Իմ մանկության գրեթե բոլոր երազանքները իրականացել են: Հարցազրույց Aram MP3 հետ

Իմ մանկության գրեթե բոլոր երազանքները իրականացել են: Հարցազրույց Aram MP3 հետ

Այս անգամ «Mezzo Classic Music House»-ում հանդիպել և զրուցել ենք բոլորի կողմից շատ սիրված Արամ MP3-ի հետ: Հարցազրույցը վարել են մեր լրագրողներ Ինեսա Նադարինան և Մելինե Տոնոյանը:

R: Արդեն բարի ավանդույթ  է դարձել, որ դուք ելույթ եք ունենում «Mezzo Classic Music House»-ում և Ձեր երկրպագուներն էլ արդեն գիտեն, թե որտեղ կարող են վայելել Ձեր համերգները, իսկ դուք հիշում եք Ձեր «մշտական» հանդիսատեսին, ունեք այնպիսինները ում ամեն անգամ տեսնում եք համերգների ժամանակ ու իրենց տեսնելն էլ է բարի ավանդույթի պես մի բան դարձել:

Անկեղծ ասած այդպիսի բան նկատել եմ «Vitamin Club»-ում, երբ մեր ելույթները շատ հաճախ էին լինում, այդտեղ նկատել եմ, որ կան մարդիկ, ովքեր ամսվա մեջ քանի համերգ էլ  լինի, միևնույն է գալիս են:

  R: Ի՞նչ սպասումներ ունեք այսօրվա ելույթից, արդյոք ինչ որ անակնկալներ, նոր իմպրովիզներ սպասվու՞մ են:

 Այո, դե գիտեք, ես շատ եմ սիրում իմպրովիզներ անել: Հիմնականում համերգի ամենաթեժ պահին, երբ տաքացած  վիճակում ես, ուզում ես ինչ որ անսպասելի  քայլ անել։ Սակայն լինում են նաև դեպքեր, երբ ես  հատուկ տեղ եմ թողնում  իմպրովիզների համար, որ դահլիճի ոգևորվածությունից ոգեշնչվեմ  ու մի քիչ  շեղվեմ պլանավորած ընթացքից: Այսօր էլ բացառություն  չի՝ որոշել ենք «Not Alone»  երգը մի քիչ փոխենք, այլ կերպ  ներկայացնենք, տեսնենք հանդիսատեսը ինչպես է  դա ընդունելու:

 R: Ասում են ամենակարևորը համերգի 1-ին երգը ճիշտ  ընտրելն է: Արդյոք  այդպե՞ս է:

Այո, համերգի առաջին երգը նախուտեստի պես է, այն չպիտի լինի ականջի համար շատ ծանր կամ շատ խորիմաստ երգ, այդ երգը ուղղակի պիտի նախապատրաստի հանդիսատեսին, ուշադրությունը կենտրոնացնի դեպի բեմ, փոխանցի քո էներգետիկան: Որպես կանոն առաջին երգերը մոռացվում են, եթե իհարկե ըստ ծրագրի նախատեսված չէ, որ համերգդ հատուկ շոույով պիտի սկսվի, այս դեպքում առաջին երգերը, հակառակը, շատ տպավորիչ պիտի լինեն: 

R: Ձեր հարցազրույցներից մեկում Դուք ասել եք, որ երբ ձեր որդի՝ Առնոն 3 տարեկան էր, նա, ինչպես իր բոլոր հասակակիցները, երազում էր Spiderman-ի կարիերայի մասին։ Տարիներ անց, արդյո՞ք նրա երազանքը նույնն է մնացել, թե նա հիմա կյանքի ուրիշ ուղի է նախընտրում։

Չէէէ, նրա մոտ երազանքները շատ արագ են փոխվում, ինչպես ցանկացած երեխայի մոտ։ Օրեցօր, իր կյանքում հերոսները շատանում և փոփոխվում են։ Հիմա մենք շատ ենք սիրում, օրինակ,  Darth Vader֊-ին, մի ամսից կարող է սիրենք ուրիշին։ Նա սիրում է «հերոս»-ներին, շատ հաճախ նույնիսկ չար, Darth Vader֊ը դրա վառ օրինակն է, որ կարևոր չի բարի լինի, թե՝ չար, ինքը ուղղակի սիրում է «հերոս»-ներին։

