Շաուրմայական Երևան. Արտաշի մոտ

Շաուրմայական Երևան. Արտաշի մոտ

Հեղինակ՝ Նունե Այլանջյան


Վաղուց անցյալում են այն ժամանակները, երբ շաուրման համարվում էր միայն ցմփոր, կերած-խմած, գիրանալուց չվախեցող տղամարդկանց  մենաշնորհը: Հիմա շաուրմա ուտում են բոլորը՝ անկախ սեռից և հասարակական դիրքից: Այո, եթե կոստյումով շաուրմա ուտող տղամարդ կամ բարձրակրունկներով աղջիկ չեք տեսել, ապա ամեն ինչ դեռ առջևում է: Արաբական արմատներ ունեցող այս ուտեստն էժան է, արագ, համեղ և կշտացնող:

Աշխարհի ամենահամեղ շաուրման կարելի է համտեսել նախ արաբական, հետո միայն ամերիկյան երկրներում: Օրինակ Դուբայում ամենահայտնի շաուրմայանոցը  Al Mallah كافتريا الملاح-ն է, այստեղ կարող եք համտեսել հավի մսով շաուրման՝ պանրի մեջ: Ի դեպ, շաուրման ուտելու հատուկ ձև կա, սովորաբար այն պետք է ավարտին հասցնել երեք անգամ կծելուց հետո, իսկ ուտել խորհուրդ է տրվում տաք վիճակում:

Սակայն, հայկական շաուրման բնականաբար դուրս է բոլոր տեսակ ստանդարտներից: Օրինակ անհնար է պատկերացնել, որ Միացյալ Նահանգներում  Մարկ Տվենի  շաուրմա լինի, իսկ այստեղ  նման «պատվի» է արժանացել Մեսրոպ Մաշտոցն ու Հովհաննես Թումանյանը: Բայց դա ուրիշ պատմություն է, հիմա այցելենք Սպենդիարյան փողոցում գտնվող «Արտաշի մոտ», որպեսզի շփոթություն չառաջանա նշենք, որ այս վայրի անունը Արտաշես թագավորի հետ ոչ մի կապ չունի: Չնայած այստեղ կարելի է ասել մատուցվում է արքայական շաուրմա: Բայց նույնիսկ թագավորներն են ունեցել պլյուսներ և մինուսներ:

---------------------------

Պլյուսներ

---------------------------



Լի ու բոլ միջուկը: Ժլատությունն արտաշեսյան շաուրմայի  համար չէ: Այստեղ, մատուցվում է մեր քաղաքի, թերևս, ամենափարթամ շաուրման: Բացի ավանդական բաղադրիչներից, պատրաստված են տարբեր սոուսներ և հավելումներ, որոնք ցանկության դեպքում կարող են ավելացվել ձեր շաուրմայում:

Հյութալիությունը: Հավատացեք, ես իմ կյանքում բազմազան շաուրմաներ եմ փորձել ու գիտեմ, որ շաուրման կարող է հյութազուրկ լինել, դա փաստ է: Արտաշի շաուրմայի առանձնահատկություններից ամենացայտունը թերևս հենց հյութալիությունն է: Համ, որը հիշվում է ու, որի հետևից դու հետո էլի ես վերադառնում:

Արագություն: Արտաշի մոտ աշխատում են շաուրմայի ամենաարագաշարժ վարպետները: Մեկ-երկու՝ և ձեր շաուրման պատրաստ է: Այդ արագությանը զուգահեռ որոշ վարպետներ փորձում են նաև վիրտուոզ երևալ և կիրառել տարբեր հնարքներ, ինչպես բարմենները:

Дамы вперед: Որքան էլ որ հերթը երկար լինի, միևնույնն է, աշխատակիցները փորձում են ամեն կերպ աղջիկներին ընդառաջել և նրանց հերթից դուրս սպասարկել: Հերթում գտնվող տղամարդիկ, իհարկե դեմ չեն:

