Գաստրո-սինեմա. ախորժաբեր կինեմատոգրաֆի հետքերով...

Գաստրո-սինեմա. ախորժաբեր կինեմատոգրաֆի հետքերով...

Կինոաշխարհն ու գաստրո-իրականությունն այլևս անհնար է տարանջատել իրարից․ անհերքելի փաստ է։ Պատճառն այն չէ, որ կինոյի հերոսները մեզ նման մարդիկ են՝ մսից ու արյունից, քաղցը հագեցնելու կարիք ունեն։ Դրան գումարենք նաև կինոթատրոնի անբաժանելի մաս կազմող ադի-բուդին ու կոլան։ Ստացվում է, որ կինո+սնունդ կապն առավել քան ամուր է և ուղիղ համեմատական։ Ինչևիցէ, մի կողմ դնենք վերոնշյալն ու խոսենք վաղուց արդեն առանձին ժանր դարձած գաստրո-սինեմայի մասին։ Բոլորս էլ երազում ենք գեթ մի անգամ մուտք գործել ռեստորանային աշխարհի կուլիսներից ներս, հետևել խոհարարների ու սպասարկման մասնագետների քրտնաջան ու հաճախ անտեսանելի աշխատանքին։ Կինոն ընձեռում է այդ հնարավորությունը: Reservin-ը ներկայացնում է գաստրոնոմիայի  մասին 5 լավագույն կինոպատումները։ Խնդրանք․ մինչ ֆիլմերը դիտելը՝ մի լավ սնվե՛ք:



1․ Ջուլին և Ջուլիան. երջանկության բաղադրատոմսը, ԱՄՆ, 2009 թ․

Ռեժ.` Նորա Էֆրոն

Դերերում՝ Մերիլ Ստրիպ, Էմի Ադամս, Ստենլի Տուչչի

Գաստրո կինոնկարում միանգամից երկու համեղ նովելներ են հյուսվել: Առաջին սյուժետային գիծը կենտրոնացած է Ջուլիա Չայլդի (Մերիլ Ստրիպ) շուրջ: Դիվանագետի տիկնոջ միապաղաղ կյանքը փոխվում է այն բանից հետո, երբ ընդունվում է խոհարական դպրոց, տարիների ընթացքում վերածվում այդ գործի գիտակի: Ձեռք բերված գիտելիքներով Ջուլիան որոշում է աղախին պահելու հնարավորություն չունեցող տան տիկնանց համար ֆրանսիական խոհանոցին նվիրված բաղադրատոմսերի գիրք գրել։ Երկրորդ սյուժետային գիծը պտտվում է զանգերի կենտրոնի օպերատոր Ջուլի Պաուելլի (Էմի Ադամս) շուրջ։  Ճակատագրի բերումով, տասնյակ տարիներ անց, Ջուլին հայտնաբերում է Ջուլիա Չայլդի գրքի հրատարակությունը: Գիտակցելով, որ անփութ բնավորությունը թույլ չի տալիս աղջկան որևէ ձեռնարկ ավարտին հասցնել, նա իր առջև նպատակ է դնում 365 օրում պատրաստել գրքում զետեղված բոլոր 524 ուտեստները. խոհարարական արվեստում իր հաղթանակների ու պարտությունների մասին հերոսուհին նկարագրում է իր անձնական բլոգում: 

Հարած սերուցքով ազնվամորու ժելե, ֆարշավորված բադ առանց ոսկորների, հորթի միս գինու մեջ. այս ամենը Ջուլին կպատրաստի Ձեր աչքի առաջ: Ի դեպ, Ջուլիա Չայլդն իրական կերպար է. ամբողջ աշխարհի տնային տնտեսուհիներն առ այսօր պատրաստում են Չայլդի բաղադրատոմսերով: 



2. Շեֆ, Ֆրանսիա, Իսպանիա, 2012 թ․

Ռեժ՝ Դանիել Կոէն

Դերերում՝ Ժան Ռենո, Միկաել Յուն, Ռաֆաել Ագոգե, Ժյուլյեն Բուասելյե

Անուշահամ գաստրոնոմիկ կատակերգություն է։ Երիտասարդ, սկսնակ խոհարարը փորձում է ամեն գնով փոխել տարիքն առած ու մեծ փորձառություն ունեցող աստղային շեֆի ապրելակերպն ու նախասիրությունները։ Երիտասարդն իր համառության ու պնդաճակատ բնավորության շնորհիվ վերածվում է խոհանոցի իսկական թագավորի։ 