R: Շարունակելով մանկության թեման։ Վերջերս համացանցում նշում էիք արել, որ ձեր մանկության երազանքը դարձել է իրականություն։ Արդյո՞ք, դա հանրապետության հրապարակի ժամացույցի աշխատանքը ներսից տեսնելն էր։ Եթե՝ այո, ապա կպատմեք ի՞նչ զգացողություններ ապրեցիք, երբ ձեր երազանքը իրականացավ։

Այոո, փոքր ժամանակվանից ամեն անգամ այդ կողմով անցնելիս, միշտ ուզում էի իմանալ, թե ինչպե՞ս է այն աշխատում, ի՞նչ է կատարվում այնտեղ ներսում, պատկերացնում էի իբր ներսում ինչ որ մեծ մարդիկ կան, ովքեր ժամացույցի սլաքները պտտում են: Հետո բարձրացա և oops, պարզվեց, որ այդպես չէ, ոչ մի մեծ մարդ էլ ներսում չկա /ծիծաղում է/: Իհարկե, կամաց կամաց մեծանալով, գիտակցում էի, որ այդպես չի լինելու, բայց ամեն դեպքում սպասելիքներով լի էի բարձրանում և սպասելիքներս արդարացան այնքանով, որ... արժեր, արժեր, որովհետև շատ գեղեցիկ տեսարան է բացվում վերևից մեր Հանրապետության Հրապարակի վրա: Շատ գեղեցիկ է մեր հրապարակը: 

R: Ընդհանրապես ի՞նչ արագությամբ է Արամ MP3 նոր երազանքներ գեներացնում:

Ոչ թե երազանքներ, այլ նպատակներ: Երազանքը բնորոշ է փոքր տարիքին, տարիների ընթացքում երազանքները վերածվում են նպատակների: Այ, օրինակ փոքր ժամանակ երազանք ունեի գնալ «Disney Land», հիմա այդպիսի երազանքներ չկան, չնայաաած... կան նպատակներ, որոնք երազանքին հավասար են, նպատակներ, որ գիտես, որ չես հասնի դրանց ու անունը դնում ես երազանք:

R: Ունե՞ք այնպիսի մանկության երազանք, որը դեռ չի իրականացել:

Հաստատ կան, կան այնպիսիները, որոնց մասին անիմաստ է հիմա բարձրաձայնել /ծիծաղում է/, բայց ընդհանուր առմամբ, իմ մանկության երազանքների գերակշիռ մասը կապված բեմի, երաժշտության, թատրոնի, ֆիլմի հետ՝ իրականացել են: Այսպես, որ ես ինձ բավականին հաջողակ ու հավասարակշռված եմ զգում այդ առումով:R: Ի՞նչ նոր նախագծեր, երգեր կամ պրոյեկտներ են սպասվում մոտակա ժամանակահատվածում։

Երկու օր առաջ նոր տեսահոլովակ ենք նկարել, հոկտեմբերի մեջ կլինի երգի և հոլովակի պրեմիերան, իսկ հեռուստանախագծերից «Դեպի Եվրատեսիլ» նախագիծն է, որը արդեն հոկտեմբերի 1-ին եթեր կգնա, ես այդ նախագծում ժյուրիի անդամ եմ:

R: Ձեր կարծիքով, ի՞նչ հատկանիշներ պիտի ունենա մասնակիցը, որ կարողանա 1-ին հորիզոնականը գրավել Եվրատեսիլում և արդյոք կարևոր է հենց 1-ին հորիզոնական գրավելը:

