Հետաքրքասեր Էդիտան

Այսօր չորեքշաբթի է, իսկ դա նշանակում է, որ Reservin Armenia-ն ներկայացնում է այն մարդկանց, ովքեր մշտապես աշխատում են մեզ համար, ժպտում են մեզ ու լավ տրամադրություն հաղորդում: Այս անգամ այցելեցինք մեր գործընկեր Achajour սրճարան և զրուցեցինք հերթափոխի պատասխանատու Էդիտա Վիրաբյանի հետ:

- Արդեն 4 տարի է աշխատում եմ Achajour-ում և շատ եմ սիրում աշխատանքս: Մեր գործն այդքան էլ բարդ չէ, որքան թվում է: Բայց դա, իհարկե կապված է նաև փորձի հետ: Achajour-ը տարբերվում է մյուս սրճարաններից, քանի որ այն հետաքրքիր է առաջին հերթին հաճախորդներով՝ նրանք յուրահատուկ են: Այս գործն ավելի եմ սիրում, քան իմ մասնագիտությունը, իսկ մասնագիտությամբ սուրդոմանկավարժ եմ:

Սուրդոմանակավարժությունը բավականին հեռու է սպասարկման ոլորտից: Այն օգնու՞մ է Ձեր աշխատանքին:

Եթե չգիտեք, ասեմ, որ սուրդոմանկավարժները նաև հոգեբաններ են, իսկ հոգեբանությունը անհրաժեշտ է այս ոլորտում: Մենք նաև կարողանում ենք կարդալ շրթունքներով ու հասկանալ ժեստերը: Իհարկե, ես դեռ այդքան էլ մասնագիտացած չեմ այդ հարցում, բայց արդեն որոշ բաներ հասկանում եմ: Երբեմն ազատ ժամանակ այստեղ դասերս եմ պատրաստում:

Իսկ կա՞ մի բան, որն անհանգստացնում է քեզ աշխատանքի ժամանակ:

Ես բարակ ձայն ունեմ, շատ հաճախ մարդկանց թվում է, թե ես շատ փոքր եմ: Դա միևնույն ժամանակ և՛ ծիծաղելի է, և՛ նյարդայնացնող:

Ունե՞ք սիրելի հաճախորդներ:

Նրանք բոլորն այնքան հետաքրքիր են, բայց կառանձնացնեմ մեկին: Մի տղա կար, ծրագրավորող էր, գալիս էր ու այնքան հետաքրքիր բաներ էր պատմում, միշտ հաճույքով լսում էի նրան:

Իսկ ի՞նչ էր նա պատվիրում:

Միշտ գալիս էր և խնձորի  թարմ հյութ էր պատվիրում: Գալիս էր ընկերուհու հետ, ընկերուհին էլ հաղարջի հյութ էր սիրում: Միշտ հետևում էի նրանց, վիճում էին մի կտոր սառույցի համար: Այնքան հետաքրքիր էր նրանց նայելը: