Հեղինակ՝ Աննա Գևորգյան
Գրեթե յուրաքանչյուր ընտանիքում ամենասիրված և ավանդական ճաշատեսակներից մեկն է հավը ջեռոցում, որքան էլ պարզ ու պրիմիտիվ կարող է թվալ այն, միևնույն ժամանակ յուրաքանչյուր տան տիկին ունի պատրաստման հենց իր տարբերակը։ Է՛լ լցոնում են, է՛լ խնձորապատում, է՛լ շշին հագցնում խեղճ հավին, ծեծում, տրորում, բաստուրմա դնում և ինչ էլ որ չանեն միևնույնն է հավը ջեռոցում աննկարագրելի համեղ է, միայն թե համեմունքը չպակասի։
Ուզում եմ կիսվել ջեռոցում եփված հավի իմ ամենասիրած տարբերակով։
4 բաժին Լավաշապատ հավ ջեռոցում պատրաստելու համար մեզ անհրաժեշտ են հետևյալ բաղադրիչները՝
հավի բուդ – 2 մեծ կտոր - 1000դր
լավաշ – 2 հատ - 200դր
կարտոֆիլ – 4 հատ - 150դր
թթվասեր – 1 միջին տուփ - 300դր
Ընդհանուր՝ 1650 դրամ։
Պատրաստման ժամանակը՝ 30 րոպե։
Հավը կարող եք վերցնել ամբողջական, կամ միայն ձեր սիրած հատվածները, այս անգամ ես վերցրել եմ ամբողջական 2 բուդ և յուրաքանչյուրը բաժանել 2 մասի, կարտոֆիլները նույնպես կիսել երկու մասի, թասիկի մեջ լցնել ամբողջը, համեմել ըստ ճաշակի, վրան լցնել թթվասերը և խառնել։
Թավայի վրա երկու շերտով լավաշ փռել, վրան շարել կարտոֆիլն ու հավը, դնել նախապես 180 աստիճան տաքացրած ջեռոցի մեջ մոտ 25 րոպե։ Եթե ուզում եք հավը արագ եփվի և ոսկոռի շուրջը կարմիր չմնա, յուրաքանչյուր կտորի վրա մի քանի տեղ ծակեր արեք դանակով։ Համեմունքներից նախընտրելի է օգտագործել վրացական խառնուրդներ, օր՝ չոր աջիկա, որը ցանկացած ուտեստին տալիս է անմոռանալի համ, այդ համեմունքը առկա է իմ պատրաստած ճաշատեսակների 90%-ի մեջ։ Եթե վրացական խոհանոցի սիրահար եք, խորհուրդ եմ տալիս անպայման ունենալ չոր աջիկա ձեռքի տակ, երաշխավորում եմ, որ գոհ կլինեք և դուք և տան բոլոր անդամները, միայն թե մի նախազգուշացում՝ համեմունքը մեծ քանակությամբ չաման է պարունակում եթե հոտի հետ խնդիր ունեք խորհուրդ չեմ տա չարաշահել։
Հավի յուղն ու համեմած թթվասերը ծորում են լավաշի վրա և աննկարագրելի համ տալիս լավաշին, իսկ ծայրերը մնում են չոր ու խրթխռթան, հիմնականում ում հյուրասիրել եմ այս ճաշատեսակը, բոլորը վերջում կռվել են, թե ում է բաժին հասնելու լավաշի վերջին կտորը:
