Ապրիլի 16–ին քրիստոնյա աշխարհը, այդ թվում նաև Հայ Առաքելական եկեղեցին նշում է Զատիկը: Հայերն այդ օրն ասոցացնում են հիմնականում ներկված ձվերի և տոնական տրամադրության հետ: Reservin-ը հավաքեց իր ճամպրուկներն ու մեկնեց ճանապարհորդության՝ բացահայտելու ամենահետաքրքիր և յուրահատուկ զատկային ուտելիքները աշխարհի տարբեր երկրներում:
Մոլդովա: Մոլդովայում նույնպես պահպանում են Զատիկին «ձու կռվացնելու» ավանդույթը: Նրանք հիմնականում ներկում են ձվերը կարմիր գույնով, ինչը խորհրդանշում է Հիսուսի արյունը: Մոլդովացիների սեղանի անբաժան մասն է կազմում «Պասկա»-ն: Այն քաղցր հաց է, որը լցոնված է գառան մսով:
Գերմանիա: Գերմանիայում Զատիկին միմյանց նվիրում են «Օսթերհեյս»` Զատիկի նապաստակ: Նրանք եկեղեցի են տանում «Գեբակենե Օստեղլամմին» կոչվող զամբյուղը՝ այն օրհնելու համար: Զամբյուղի մեջ դնում են գառան միս, որը պատրաստում են հենց գառան կերպարանքով:
Իտալիա: Իտալիայի տարբեր հատվածներում Զատիկի ավանդույթները տարբեր են: Օրինակ՝ Պանիկալե շրջանի Ումբրիան գյուղաքաղաքում, տղամարդիկ խաղում են «Ռուզզոլոն», որի ընթացքում պատերի կողքով գլորում են պանրի մեծ շրջանակներ: Իսկ ավանդական ուտելիքներից համարվում է գառան կամ այծի միսը: Այստեղ նաև միմյանց են նվիրում շոկոլադե ձու և աղավնու կերպարով «Պանետոնն Քոլոմբա»:
Հունգարիա: Հունգարացիների Զատիկը կարող է հիշեցնել մեզ Վարդավառը: Նախկինում Զատիկի օրը տղամարդիկ ջուր են լցրել կանանց վրա: Ժամանակի ընթացքում ավանդույթը փոփոխությունների է ենթարկվել և այժմ ջրի փոխարեն, տղամարդիկ կանանց մազերին ցողում են օծանելիք: Հունգարիայում Զատիկի սեղանի անբաժան մասն են կազմում ապխտած խոզապուխտը, աղացած միսը, ձուն և թթու ծովաբողկը:
Նորվեգիա: Պարզվում է, նորվեգացիները բավականին տարօրինակ ազգ են: Նրանք Զատիկին խաղում են «Պասկեկրիմ», որի ընթացքում բացահայտում են հանցագործությունները: Ասում են, այստեղ հետաքրիքր ու թաքնված պատմություններ այդ օրն ունենում են անգամ կաթի արկղերը: Ուտելիքների հարցում նույնպես չեն զլացել տարբերվել: Այստեղ ուտում են նարինջ, մի բան, որը չի աճում նրանց երկրում: Նարինջն ուտում են կամ կտրատված, թխվածքի տեսքով:
Դանիա: Դանիացիները ի տարբերություն այլ քրիստոնյա երկրների, գինու փոխարեն Զատիկին խմում են գարեջուր: Զատիկի գարեջուրն անվանում են «Պասկոլ», այն սովորաբար ավելի թունդ է լինում, քան սովորական գարեջուրը:
Պորտուգալիա: Տեղափոխվենք լատինական երկրներ: Այստեղ ուտում են «ֆոլար» կարկանդակը, որը հիմնականում մատուցում են նախաճաշին: Պորտուգալիայում Զատիկի օրը հիմնականում ուտում են մսային ուտեստներ: Ամենահայտնին համարվում է «Լեիտաո» խոզը՝ համեմված կարտոֆիլով և այլ բանջարեղեններով:
Մեքսիկա: Մարիաչիների և տակոների երկրում գրեթե չկա այնպիսի ուտեստ, որ կծու չլինի: Զատիկի ուտելիքներն էլ բացառություն չեն: Մեքսիկացիներն ուտում են «Կապիրոտադա» ` կծու հաց: Այն լցոնում են ՝ դարչինի, մեխակի, պանրի և չամչի միջուկով:
Բրազիլիա: Էկզոտիկ Բրազիլիայում Զատիկի օրն ուտում են «Պակոկա դե Ամենդոիմ»: Այս ուտեստը պատրաստում են գետնանուշով, շաքարավազով և Կասսավա ծառի այլուրով:
Պարագվայ: Հարավամերիկյան այս պետությունում Զատիկի օրը շատ կարևոր է ուտել շոկոլադե ձու: Իսկ «Չիպա»-ն պատրաստում և կիսում են հարևանների հետ: Դրանք պանրային ռուլետներ են:
Հ.Գ. Հարևանների հետ կիսելու գաղափարը հայերին կարող է ծանոթ լինել: Այն նման է մատաղի արարողությանը, երբ հարևաններին բաժանում են հավի կամ գառան միս:
