Exclusive հարցազրույց բլյուզի լեգենդ Lil Jimmy Reed հետ

Exclusive հարցազրույց բլյուզի լեգենդ Lil Jimmy Reed հետ

Reservin Armenia-ն շարունակում է Ձեզ ներկայացնել քաղաքում ելույթ ունեցող ամենավառ երաժիշտների հարցազրույցների շարքը։ Այս անգամ մեր լրագրողներ Մարի Սևոյանն ու Մելինե Տոնոյանը հանդիպել և զրուցել են բլյուզի կենդանի լեգենդ Lil Jimmy Reed-ի հետ, ով Հայաստանում էր Kami Music Club-ի հրավերով։ Lil Jimmy Reed-ը /իրական անունը Leon Atkins/ համարվում է ամերիկյան էլեկտրիկ բլյուզի ամենավառ և ամենավերջին ներկայացուցիչներից մեկը։ Նրա ստեղծագործություններով ոգեշնչվել են տվյալ ժամանակահատվածի գրեթե բոլոր երաժիշտները սկսած Тhe Rolling Stones-ից մինչև The Beatles: Դեռ երիտասարդ տարիներին, չունենալով երաժշտական կրթություն, նա նույն բեմի վրա ելույթ է ունեցել այնպիսի լեգենդների հետ, ինչպիսիք են B.B. King-ն և Bobby Blue Bland-ը։  Тhe Alabama Blue Society-ն 1995-ին նրան ներկայացրել է Тhe Alabama Blue Treasure Award-ին, նա ճանաչվել է «Տարվա լավագույն բլյուզ հարմոն նվագող» հայտնի West Coast Blues Hall of Fame-ի կողմից, նրա անունը տեղադրվել է պատվավոր Alabama Blues Hall of Fame-ում։

Ստորև ներկայացնում ենք Հայաստան այցի շրջանակում Reservin Armenia-ին տված էքսկլյուզիվ հարցազրույցը;

Reservin,- Բարի գալուստ Հայաստան։ Ի՞նչ տպավորություններ ունեք մեր երկրից։

Jimmy,- Շնորհակալություն։ Սա իմ առաջին այցն է Հայաստան և Երևան, թեև շատ կարճ եմ մնալու այստեղ, սակայն արդեն վստահորեն կարող եմ ասել, որ տպավորված եմ Ձեր խոհանոցով և այս օրերին փորձում եմ ուտել հնարավորինս շատ։ /Ծիծաղում է/

Reservin։ Ինչպե՞ս ստացվեց, որ լինելով ծնունդով Լուիզիանայի փոքրիկ Harwood քաղաքից, դարձաք լեգենդար երաժիշտ, ով շրջագայել է ամբողջ աշխարհով։ Ի՞նչն է հանդիսացել Ձեր հաջողության գրավականը և արդյոք երբևէ մտածել եք, որ մի օր լեգենդար երաժիշտ կլինեք։

Jimmy,- Ես հատուկ ոչինչ չեմ արել այս ամենին հասնելու համար, մի օր ես  սկսեցի բլյուզ նվագել և ահա այսօր արդեն այստեղ եմ։ Ես լեգենդար չեմ, ես երաժիշտ եմ, ով սիրում է իր գործը։ Ես տարբեր տեղերում եմ ելույթ ունեցել, ակումբներում, մեծ բեմերում, մանկապարտեզներում։ /Ծիծաղելով/ Սակայն իրական հաջողությունը եկավ, երբ մի օր իրական Jimmy Reed-ը եկավ մեր քաղաք։ Նա այնքան էր խմել, որ ի վիճակի չէր ելույթ ունենալ։ Քանի որ մեր ակումբում գիտեին, որ ես կարողանում եմ նրան ընդօրինակել, ինձ առաջարկեցին բեմի ետևից նրա փոխարեն ելույթ ունենալ նրա խմբի հետ։  Եվ ես դա արեցի։ Հանդիսատեսին դուր եկավ համերգը, ոչ ոք տարբերություն չէր զգացել: Նա սովորություն ուներ փչելու խոսափողի մեջ և նվագելու, ես էլ անում էի նույնը: Ես փրկեցի նրա ելույթը։ Դրանից հետո ես նրան այլևս երբեք չեմ տեսել, բայց այդ օրը փոխեց իմ կյանքը ու իրական հաջողությունները սկսեցին դրանից հետո։ Ես երբեք չեմ մոռանա այդ օրը, քանի որ իմ երաժշտական իրական կարիերան սկսեց հենց այդ օրը։

