Հեղինակ՝ Աննա Գևորգյան
Ծովատառեխը մուշտակի տակ աղցանը ռուսական խոհանոցի ամենատարածված և օրիգինալ աղցաններից մեկն է։ Աղցանը սկզբում պատրաստվել է միայն ռեստորաններում, այնուհետև սիրվել է ժողովրդի կողմից և մեծ տարածում գտել, այն աստիճան, որ այժմ ռուս ընտանիքների մեծ մասի համար Ամանորն Ամանոր չէ, եթե սեղանին դրված չէ «селедка под шубой» աղցանը։
Ռուսական խոհանոցը հաճախ է զարմացնում իր ճաշատեսակների բաղադրությունների համադրություններով։ Աղցանը պատրաստվում է նաև խնձորով, թթու վարունգով, ձվով։ Այս նույն աղցանը մեզ մոտ՝ Հայաստանում, նույնպես շատ տարածված է և սիրված, սակայն պատրաստվում է առանց ձկան և կոչվում է Տորթ-աղցան։ Թե՛տորթի, թե՛ռուլետի տեսքով այն շատ ներկայանալի տեսք ունի ու շատ համեղ է։ Ի դեպ եթե աղցանը պատրաստել նախապես և թողնել մեկ գիշեր, ապա հաջորդ օրը այն կլինի անհամեմատ ավելի համեղ։
6 բաժին ծովատառեխ մուշտակի տակ պատրաստելու համար մեզ անհրաժեշտ են հետևյալ բաղադրամասերը՝
Բազուկ – 300 գր - 200դր
Գազար – 200 գր -100դր
Կարտոֆիլ – 200 գր -100դր
Կանաչեղեն – կես փունջ - 50դր
Մայոնեզ – 0,5 տուփ - 200դր
Մարինացված ծովատառեխ – կեսը - 400դր
Համեմունքներ՝ աղ, սև պղպեղ։
Ընդհանուր՝ 1050 դրամ։
Պատրաստման ժամանակը՝ 40 րոպե։
Սովորաբար մի շերտ էլ թթու վարունգ եմ անում, բայց այս անգամ, անկեղծ ասած մոռացել էի :)
Մի կաթսայի մեջ խաշում ենք բազուկը, մյուսի մեջ գազարն ու կարտոֆիլը, որպեսզի բազուկի գույնն ու համը չփոխանցվի մյուս մթերքներին և աղցանի համն ու տեսքը չփոխվի։Հերթով քերում ենք բանջարեղենը և լցնում առանձին տարաների մեջ, բազուկը ցանկալի է վերջում քերել, քանի որ նրանից հետո կարմրելու են և՛ քերիչը, և՛ տարան որի մեջ քերում եք, և՛ ձեր ձեռքերը։
Սեղանի վրա փռել պոլիէթիլենային տոպրակը, վրան լցնել բազուկը և ձեռքերով ուղղանկյուն ձևավորել, վերևից լցնել գազարի շերտը և նույնպես տալ ուղղանկյան տեսք, սակայն բազուկի շերտից մի քիչ ավելի փոքր, նույնպես կրկնել կարտոֆիլի շերտը և վերջում միայն մեջտեղի գծով շարել փուշն ու կեղևը մաքրած, կտրատած ձուկը։
Արդեն կարող եք տոպրակի օգնությամբ զգուշորեն փաթաթել ռուլետը։ Ի դեպ աղցանի պատրաստումը, սուշի-ռոլի նույն ձևաչափն ունի բաղադրիչների դասավորության և տեսքի իմաստով:
Եթե օգտագործելու եք թթու վարունգ, այն պիտի լինի գազարի և կարտոֆիլի շերտերի միջև։
Բազուկն այս անգամ վերցրել էի նույն քանակությամբ ինչ մյուս բանջարեղենները և կրակից մի փոքր շուտ էի վերցրել, այդ պատճառով այն շատ կպչուն չէր: Սա հարկավոր է, որպեսզի ռուլետը հարթ մակերես ունենա և ծածկի իր տակի մյուս բաղադրիչները: Պատրաստելիս հաշվի առեք այս վրիպումները, որ ինքներդ չկրկնեք։