Wi-Fi չկա, հաց կերեք: Այս հանգամանքը շատերի համար կարող էր մինուս հանդիսանալ, սակայն միայն ոչ այս դեպքում: Վաղուց ապացուցված է, որ հաց ուտելիս պետք է կենտրոնանալ ուտելիքի վրա՝ դանդաղ այն ծամելով, ոչ թե ստուգել ֆեյսբուքի լրահոսը: Այստեղ դուք ունեք այդ հնարավորությունը:

Օդափոխություն: 95 տոկոս է հավանականությունը, որ այստեղից դուք մաքուր դուրս կգաք, այն առումով, որ յուղի և ծխի հոտ չկա, օդափոխությունը լավ է աշխատում: Սա, իսկապես մեծ պլյուս է հայկական սննդի ցանցում: Որպես կանոն մարդիկ խուսափում են նման վայրեր այցելել՝ հենց սննդի զանազան բույրերն իրենց վրա չկրելու համար:

Ջերմ մթնոլորտ: Այստեղ բոլորը յուրային են, նրանց համախմբում է սերը դեպի շաուրման և դատարկ ստամոքսը, իսկ անձայն հեռուստացույցը, որը հայկական ալիքներ է ցուցադրում, մի տեսակ, տան ջերմ մթնոլորտ է ստեղծում, ու քիչ է մնում բարձրաձայն հարցնես՝«պուլտը ո՞ւր ա, մի քիչ ձեն տվեք»:

---------------------------

 Մինուսներ

---------------------------



Մազեր: Երևույթ, որը կարող է վանել ցանկացած այցելուի, իսկ ամենախստապահանջները կարող են նույնիսկ սկանդալ սարքել: Ցավալի է, բայց երկու անգամ իմ շաուրմայում հանդիպել եմ նման բան, իհարկե դժվար էր ասել՝ մարդո՞ւ մազ էր, թե՞ խոզի: Նման դեպքերում դժվար է նաև կողմնորոշվել՝ ասե՞լ այդ մասին, թե՞ ոչ: Լռել պետք չէ, պարզապես հանուն մարդասիրության,  դա կարող եք անել շատ զգույշ, որ կողքինները չլսեն, եթե իհարկե տվյալ «օբյեկտի» դեմ ոչինչ չունեք:

Ավլելը: Մաքրությանը հետևելը ոչ միայն լավ է, այլև պարտադիր, սակայն ավլել հենց այն ժամանակ ու այն հատվածում, որտեղ պատրաստվում է շաուրման, աններելի է: Ախր, պարզ չէ՞, որ հենց այդ պահին փոշու բազմաթիվ «սոված» հատիկներ կթռչեն մսի վրա:

Հնացած ինտերիերը: Երբեմն չես ուզում աթոռներին նստել, որովհետև թվում է դրանց վրա թափված ու չորացած անհասկանալի զանգվածը կարող է կպչել հագուստիդ ու փչացնել: ժամանակն է գոնե աթոռները փոխել:

Կայանատեղի: Մեքենայով այստեղ գալ կարող են միայն հաջողակները, որովհետև հիմնականում կայանելու տեղ չկա, փողոցն էլ նեղ է, ստիպված եք մոտակա փողոցում կայանել, մյուս կողմից էլ ուտելուց հետո մի քիչ քայլելը չի վնասի:

3253

(*). նշվածները պարտադիր են լրացման

 

Garik Ապրիլ 19, 2016

Areg ete texty ushadir kardas khaskanas vor graca chka wifi
Նարեկ Ապրիլ 18, 2016
հայերենա գրած... հիմա այցելենք Սպենդիարյան փողոցում գտնվող «Արտաշի մոտ»
Areg Ապրիլ 18, 2016

Garik Spendiaryani vra chka wi fi, minchev comentely karda.
Karen Ապրիլ 18, 2016

Երվանդ Քոչարի մասնաճյուղում, առկա է և wifi-ը և կայանատեղին, քննադատելուց առաջ լավ է, բոլոր ինֆոն հստակ ճշտել, կամ հստակեցված և փաստերով խոսել:
Garik Ապրիլ 18, 2016

dipuk er (Y)
^ Վեր