Խորովածը շատ լավ բան է

Սեպտեմբերի 24-ին, Ախթալայի Ս. Մարիամ Աստվածածին եկեղեցու բակում տեղի ունեցավ տարվա ամենասպասված միջոցառումներից մեկը՝ «Խորովածի, արվեստի և երաժշտության» 8-րդ համահայկական փառատոնը։

Այս տարի փառատոնի կազմակերպիչներն էին Ախթալայի քաղաքապետարանը և «Հայ խոհարարական ավանդույթների զարգացման և պահպանման» ՀԿ-ը՝ Սեդրակ Մամուլյանի գլխավորությամբ: 

Փառատոնին մասնակցում էին 20-ից ավել թիմեր, որոնք կազմվել էին ինչպես Հայաստանի առաջատար ռեստորաններից, այնպես էլ առանձին անհատներից։ Այս տարի մասնակիցների մեջ կային նաև մի քանի թիմեր հարևան  Վրաստանի Հանրապետությունից, շատ էին նաև հյուրերը, որոնք եկել էին ինչպես Հայաստանի ողջ տարածքից, այնպես էլ՝ արտերկրից։

Փառատոնի սկիզբը ազդարարվեց գեղեցիկ բեմական ներկայացմամբ, որի ժամանակ Հայոց Թագավորը Սեդրակ Մամուլյանին հրամայեց հանձն առնել հայ ավանդական կերակրատեսակների մասսայականացումը և ղեկավարել այսօրվա խորովածի փառատոնը։ Մամուլյանը երդվեց հրամանը ի կատար ածել և հայտատարեց փառատոնը բացված։ 

Տոնական միջոցառման ընթացքում ելույթ էին ունենում ՀՀ ՊՆ N զորամասի նվագախումը և The Beautified Project ռոք խումբը:
Մասնակիցները մրցում էին լավագույն համի, ձևավորման և մատուցման համար։ Հաղթողին որոշում էր մրցույթի ժյուրին, որի կազմում ոչ միայն խոհարարներ էին, այլև արվեստի ոլորտի գործիչներ և Ազգային ժողովի ներկայացուցիչներ։ 

Մրցույթում բացարձակ հաղթող ճանաչվեց «Ծիրանի» ռեստորանային թիմը։ Reservin Armenia թիմը շնորհավորում է իր գործընկեր «Ծիրանի»-ին և մաղթում նորանոր հաջողություններ և ձեռքբերումներ։

Փառատոնի ընթացքում տեղի ունեցող իրադարձությունները ավելի մանրամասն դիտեք մեր հատուկ ֆոտոշարքում։