Դուք շատ ուշադիր եք։ Այո, ես ունեմ այդպիսի կիթառ (ոգևորված դեմքով), բայց արդեն քանի տարի է դրանով ելույթ չեմ ունենում։ Այս պահին այն Հայաստանում է, ես այն պահում եմ որպես հուշանվեր։ 

Մարի,- Հասկանալի է։ Իսկ դուք ո՞ր երգիչների շարքին եք պատկանում, որոնք համերգից առաջ միայն ջուր են խմում, թե՝ հանգիստ ամեն ինչ խմում եք։  

Սուրեն,- Չէ, չէ, ես ամեն ինչ էլ  խմում եմ, ուտում էլ եմ, կախված տրամադրությունից ու հանգամանքներից, ամենատարբեր խտության և ուժգնության խմիչքներ: ( Ծիծաղելով)

Մարի,- Փաստորեն դա է Ձեզ օգնում համերգից առաջ լարվածությունը թուլացնել

Սուրեն,- Չէ՜, այնպես չի, որ միշտ համերգից առաջ ալկոհոլային խմիչքներ եմ խմում, ուղղակի դեմ չեմ, եթե առիթ լինի կխմեմ և այնպես էլ չէ, որ միշտ միայն ջուր եմ խմում: Ամեն ինչ կախված է տվյալ իրավիճակից։

Մարի,- Դուք 2014 թվականից ԱՄՆ-ում եք և պարբերաբար գալիս եք Հայաստան, ի՞նչ պլաններ ունեք, պատրաստվու՞մ եք մնալ Հայաստանում, թե՞ շարունակելու եք ստեղծագործել արտերկրում և Հայաստան գալ միայն համերգներ տալու համար:

Սուրեն,- Վերջին երկու տարիներին ես ԱՄՆ-ում եմ ապրում, այնտեղ ձայնագրվում եմ, համերգներ եմ տալիս։ Այս անգամ Հայաստան եմ եկել մոտ 23-24 օրով, 29-ին նորից վերադառնում եմ ԱՄՆ։ Հայաստան եմ եկել, քանի որ ընտանիքիս անդամներին շատ էի կարոտել, որոշեցի նրանց անակնկալ անել, առանց զգուշացնելու վեր կացա և եկա։ Անակնկալս ստացվեց;

Մարի,- Եվ երկրպագուներդ էլ շահեցին այդ անակնկալից։ Ինչպիսի՞ միջավայր է հարկավոր, որ Սուրեն Առուստամյանը ստեղծագործի։

Սուրեն,- Ես կարող եմ ստեղծագործել ամենուրեք՝ ստուդիայում, բնության գրկում, ցանկացած վայրում, երբ մուսաս գալիս է, իմ մուսան էլ է սիրում անակնկալներ մատուցել /ծիծաղում է/։

Մարի,- Instagram-ում նկար էիք ներբեռնել, որտեղ խորոված եք անում։ Այսօր՝ հենց Ձեր համերգի օրը, հետաքրքիր զուգադիպությամբ, Ախթալայում անցկացվում է Խորովածի համահայկական փառատոն, եթե ուրիշ օր լիներ կգնայի՞ք մասնակցելու։ Ընդհանրապես սիրու՞մ եք պատրաստել, թե միայն համեղ ուտել եք սիրում։

Սուրեն,- Սիրում եմ և՛ պատրաստելու գործընթացին մասնակից լինել, և՛ ուտելու։ Նկարը ընկերոջս ամառանոցում ենք արել, հյուր էի գնացել Հոկտեմբերյան, շատ գեղեցիկ տեղ էր, խաղողի մեծ այգիներով, բակով։ Որոշեցինք հենց այգու մեջ, ճանապարհին մանղալ դնենք ու պատրաստենք։ Շատ լավ ժամանակ անցկացրեցինք:

Մարի,- Շնորհակալություն հետաքրքիր հարցազրույցի և համերգի համար: Մեր հարցազրույցն կարող եք կարդալ reservin.am կայքում։

Սուրեն,- Ձեզ էլ շնորհակալություն հետաքրքիր հարցերի ու մինչև համերգի ավարտը սպասելու համար։ Անպայման կկարդամ։





















2882

(*). նշվածները պարտադիր են լրացման

 

Տվյալներ չկան
^ Վեր