Չեմ կարող ասել, թե ինչ է պետք անել առաջին հորիզանականը զբաղեցնելու համար, բայց կարող եմ ասել, որ այդ մրցույթին մասնակցելու համար կան որոշակի չափանիշներ, որ մասնակիցը պետք է ունենա և դա բնավ էլ լավ ձայն ունենալը չէ: Նա պետք է ունենա իր հատուկ էներգետիկան, որովհետև իրականում ամեն մասնակից շատ քիչ ժամանակ է ունենում բեմի վրա և պետք է կարողանա այդ կարճ ժամանակում գրավել հանդիսատեսին: Շարմը, էներգետիկան շատ կարևոր է տվյալ դեպքում: Կան բազմաթիվ մասնակիցներ, որ արտակարգ ձայն ունեն և վերջ, նրանց ելույթները չեն տպավորվում, քանի որ նրանք չեն կարողանում հանդիսատեսի հետ էներգետիկաներով փոխանակվել:

R: Եթե հնարավորություն ունենայիք 1 օրով հայտվել ապագայում, ինչքա՞ն հեռու կուզենայիք գնալ և ի՞նչ կանեիք:

Հմմմ հետաքրքիր հարց էր, սովորաբար միշտ հարցնում ու մտածում են անցյալ գնալու մասին: Ապագա գնալու մասին չեմ մտածել: Երևի կուզենայի գնալ և իմանալ այն հարցերի ու խնդիրների պատասխանը, որոնք հիմա անորոշ կամ տհաճ են թվում, կուզենայի գնալ, տեսնել, որ ամեն ինչ լավ է լինելու ու հետ գալ բոլորին ասել, որ, ժողովու՛րդ, հանգիստ եղեք, լավ է լինելու ամեն ինչ:

R: 3 միֆ, որ լսել եք Արամ MP3 մասին և դա Ձեզ զվարճացրել կամ զայրացրել է:

Շատ շատ դեպքեր են եղել, երբ, թե՛ լավ, թե՝ վատ «նորություններ» են իմ մասին ինձ հասել, զանգել հարցրել են՝ «ավարիայի մեջ ե՞ս, բաժանվե՞լ ես, չորրորդ երեխան ես ունեցե՞լ, երկրից գնու՞մ ես, միլիո՞ն ես շահել», փչացած հեռախոսի էֆեկտով շատ լուրեր են հասել, բայց այնպիսին, որ հատուկ զայրացրել է հիմա չեմ հիշում:

R: Մեծ հաջողության հասնելու ճանապարհին արդյո՞ք եղել են այնպիսի դժվարություններ, որ թվում էր ուրիշ ելք չկա և չեք կարողանա հաղթահարել դրանք։ Ի՞նչ եք անում նման դեպքերում.

Ցանկացած մարդու մոտ էլ, անկախ իր գործունեության բնագավառից, լինում են դեպքեր, որ ինչ որ դժվարություններ են լինում: Պետք է պարզապես սառը դատել, հասկանալ, եթե խնդիրը լուծելի է, լուծել, եթե՝ ոչ, մոռանալ ու շարժվել առաջ:

 R: Մարտի 26-ին Փարիզում տեղի կունենա  "Armenian Europe Music Awards"-ը, որտեղ դուք ելույթ եք ունենալու։ Ի՞նչ  սպասումներ ունեք դրա հետ  կապված, արդյոք ի՞նչ որ ակնկալներ են լինելու։

 Այս պահին կազմակերպիչների հետ կա պայմանավորվածություն, որ ես այդ  միջոցառմանը պետք է ներկա գտնվեմ, ունենք շատ մտքեր, բայց հստակ որոշված  բան չկա, դրանք դեռ քննարկման փուլում են:

 R: Դուք պատկանում եք այն հայտնիների շարքին, ով ինչքան էլ հայտնի է  միևնույն է մնում է անմիջական: Ի՞նչ եք անում, որ «Աստղայինը» Ձեզ  չտանի:

