Հեղինակ՝ Անգել Դայան
Կարտոֆիլ ֆրին ֆասթֆուդի սիրահարների ամենանախընտրելի ուտեստներից մեկն է։ Եթե մի կողմ դնենք այն չարաշահելու հետևանքով մի քանի ավել կիլոգրամ ձեռք բերելու մեծ հավանականությունը, ապա այն հանդիսանում է հիանալի և համեղ ուտեստ։ Իհարկե, սա վերաբերում է լավ պատրաստված ֆրիին:
Երևանում ֆրի առաջարկում են գրեթե բոլոր սրճարաններում և արագ սննդի կետերում։ Բայց նրանցից մի քանիսում այն առանձնապես չի փայլում ո՛չ համով, ո՛չ արտաքին տեսքով։ Չունենալով գիրանալու հակում, հաճախ եմ ինձ թույլ տալիս, համտեսել արագ սննդի կետերում պատրաստված ֆրի։ Ու այժմ Ձեզ կներկայացնեմ քաղաքում համտեսած լավագույն ֆրիերը:
Թերևս սկսենք ամենալավից։ Առաջին հորիզոնականում TMS Burger-ն է։ Այստեղ առաջարկում են երկու տեսակի ֆրի՝ սովորական և գյուղական ձևով պատրաստված։ Կարտոֆիլը պատրաստում են յուրահատուկ համեմունքներով (այդ յուրահատուկ համը ուրիշ ոչ մի տեղ չեք զգա), և բացի դրանից, մատուցում են շատ հետաքրքիր երկաթե պատվանդանի վրա դրած թղթե ծրարիկի մեջ։ Երևանում փորձած ամենահամեղ ֆրին հենց այստեղ է։ Աշխատողներն այստեղ շատ բարեհամբույր են, և որքան էլ տարածքը փոքր է, այստեղ ձեզ հաստատ վատ չեք զգա։ Նամանավանդ, որ աղմկոտ չէ, և ոչ շատ բարձր հնչող երաժշտությունն էլ հաճելի է և ոչ պարտադրող։
Երկրորդ հորիզոնականում Mr. Gyros-ն է։ Հունական բաղադրատոմսերով պատրաստված ուտեստեները հաճելիորեն կզարմացնեն Ձեզ։ Այստեղ համեղ է ամեն ինչ։ Սկսած շաուրմայից, որը մատուցվում է հունական լոշիկի մեջ և բազմաթիվ լրացուցիչ բաղադրիչներով, վերջացրած ֆրիով, որը պարտադիր պետք է փորձել սոուսներից մեկի հետ։ Անպայման վերցրեք պանրով սոուսը, այն հիանալի կերպով լրացնում է ֆրիի համը։
Tashir Pizza-ում ֆրին մատուցում են ոչ թե թղթե ծրարով, այլ ափսեի մեջ լցված։ Առանձնահատուկ ոչ մի բան չկա, բայց համեղ է և հագեցնող։ Ինչպես նաև շատ մատչելի։
Բոլորի կողմից շատ սիրված Թումանյանի շաուրմայում ևս կարող եք փորձել ֆրի և գոհ մնալ։ Ուղղակի մինչև հերթը հասնի Ձեզ, դուք կհասցնեք թան խմել, ուտել երկու շաուրմա, պաղպաղակ, դե ֆրին էլ կարող եք աղանդերի տեղ փողոցում քայլելով ուտել՝ գրգռելով անցորդների ախորժակը։
Անդրադարձ կատարեմ ամենավատ ֆրիին: Դա Արտաշի մոտ համտեսած ֆրին է։ Երբեք մի պատվիրեք այստեղ ֆրի, եթե վստահ չեք, որ պատվերը ստանալուց հետո կկարողանաք կյանքում նորից ֆրի փորձել։ Այնպիսի տպավորություն է, որ կարտոֆիլը պատրաստվում է բազմիցս օգտագործված ձեթի մեջ, ունի անհրապույր և ախորժակը փակող տեսք, և շատ նման է իրար կպած մակարոնի։ Սահմանված չափ չկա, ափսեում ֆրիի քանակը որոշում է ֆրին լցնող աշխատակիցը՝ տրամադրությունից ելնելով։ Այս վայրը մշտապես լի է մարդկանցով, նամանավանդ արական սեռի ներկայացուցիչներով, որոնք շատ են և աղմկոտ։
Եվ վերջում խորհուրդ իմ կողմից՝ երես տվեք ձեզ, փորձեք այն ամենն, ինչ համեղ է և ախորժալի։ Չմոռանանք, որ ապրում ենք մեկ անգամ, և ոչինչ, անգամ ամենախիստ դիետան չպետք է ձեզ ստիպի որպեսզի հրաժարվեք համով ուտեստ ճաշակելու հաճույքից։ Բարի ախորժակ:
