#բարևուրբաթ. սև ուրբաթ

Հեղինակ՝ Անի Սմբատի

Այսօր սև ուրբաթ է՝ ուրբաթ 13, շատերի համար այս համադրությունը անհաջողության գրավական է, սակայն առաջարկում եմ այս համադրությանը նայել ավելի դրական կողմից։ Ձեզ կներկայացնեմ այսօր քաղաքում տեղի ունեցող մի քանի հրաշալի միջոցառումներ, որոնք կլցնեն Ձեր օրը դրական լիցքերով: 

«Սարգիս Մուրադյան» պատկերասրահում 17:00-ին կբացվի Հենրիկ Սիրավյանի անհատական ցուցահանդեսը։ Կցուցադրվեն Սիրավյանի տարբեր տարիների աշխատանքները՝ սկսած վաղ շրջանի գործերից մինչև ուշ շրջանը, ընդ որում՝ կլինեն աշխատանքներ, որոնք կցուցադրվեն առաջին անգամ: Ցուցահանդեսը բաց կլինի մինչև հունիսի 15-ը:

ԹՈՒՄՈ-յի կինոուրբաթների մայիսը` Կաննի ամիս է: Այս ուրբաթ ցուցադրվելու է Քվենտին Տարանտինոյի կուլտային «Քրեական ընթերցվածք» ֆիլմը: Ցուցադրությունն անվճար է և բաց հանրության համար, ֆիլմը կցուցադրվի անգլերեն՝ ժամը 19:45-ին:

Իսկ եթե արդեն խմելու շորերով եք դուրս եկել տանից/աշխատավայրից, այստեղ էլ տարբերակները քիչ չեն: 

Անդերգրաունդ հավաքույթների մշտական այցելուները հավանաբար գիտեն Home 45-ի կամ Art Studio 45-ի մասին, որն ընդունված է համարել «Հակահարված» արտ խմբի արվեստանոցը։ Ուրբաթ 13-ին՝ ժամը 19:00-ին, արվեստանոցում տեղի կունենա վերջին հավաքույթը, որից հետո «Հակահարվածի տարածքը կլինի ամենուր»։ Հասցեն՝ Եզնիկ Կողբացի 45:

Իսկական սև ուրբաթ կարող եք անցկացնել Leo 52 Club-ում ժամը 21:00-ից։ Դրես կոդը՝ լրիվ սև, մուտքը՝ 2000 դրամ, իսկ երաժշտությունը կապահովի գրեթե միշտ սևազգեստ Dj Serjo-ն։

Բոլոր նրանք, ովքեր կարոտել են երբեմնի Astral ակումբը, նույն ինքը՝ Giza-ն, ապա՝ London Bar-ը, և վերջապես Opium Club-ը, այս ուրբաթ կկարողանան ոչ միայն կարոտն առնել, այլ միևնույն ժամանակ ևս մեկ նոր վայր բացահայտել իրենց համար։ Սայաթ-Նովա 2/9 հասցեում ժամը 21:00-ին տեղի կունենա Downtown Club-ի բացումը, որը կշարունակվի նաև հաջորդ օրը՝ մայիսի 14-ին։ Բացման երկու օրերին դիջեյի վահանակից իրենց երաժշտությունը կտարածեն դիջեյներ Supacooks-ը, Արամ Չախոյան-ը, Serjo-ն, Play-ը, Karo Pillz-ը, Guevo-ն, Teo-ն, Hayk Solar & Arni Rock-ը, Alen Hertz-ը, Donz-ը, Lucy Sowa-ն, Leo-ն, Mike J-ն, X40-ը, Mad & Nancy-ին: Այս ամենից բացի արժի նաև նկատի ունենալ, որ մուտքը միայն 18+ անձանց համար է, իսկ ֆեյս քոնթրոլն առանց լավ տրամադրության ու էներգիայի դժվար թե անցնեք։Կազմակերպիչները խոստանում են, որ սա տարվա բացումների բացումն է լինելու։

ՈՒԻՔԵՆԴ

Անհամբեր սպասում եք, թե ե՞րբ եք նորից անցում կատարելու բացօթյա ժամանցին։ El Sky Bar-ը շաբաթ օրը՝ ժամը 19:00-ից կբացի իր դռները բոլոր նրանց համար, ովքեր ցանկանում են վայելել քաղաքի գեղեցիկ տեսարանը։

Իսկ Wild West-ում այս շաբաթ օրը ակուստիկ երեկո է. վոկալ կատարումներով հանդես կգա Սրբուհի Հովհաննիսյանը՝ Ռոբերտ Խուդավերդյանի կիթառի նվագակցությամբ: Մուտքը՝ 1000 դրամ:

#բարիուրբաթ