Առաջին հարցին պատասխան չունեմ, այսինքն ինձ մոտ չկա այդպիսի «բաղադրատոմս» ինչ անել, որ աստղայինը չտանի: Դա մարդուց է, դու կամ այդպիսին ես, կամ այդպիսին չես: Իմ համար չկա այդպիսի կետ կամ սահման, որ ասեմ, այ մինչև այսքանը ես աստղ չեմ, իսկ այս գծից հետո արդեն աստղ եմ: Չէ, չկա այդպիսի բան: Մարդ կա, ում համար ամենափոքր դրդապատճառն էլ բավական է, որ ինքը փոխվի, մարդ էլ կա, որ ինչքան էլ հայտնի լինի միևնույն է չի փոխվում: Ես այդպիսին եմ: Եվ դա միայն մեր բնագավառին չի վերաբերում, օրինակ կարող է գործարար լինել, որ մի փոքր հաջողության դեպքում արդեն փոխվում է, այլ ձև է վերաբերվում իր նախկին գործընկերներին:

R: Ինչքանո՞վ է հայտնի լինելը Ձեզ խանգարում առօրյա կյանքում: 

Հիմա հիմնականում օգնում է, բայց, եթե այս հարցը տայիք այն ժամանակ, երբ նոր էի կարիերաս սկսում, կասեի, որ ավելի շատ խանգարում է: Քանի որ ակամայից կյանքիդ ռիթմը սկսում է փոխվել,  առօրյայում շատ բաներից զրկվում ես, օրինակ չես կարող երթուղային նստել կամ պարզապես աննկատ քայլել հասարակական վայերում, քաղաքում:

Հիմա ես արդեն սովորել եմ այս ռիթմին, դա ինձ չի խանգարում: Հիմա դա կարող է որդիս զգալ, ես փորձում եմ այնպես անել, որ նա չնկատի, որ ես խուսափում եմ շատ տեղեր գնալուց, չգիտեմ որքանով է դա ինձ հաջողվում: Կարծում եմ հետագայում ինքը դա ավելի շատ է զգալու, քան՝ ես: Այ, մյուս անգամ իրենից հարցազրույց վերցրեք ու hարցրեք: 

R: Հաստատ քաղաքում ունեք Ձեր սիրելի վայրերը, որտեղ սիրում եք այցելել, դրանք այցելելուց առաջ սեղանը նախորոք ամրագրում եք, թե ուղղակի այցելում եք:

Դա կախված է նրանից, թե ուր եմ գնում: Վայրեր կան, որ գիտեմ հաստատ տեղ չի լինելու ու նախորոք սեղան եմ ամրագրում, նոր գնում, կան վայրեր որոնց տերերը իմ ընկերներն են և ես ուղղակի զանգում ու տեղ եմ ամրագրում գնալուց առաջ: Լինում են նաև սպոնտան պահեր, երբ ուղղակի քայլեիս մի տեղ ենք մտնում և այստեղ ինձ օգնության է գալիս իմ հայտնի լինելը ու իմ համար արագ ազատ տեղ է գտնվում: 

R: Իսկ եղե՞լ է դեպք, որ գնացել եք ու այդ պահին ազատ տեղ չի եղել կամ Ձեր նախընտրած  սեղանը զբաղված է եղել:

Շաաատ, շատ է եղել, ես էլ չեմ սիրում, որ ասում են՝ սպասե՛ք, դա նույնն է, որ ասեն գնա, ուղղակի քաղաքավարությունից ելնելով, ասում են՝ սպասեք: Այ նման դեպքերից հետո եմ հասկացել, որ նախորոք ամրագրելը ճիշտ որոշում է:

R: Իսկ հիմա, քանի որ արդեն գիտեք, որ ՀՀ-ում կա սեղանների օnline ամրագրման համակարգ, կօգտվե՞ք մեր ծառայությունից, խորհուրդ կտա՞ք Ձեր ընկերներին ու երկրպագուներին, որ մի տեղ գնալուց առաջ սեղան ամրագրեն նոր գնան: Դա բոլորովին անվճար է, արագ, հեշտ ու ապահով: Ընդամենը այցելում եք reservin.am, ընտրում Ձեր նախընտրած վայրը, նշում ժամը և սեղմում ամրագրման կոճակը, մի քանի րոպեից ստանում եք ամրագրման հաստատումը:

Այո, անպայման կփորձեմ հիշել, կօգտվեմ Ձեր ծառայությունից ու դրանից հետո նոր մնացածին կասեմ:

2771

(*). նշվածները պարտադիր են լրացման

 

Տվյալներ չկան
^ Վեր