Երևանաբնակ Պեպոյի հետքերով. «PEPO Fish House»

Հեղինակ՝ Նունե Այլանջյան

Ա՜յ թե Զիմզիմովը տեսներ, թե Սարյան 25-ում Պեպոյի անունով ինչ վայր է բացվել, նախանձից կպայթեր: «PEPO Fish House»-ում սունդուկյանական հերոսին հիշեցնում են միայն Պեպոյի բեղիկներն ու փափախը, բայց դա էլ բավարար է, որպեսզի զգաք մեր չունեցած ծովի բարիքների ամողջ բույրը: Երկհարկանի տարածքի առաջին հարկում շեֆ խոհարարի անձնական տարածքն է, ով հենց ձեր աչքի առաջ է աշխատում: Երկրորդ հարկում հարմարավետ ու ժամանակի պահանջներին համապատասխան ձևավորումով ոչ շատ ընդարձակ հյուրասրահն է, այստեղ կարող եք անցկացնել ոչ միայն ձեր ընթրիքն այլև՝ լանչը: Սա մի վայր է, որտեղ կարելի է կազմակերպել ձեր առաջին ժամադրությունն ու գործնական հանդիպումը, եթե իհարկե սիրում եք ձուկ ու այն ամենն, ինչ կապված է ծովամթերքի հետ: Սակայն, նույնիսկ «Պեպո»-ն բացի առավելություններից ունի նաև թերություններ:

---------------------------

Պլյուսներ

---------------------------

Լուսանկարի աղբյուրն այստեղ

Դիմավորում: Մի երևույթ, որ ամեն տեղ չես հանդիպի: Սա չխառնե՛լ մատուցման հետ, որովհետև հրաշալի մատուցում կարող է լինել, բայց երբ ներս մտնեք կարող են ձեզ «շան տեղ» չդնել: «Պեպո»-յում դուռը բացելուն պես՝ ձեզ ժպտում են, բարևում և ուղեկցում վերև:

Մատուցում: Այստեղ մատուցումը հրաշալի է, մատուցողը կարող է ժամերով ձեզ բացատրել մենյույում առկա ուտեստների բաղադրությունն ու նույնիսկ համը՝ ամբողջ ընթացքում չդադարելով լինել բարեհամբույր: Սա բացառիկ բան է հայկական սպասարկման ոլորտում: Գնահատե՛նք:

Հյուրասիրություն: Ինչպես ասում է ռուսական ասացվածքը՝ «Дареному коню в зубы не смотрят», հետևաբար, ցանկացած հյուրասիրություն միշտ էլ ցանկալի է: Այստեղ նախքան ձեր պատվերը բերելը՝ ձեզ կհյուրասիրեն խրթխրթան հացիկներ և համեմված կարագ: Կշտանալիք չէ, բայց հաճելի է:

Ձկնապուրային հեղափոխություն: Եթե ձեզ թվում է, որ կաթն ու ձուկը կարող են թունավորում առաջացնել, որովհետև առաջին հայացքից  անհամատեղելի են, ապա պետք է փորձեք «Պեպո» ձկնապուրը, միայն թե զգույշ՝ մատները հետը չուտեք:

Խեցգետնով նրբաբլիթներ: Այս խորտիկը գալիս է ապացուցելու, որ նրբաբլիթ (блинчики) կարելի է համտեսել ոչ միայն Նոր Տարուն, այլև՝ սովորական օրերի: Դե իսկ, խեցգետնով նրբաբլիթը ձեզ համար գուցե կդառնա հետաքրքիր բացահայտում:

Գազավորված ըմպելիքների բացակայություն: Այստեղ գազավորված միմիայն հանքային ջուրն է, կոլայասեր հանրության համար սա կարող է հիասթափեցնող նորություն լինել, բայց մի շտապեք մարդկանց դատել, նրանք մտածում են մեր առողջության մասին, փոխարենը՝ կարող եք կոմպոտ ըմպել, կամ՝ կախվել:

Այստեղ չեն ծխում: Մաքուր օդն ու համեղ ուտեստները միմիայն դրական ազդեցություն կունենան ձեր առողջության վրա, իսկ Պեպոն վերևից կտեսնի և կուրախանա:

---------------------------

Մինուսներ

---------------------------

Լուսանկարի աղբյուրն այստեղ

Ձկան հոտը: Այստեղ, իհարկե օդափոխությունը լավն է, սակայն առաջին հարկում տեղի ունեցող խոհանոցային իրարանցումը, երբեմն կարող է իր բացասական կողմ ունենալ. դա հասկանալի է, քանի որ ամեն ինչ տեղի է ունենում մեկ հարկի տակ, սակայն ոչ բոլորը կարող են նստել ձկան բույրի ներքո:

Հյուրասիրության բացակայություն: Երբեմն ձեր հյուրասիրությունը կարող է տեղ չհասնել, բայց եթե դուք հին հաճախորդ եք ու գիտեք, որ կա նման բան, պարզապես մատուցողին հիշեցրեք դրա մասին: Ամոթ բան չկա, դուք այցելու եք, ով սիրում է նման «թիթիզ»բաներ:

Սխալ պատվեր: Քանի որ մենյուն առաջարկում է բազմապիսի համեղ ու էկզոտիկ ուտեստներ, չի բացառվում, որ դուք ցանկանաք ամեն ինչից քիչ-քիչ փորձել, իսկ մատուցողը ռոբոտ չէ, որ այդքանը հիշի, հետևաբար պետք է նոթատետրում գրանցի, բայց եթե նոթատետր չունի, վերջում ձեր սեղանին կարող է հայտնվել Սևանի իշխանը՝ կարմրախայտի փոխարեն:

Ծխողների սրահի բացակայություն: Որպես չծխող՝ պետք է ուրախանայի, որ այստեղ ծխողների սրահ չկա, բայց դա ինչ-որ առումով անհավասարություն է նշանակում: Լավ կլիներ, որ ծխողների համար գոնե մի անկյուն լիներ, որ խեղճերը մաքուր օդից չխեղդվեն:

Գազավորված ըմպելիքների ներառում: Իհարկե, գնահատելի է բոլորիս «կոմպոտի վրա» նստեցնելը, բայց երբեմն սնունդն ավելի հեշտ է կուլ գնում, երբ վրայից կոլա ես ըմպում: