Հապճեպ ու սննդարար Աննա Գևորգյանի հետ

Հեղինակ՝ Աննա Գևորգյան

Կոնֆետներ, շոկոլադներ, թխվածքներ, դեսերտներ սիրում են բոլորը, ով էլ ժխտում է, կամ խաբում է, կամ էլ իր քիմքին հաճո քաղցրավենիքը դեռ չի կերել։ Աղի սննդի սիրահար լինելով հանդերձ համեղ և ճաշակով քաղցրավենիքից երբևէ հրաժարվել չեմ կարող, այն նման է տոնի՝ ուզում ես վերապրել այդ հաճույքը նորից ու նորից: Այսօր ձեզ կներկայացնեմ շատ համեղ դեսերտի բաղադրատոմս, որն այնքան հեշտ է պատրաստել, որ նույնիսկ ձեր երեխաները կարող են այն հեշտությամբ պատրաստել և հյուրասիրել ընկերներին: Դեսերտն ունի երկու տարբերակ մեկը պատրաստվում է կակաոյով, մյուսը՝ լուծվող սուրճով: Բնականաբար կակաոն առաջարկում եմ երեխաների համար, իսկ սուրճը այն մեծահասակների, ովքեր սիրում են և խմում են սուրճ: Իմ սուբյեկտիվ կարծիքով, երկրորդ տարբերակն անհամեմատ յուրահատուկ համ ունի...

Բոլորս էլ ունենում ենք անսպասելի հյուրեր և նրանց գոհ ու բավարարված ճանապարհելու համար առաջարկում եմ գրել, կամ մտապահել աշխարհի ամենահեշտ ու հասանելի դեսերտի բաղադրատոմսը։ Այն շատ արագ է պատրաստվում և չի պահանջում ոչ մի հմտություն։ Կարելի է միշտ պահել ձեռքի տակ այս բաղադրիչները և անհրաժեշտության դեպքում մի քանի րոպեում պատրաստել ու մատուցել այն ցանկացած հյուրերի։

3 բաժին դեսերտի համար անհրաժեշտ է ՝

2-3 հատ վանիլային բրիկետ /մոտ 150գր/ - 300 դր

6 թ/գդ լուծվող սուրճ /կամ թանձր տաք շոկոլադ/ - 200 դր

200 գր թխվածքաբլիթ - 250դր

6-9 թ/գդ գիլասի մուրաբա -100 դր

Նախապես պատրաստում ենք շատ թանձր սուրճը՝ կես բաժակ ջուր, 6 թ/գդ լուծվող սուրճ։

Վերցնում ենք դեսերտի համար նախատեսված 3 հատ տարա, կամ ցանկացած թափանցիկ միանման բաժակներ, յուրաքանչյուր բաժակի մեջ լցնում ենք երկուական ոչ շատ մանր փշրած թխվածքաբլիթ, վրայից ավելացնում մոտ 50գր պաղպաղակ, որից հետո սուրճը աչքաչափով հավասարաչափ բաշխում 3 բաժակների մեջ՝ յուրաքնչյուրի վրա լցնում 2-3 գդալ գիլասի մուրաբա և մատուցում։

Պատրաստման տևողությունը 3-5 րոպե։ Ծախսը՝ 850 դր / 3 բաժին։