Սննդամթերքի գերագույն նպատակն է օգուտ բերել մարդու օրգանիզմին։ Ցավոք, ոչ միշտ է հնարավոր հետևել այս կանոնին և առաջին հայացքից օգտակար թվացող որոշ սննդատեսակներ ակամայից հայտնվում են անցանկալիների շարքում։
Երբեմն ծովամթերքը, որն առանց մտածելու կարելի է դասել առողջարար սննդատեսակների ցանկին, պարունակում է մետաղների, արտադրական թափոնների, մակաբույծների և թունաքիմիկատների մի ամբողջ ծաղկեփունջ։ Այս ամենն անշուշտ ոչ մի օգուտ չի բերի այդ ձուկը ճաշակողի օրգանիզմին։
Այնպես որ ծովամթերք գնելուց առաջ պետք է կամ 10-ը չափել, հետո գնել, կամ էլ հետևել ձկնեղեն գնելու մեր խորհուրդներին։
Հիշե՛ք՝ ձկնեղենի որակի չափանիշ կարող են տալ միայն մասնագիտացված խանութները։ Շուկայում կամ փողոցում, առավել ևս՝ մայթեզրին արկղերում վաճառվող ձուկը ոչ միայն իր թարմությամբ, այլև որակական հատկանիշներով որպես կանոն մի քանի անգամ զիջում է խանութներում վաճառվող ապրանքին։ Սակայն այստեղ էլ ամեն ինչ հարաբերական է։
Խոշոր խանութների ակվարիումներում լողացող կենդանի ձկները ոչ միշտ են օգտակար, առողջարար։ Իրենց բնական միջավայրից ձկներին հանելու դեպքում անհրաժեշտ է պահպանել որոշակի կանոններ ինչպես տեղափոխման ժամանակ, այնպես էլ հետագա պահպանման։ Գոյություն ունեն բազում մանրուքներ. ակվարիումի ջրի ջերմաստիճանը, աղերի քանակը, քլորի պարունակությունը չպետք է գերազանցեն նորման։
Ծովազուրկ մեր երկրի բազմաթիվ սուպերմարկետներում, այնուամենայնիվ, ծովամթերքի ու օվկիանոսային դելիկատեսների պակաս չկա։ Իհարկե, դրանք վաճառվում են սառեցված վիճակում։ Նման ծովամթերք գնելիս առաջին հերթին պետք է ուշադրություն դարձնել արտադրման ամսաթվին, հետո տեղեկանալ՝ որ երկրից է ներմուծվել։
Հաճախ սառեցված ձկները հալեցվում և նորից են սառեցվում։ Այս մեթոդն անբարխիղճ արտադրողներին կամ խանութպաններին հնարավորություն է տալիս մի քանի ամսով երկարաձգել մթերքի կյանքը։ Եթե մթերքի փաթեթավորման ներսում նկատեք սառույց, սառած արյան հետքեր կամ ապրանքի դեֆորմացիա, ապա վստահաբար կարելի է պնդել, որ խախտվել են դրա պահպանման պայմանները։ Այս մթերքն արդեն պիտանի չէ օգտագործման համար։ Ի գիտություն՝ թարմ սառեցված ծովամթերքի պահպանության ժամկետը բազմաթիվ երկրներում ընդամենը 14 օր է։
Վերոնշյալ խորհուրդներին հետևելով ոչ միայն կգոհացնեք ձեր քիմքը, այլև կարժանանաք ձեր օրգանիզմի շնորհակալությանը։
.png)
