Հապճեպ ու սննդարար Աննա Գևորգյանի հետ

Հեղինակ՝ Աննա Գևորգյան 

Նագեթ բառը առաջացել է Ամերիկայում 1850-ականներին ՝ Ոսկե Տենդի ժամանակ և նշանակում է ոսկու բնակտոր։ 100 տարի անց, գիտնական, սննդային տեխնոլոգիաների Կորնել ինստիտուտի պռոֆեսոր  Ռոբերտ Բեյկերը ստեղծեց պինդ և խռթխրթան կեղևով պատված հավի փափկամսի բաղադրատոմսը, որը նմանեցնելով բնակտոր ոսկու, այդպես էլ կոչեցին։

Այսօր այս ճաշատեսակը սիրելի է  բոլորի կողմից և այն կարող եք ճաշակել բոլոր ռեստորաններում և սրճարաններում: Յուրաքանչյուրը փորձում է իր ուրույն ձևով պատրաստել նագեթ, սակայն ամենապահանջվածը շարունակում է մնալ հենց դասական տարբերակը, այսօր ես կպատրաստեմ նագեթ ֆրանսիական ձևով,որը դասականից տարբերվում է նրանով, որ հիմնական բաղադրիչներին ավելանում է պանիր և եգիպտացորենի փաթիլներ։

Եվ այսպես, 2 բաժին նագեթ պատրաստելու համար մեզ հարկավոր են հետևյալ բաղադրիչները՝

Հավի կրծքամիս – մեկ ամբողջական – 1500դր   

Պաքսիմատ – 30 գր

Ձու – 2 հատ – 120 դր

Ալյուր – 50 գր

Պանիր – 100գր -  /50-ական գր երկու տեսակ / - 400 դր

Եգիպտացորենի փաթիլներ – 30 գր

Համեմունք

Ընդհանուր ՝ մոտավորապես 2000 դր

Պատրաստման տևողությունը՝ 20 րոպե

Լվանում ենք հավի կրծքամիսը, չորացնում, կտրատում միջին կտորների։

Վերցնում ենք 3 հատ խորը ափսե, առաջինի մեջ լցնում ալյուր, երկրորդի մեջ կոտրում ենք ձուն և հարում այն, երրորդի մեջ լցնում ենք պաքսիմատ, եգիպտացորենի մանրացրած փաթիլներ, քերած պանիր, համեմունք։

Վերցնում ենք մսի յուրաքանչյուր կտորը և հերթով թավալում այն ալյուրի, ձվի, պաքսիմատի մեջ։  Վերջում տապակում մեծ քանակությամբ ձեթի մեջ։ Դնել անձեռոցիկների վրա, որ կլանի ավելորդ յուղը։