Reservin,- Եթե հնարավորություն ունենայիք Ձեր անցյալում ինչ որ բան փոխելու, ի՞նչը կփոխեիք։

Lil Jimmy Reed,- Հմմ, այո, ես ամենայն հավանականությամբ չէի ամուսնանա, /ծիծաղալով/, իսկ եթե ավելի լուրջ, ես ոչինչ էլ չէի փոխի, ես լավ կյանք եմ ապրել և վայելել եմ ամեն պահը: Չնայած մի փոքր բան կփոխեի։ Ես մի փոքր խորհրդանշական նվեր էի ստացել երիտասարդ ժամանակ իմ տաղանդը գնահատողներից մեկից, դա ծխախոտի տուփից պատրաստած փոքր կիթար էր, որը արտացոլում էր տաղանդավոր մարդու և երաժշտության միջև փոխկապվածությունը։  Ես կորցրել եմ այն, անկեղծ ասած, չեմ էլ հիշում, թե երբ եմ կորցրել, ժամանակի հետ մաշվել, կորել գնացել է։ Լավ կլիներ, որ չկորցնեի։

Reservin,- Դուք երաժշտական կրթություն չունեք, սակայն փոխարենը ունեք տաղանդ։ Ե՞րբ զգացիք դա Ձեր մեջ։

 Lil Jimmy Reed,- Մի օր հայրս տուն էր վերադարձել որոշ գումարով: Նա ինձ, քրոջս և եղբայրներիս հարցրեց, թե ի՞նչ  կցանկանայինք նվեր ստանալ: Նրանք գնդակ և տիկնիկ ուզեցին, իսկ ինձ ներքին ինչ որ անբացատրելի ուժ  ստիպեց ասել, որ կիթառ եմ ուզում: Այդ օրվանից սկսեցի նվագել:

Reservin,- Դուք 20 տարի ծառայել եք բանակում: Արդյո՞ք դա ձեզ փոխել է որպես մարդ: Ինչպիսի՞ ազդեցություն է թողել բանակը Ձեր ստեղծագործական կյանքի վրա:

Lil Jimmy Reed,- Բանակը ինձ ընդհանրապես չի վնասել, նույնիսկ օգնել է: Ես միայն 11 տարի ծառայել եմ Ալյասկայում, որտեղ գիշեր ցերեկ նվագել եմ և արդյունքում ավելի արհեստավարժ դարձել: Դա շատ լավ դպրոց է եղել իմ համար։

 

Reservin,-  Արդյո՞ք բլյուզը ձեզ հետ է տանում անցյալ: Հիշողություններ այցելու՞մ են երգելու ժամանակ:

Lil Jimmy Reed,- Այո, երբ բլյուզ եմ կատարում հիշողությունների շարան է անցնում: Երգի ընթացքում ես սիրում եմ իջնել բեմից ու քայլել հանդիսատեսի միջով, դա օգնում է, որ մենք երկուստեք բացվենք, անկեղծանանք և համերգն էլ ավելի ինտերակտիվ լինի։ Իսկ դուք սիրու՞մ եք իմ բլյուզը։

Reservin,- Այո, այն ջազային է և կյանքով լի:

Lil Jimmy Reed,- դե ուրեմն անպայման կմնաք ու կլսեք իմ այսօրվա ելույթը։

Reservin,- Այո, իհարկե, մեծ սիրով: Ի՞նչ ակնկալիքներ ունեք այսօրվա համերգից: Անակնկալներ ունե՞ք:

Lil Jimmy Reed,- Ակնկալում եմ լեփ լեցուն դահլիճ, իսկ անակնկալը ես ինքս եմ:

 Reservin,- Անչափ շնորհակալ ենք հետաքրքիր հարցազրույցի համար: Մաղթում ենք բոլորիս հաճելի երեկո։

1423

(*). նշվածները պարտադիր են լրացման

 

Տվյալներ չկան
^ Վեր