Քաղաքի կոլորիտն ու գույները կլինեին անշունչ ու խամրած, եթե փողոցները չզարդարեին շուկաները: Երկրի ու ազգի մշակույթի կրողներն ու ներկայացնողները հենց նրանք են: Եթե ուզում ես որևէ երկիր ավելի լավ ճանաչել, ապա լավագույն տեղը ուր պետք է այցելես քաղաքային շուկաներն են՝ այնտեղ մարդիկ իրական են: Երևանյան շուկայական մշակույթին երեկ ավելացավ ևս մեկ շուկա՝ Կասյան փողոցի վերջնամասում վերաբացված գյուղմթերքների շուկան:
Այն հնարավորություն կտա քաղաքացիներին գյուղմթերքները ձեռք բերել հենց վաճառողից: Այստեղ ընտրության հնարավորությունն ավելի լայն է, միանգամից հնարավորություն ունես շփվել տարբեր վաճառողների հետ և ցանկության դեպքում էլ ամենաբարձր գները կարող են դառնալ ավելի մատչելի, եթե սակարկես:
Կասյան փողոցում գյուղմթերքների շուկայի վերաբացմանը ներկա էին նաև Երևանի քաղաքապետ Տարոն Մարգարյանը և ՀՀ Գյուղատնտեսության նախարար Սերգո Կարապետյանը: Պաշտոնյաները շրջում էին շուկայում, զրուցում գյուղացիների, վաճառողների հետ, փոխանակում կարծիքներ քաղաքացիների հետ ու ծանոթանում վաճառվող ապրանքների գներին: Վաճառողներից մի քանիսն անգամ հնարավորություն ունեցան վաճառել սեփական ապրանքները հենց բարձրաստիճան պաշտոնյաներին:
Գյուղատնտեսության նախարարը լրագրողների հետ զրույցում նշեց, որ աշխատելու են նման շուկաների մշակույթը զարգացնել մեր երկրում, քանի որ դրանք առաջնակարգ են բոլոր քաղաքակիրթ երկրներում. «Եթե լինի պահանջարկ, նման շուկաներ կբացվեն նաև այլ համայնքներում: Նախատեսում ենք նաև մսամթերքի շուկա ստեղծել, սակայն դրա համար դեռևս հարմար պայմաններ չունենք»:
Շուկայում թեժ մթնոլորտ էր, քաղաքացիները շտապում էին գնել պահանջված մթերքները, նրանց մի մասը վայելում էր հատուկ կազմակերպված համերգը, իսկ վաճառողները հասցնում էին աշխատանքի հետ մեկտեղ կատակել. «Լրագրողներն ավելի շատ են, քան առնողները»:
Հուսով ենք, որ Երևանում այսպիսի շուկաները կշատանան և կլինեն ավելի բազմազան, իսկ առաջիկայում սպասվում է նոր շուկայի բացում՝ Մաշտոցի Պողոտայի մոտակայքում:
