Այսօր Երևան է ժամանել ռուսական էստրադայի ամենավառ ու էմոցիոնալ աստղերից մեկը՝ Ելենա Վաենգան: Օդանավակայանում Ելենային դիմավորել են համերգի կազմակերպիչ Mezzo Production-ի և Reservin Armenia-ի թիմի ներկայացուցիչները: Շուտով Ձեզ կներկայացնենք Ելենա Վաենգայի՝ Reservin Armenia-ի լրագրող Անահիտ Խաչատուրյանին տված հատուկ հարցազրույցը ամբողջությամբ:
Ելենան Հայաստանում է առաջին անգամ, ինչպես ինքն է նշում, ժամանել է հատուկ իր նախաձեռնությամբ՝ մեծ ու դրական սպասումներով լի: Իր այցի ընթացում, բացի մենահամերգից, նա պատրաստվում է նաև այցելել Սևանա լիճ և մի քանի այլ տեսարժան վայրեր: Երգչուհու խոսքերով Հայաստանը նրան գրավում է իր բազմադարյա պատմությամբ ու մշակույթով, քրիստոնեական խորը արմատներով և խոհանոցով: Երգուհին նշել է, որ թեև չի սիրում մարդկանց տարանջատել ըստ ազգությունների, բայց չի էլ կարող թաքցնել, որ հատուկ համակրանք ու թուլություն ունի հայկական ամեն ինչի, հատկապես համեղ խոհանոցի և երաժշտության նկատմամբ:
Reservin Armenia-ին տված հատուկ հարցազրույցի շրջանակներում Ելենան անկեղծացել է և պատմել ոչ միայն իր ապագա պլանների, այլև երաժշտական նախասիրությունների, իր ընտանիքի, մտահոգությունների և մի շարք այլ հետաքրքիր փաստերի մասին: Հարցազրույցի ժամանակ նույնիսկ բացել է մի փոքրիկ գաղտնիք և պատմել, որ այսօրվա համերգի համար նախապատրաստել է յուրահատուկ անակնկալ՝ հատուկ մեր հանդիսատեսի համար՝ նա կատարելու է երգեր դուդուկի նվագակցությամբ:
Թե ինչը կարող է հունից հանել, ուրախացնել կամ անտարբեր թողնել ռուսական էստրադայի ամենայուրահատուկ աստղերից մեկին, Ձեր ուշադրությանը կներկայացնենք շուտով, իսկ մինչ այդ հրավիրում ենք բոլորին ներկա գտնվելու Ելենա Վաենգայի մենահամերգին, որը տեղի կունենա այսօր՝ սեպտեմբերի 14-ին, Կարեն Դեմիրճյանի անվան մարզահամերգային համալիրում, ժամը 19:00-ին:
.jpg)