3. Կյանքի համը, ԱՄՆ, 2007 թ․

Ռեժ.՝ Սկոտ Հիքս

Դերերում՝ Քետրին Զետա Ջոնս, Աարոն Էքհարթ, Էբիգեյլ Բրեսլին 

Գերմանական «Անզուգական Մարթա» կատակերգության հոլիվուդյան, առավել փայլուն ռիմեյքն է։ Ռեժիսոր Հիքսին հաջողվել է կինոժապավենում կրկնապատկել ռեստորանային շունչը։ Մեր աչքի առաջ ուրվագծվում է դժվարին մի իրավիճակ, երբ խոհարարը ստիպված է միաժամանակ ահռելի քանակությամբ ուտեստներ պատրաստել և իհարկե չմոռանալ սեփական անձի մասին։ Բարդ ու հակասական աշխարհ է խոհանոցը․ իր խինդ ու ծիծաղով, ինտրիգներով, մրցակցությամբ, համի ներդաշնակությանը հասնելու մոլուցքով, մի խոսքով կյանք, որում ընտրյալներին է բախտ վիճակվում դիմակայել ու հասնել մեծ բարձունքների։



4․«Սիրահարված խոհարարի 1001 բաղադրատոմսը», Ֆրանսիա, 1996 թ․

Ռեժ.՝ Նանա Ջորջաձե

Դերերում՝ Պիեռ Ռիշար, Միշլին Պրել, Նինո Կիրտաձե, Ժան-Իվ Գոտյե 

Բոլոր ժամանակների հրապուրիչ ձախողակը, «Խաղալիքը» հուզումնառատ կատակերգության աստղ՝ անկրկնելի Պիեռ Ռիշարի հերոսին, կյանքի խորդուբորդ ճանապարհները տանում են լարված ժամանակներ ապրող Վրաստան։ Ֆրանսիացի խոհարարը, որին մարմնավորում է խուճուճամազ կատակերգուն, համոզված էր, որ այդ չարաբաստիկ ուղևորությունն ընդամենը մի քանի օր կտևի։ Սակայն ճակատագիրը նրա համար մեկ այլ հեռանկար էր պատրաստել՝ սիրով, գաստրո ինտրիգներով, անհավանական արկածներով իրադարձություններ։



5․ Համեմունք և կիրք, Հնդկաստան, ԱՄԷ, ԱՄՆ, 2014  (The Hundred-Foot Journey)

Ռեժ.՝ Լասսե Հալստրյոմ

Դերերում՝ Հելեն Միրեն, Օմ Պուրի, Մանիշ Դայալ, Շարլոտա Լե Բոն

Գաստրոնոմիկ կատակերգական դրամա՝ հնդկական և ֆրանսիական խոհանոցների, ավանդական և նորարարական գաստրո-իրականությունների բախում՝ համեմված սուր մեջբերումներով և ախորժահամ ուտեստներով։ Ճակատագրի հեգնանքով, ֆրանսիական Պրովանս քաղաք ժամանած հնդկացի ներգաղթյալների ընտանիքը որոշում է արևելյան ռեստորան բացել․․․ ավանդական ֆրանսիական ռեստորանի հարևանությամբ։ Հաստատության սեփականատեր Մադամ Մալորին հպարտանում է նրանով, որ կարողացել է վաստակել Միշլենի աստղ։ Սկզբնական շրջանում տիկինը ձեռնամուխ է լինում հավանական ու անհավանական բոլոր միջոցների, հնդկական ռեստորանը ոչնչացնելու համար, սակայն երբ նրա ճանապարհին հայտնվում է հնդիկների ընտանիքի անդամներից մեկը՝ երիտասարդ Հասանը, Մալորին հասկանում է․ տղան օժտված է համի գերբնական զգացումով։ 

***

Համաշխարհային կինեմատոգրաֆն ու ժամանակակից ռեալիթի-հեռուստատեսությունը չափազանց մեծ ուշադրություն է ցուցաբերում գաստրո-աշխարհի նկատմամբ․ գեղարվեստական ֆիլմերից ու սերիալներից բացի, ստեղծվում են բազմաթիվ խոհարարական նախագծեր, որոնց գլխավոր նպատակը՝ նոր, օրիգինալ և համեղ ուղղություններ հորինելն է։ Թեման անսպառ է, դե ինչ, վայելեք առաջարկվող ֆիլմերը։ Ի դեպ, նմանատիպ մի նախաձեռնությամբ էլ շուտով հանդես կգա Reservin-ը։ Այն նվիրված է լինելու համեղ ու գեղեցիկ ուտելիքի պատրաստմանը։

 

1819

(*). նշվածները պարտադիր են լրացման

 

Նառա Օգոստոս 29, 2016

Հետաքրքրիր նյութեր եք տեղադրում Reservin ))Միշտ հաճույքով եմ կարդում․Շնորհակալություն․
^ Վեր