Reservin Armenia-ն շարունակում է իր համագործակցությունը քաղաքի լավագույն հաստատությունների հետ: Այս անգամ Ձեզ ենք ներկայացնում, թե ինչպես անցավ շատ սիրելի երաժիշտ Էմմա Պետրոսյանի մենահամերգը Mezzo Classic House-Club-ում:
Կիրակի երեկոն Mezzo Classic House-Club-ում, ինչպես և սպասվում էր, անցավ ջերմ ու ընտանեկան անմիջական միջավայրում՝ Էմմա Պետրոսյանի մենահամերգն էր: Համերգի հատուկ հյուրն էր Արամոն, նվագակցում էր մաեստրո Մադաթ Ավանեսովը: Համերգի հենց առաջին րոպեներից պարզ դարձավ, որ երեկոն հանդիսատեսի համար մեկ այլ հաճելի անակնկալ էլ էր նախապատրաստել: Համերգին, բացի Էմմայից ու Արամոյից, նույն բեմի վրա հանդես էր գալիս նաև նրանց որդին՝ շատ տաղանդավոր ջութակահար Ավո Գևորգյանը: Ավոյի մասնակցությունը համերգին ամբողջականացրեց այն յուրահատուկ մթնոլորտը, որ միշտ տիրում է Էմմայի համերգների ժամանակ:
Ջութակը որպես գործիք Ավոն ընտրել է Էմմայի խորհուրդով, այնուհետև սովորել և ավարտել է Գերմանիայի Էսսեն քաղաքի Արվեստի բարձրագույն ակադեմիայի ջութակի բաժինը և հիմա արդեն արժանիորեն ելույթ է ունենում իր հայտնի ծնողների հետ:
Ավոն, ով միշտ իր ստեղծագործական ուղին փորձել է հարթել ինքնուրույն, արդեն բազմիցս ապացուցել է, որ ժառանգել է իր տաղանդավոր ծնողների երաժշտական գեները և բեմական հմայքը և այս ելույթով նա դա ևս մեկ անգամ ապացուցեց՝ իր պրոֆեսիոնալ ու ինքնավստահ կատարումով:
Երեկոյի ընթացքում կենդանի կատարմամբ հնչեցին բոլորի կողմից շատ սիրված երգեր և մեղեդիներ: Ավոյի ելույթը ծնողների հետ նույն բեմում միայն ավելի ջերմացրեց ու օգնեց փոխանցել այն անմիջական ու անկեղծ հույզերը, որ միշտ թևածում են Էմմայի մենահամերգներին:
.jpg)
