Եթե Ձեր կողքին ծխում են: Ինչպե՞ս ազատվել անցանկալի անծանոթի ընկերակցությունից

Եթե Ձեր կողքին ծխում են: Ինչպե՞ս ազատվել անցանկալի անծանոթի ընկերակցությունից

 

Հեղինակ՝ Նունե Այլանջյան


«Ծխելը վնասակար է առողջությանը» տողերով պաստառները պետք է պատռել ու դեն նետել, որովհետև դրա մասին բոլորն էլ գիտեն, բայց շարունակում են ծխել: Մարդիկ ծխում են, որովհետև դա նրանց օրվա բաղադրիչ մասերից մեկն է, իսկ ոմանք դա անում են, որովհետև հավատում են, որ ծխելը թուլացնում է նյարդերն ու մի տեսակ ինքնավստահություն հաղորդում:

Մեր քաղաքում մարդիկ ծխում են ամենուր՝ կանգառներում, ժամանցային վայրերում, նույնիսկ գետնանցումներում: Օրինակ՝ եվրոպական բազմաթիվ երկրներում չի կարելի ծխել սննդի կետերում, աշխատանքի վայրում: Նույնիսկ կան երկրներ, որտեղ արգելվում է ծխել սեփական պատշգամբում, իսկ փաբերի հայրենիք Իռլանդիայում քիչ չեն չծխողների համար նախատեսված փաբերը:



Մեծ Բրիտանիայում արգելվում է ծխել ոչ միայն սրճարաններում, ռեստորաններում և բարերում, այլև՝ բանտերում: Եթե մարդ խախտում է այդ օրենքը, ապա տուգանվում է 30-ից 200 ֆունտ ստերլինգով: Վերջերս նույն Բրիտանիայում օրենք ընդունվեց, որի համաձայն՝ անգլիացիներն իրավունք չունեն ծխել ավտոմեքենաներում ևս, եթե իրենց հետ երեխա կա:

Հայաստանում  ծխախոտի օգտագործումը սահմանափակող և առողջ ապրելակերպ քարոզող օրենքն ընդունվեց 2005թ. մարտի 1-ին: Օրենքի համաձայն՝ 2006թ. մարտի 1-ից բոլոր հասարակական և պետական հաստատություններում պետք է առանձնացվեին հատուկ գոտիներ, որպեսզի չծխողները չտուժեին: Օրենքը սահմանափակում է ծխելը կրթական, առողջապահական և մշակութային հաստատություններում, ինչպես նաև քաղաքային տրանսպորտում, օդակայաններում, ավտոբուսային ու երկաթգծի կայարաններում: Իսկ, թե ինչ եղավ հետո, բոլորս գիտենք և արդյունքում ունենք, այն, ինչ ունենք: Եթե հայտնվել եք մի վայրում, որտեղ չկան չծխողների համար նախատեսված սրահներ, իսկ Դուք գերադասում եք թունավորվել, բայց չլքել տարածքը, ապա կան տարբեր հնարքներ Ձեր կողքին հայտնված ծխող անծանոթից ազատվելու համար:



Հազ: Հազում են բոլորը, մասնավորապես, երբ տանել չեն կարող ծխախոտի ծուխը: Սա փորձված մեթոդ է՝ մանավանդ փաբերում: Եթե Ձեր կողքին հայտնվել է ծխող «օբյեկտ», ապա սկսեք հազալ, իհարկե դա արեք շատ քաղաքավարի և չափի մեջ: Պետք չէ այնպես հազալ, իբր խեղդվում եք: Նման դեպքերում որպես կանոն ծխողը կամ հանգցնում է ծխախոտը կամ տեղափոխվում, նույնսիկ լինում են դեպքեր, երբ ներողություն են խնդրում:

Տեղաշարժեք մոխրամանը: Սա այն դեպքն է, երբ փաբում եք կամ ակումբում` բարի մոտ նստած: Նա շարունակում է ծխել, իսկ Դուք ձեռքի թեթև շարժումով մոխրամանը հրում եք նրա կողմ, այնպես, որ նա հասկանա, որ դա Ձեզ համար չէ, իսկ մոխրամանում դուք միայն անձեռոցիկներ եք նետում: Հենց այդպես: Իրավիճակը մեղմելու համար դա կարող եք անել քաղաքավարի ժպտալով:

Անհանգիստ շարժումներ: Կարծես ասեղների վրա լինեք, կարծես մի բան այնպես չէ, Դուք չեք գտնում Ձեր տեղը, աթո՞ռն է անհարմար, թե՞ ուղղակի Ձեր կողքին ծխում են: Վաղ թե ուշ կգրավեք «օբյեկտի» ուշադրությունն ու նա Ձեզ կհարցնի, արդյոք ծուխը խանգարում է, մեղմ կժպտացեք ու պատասխանեք՝ այո, մնացածն արդեն հալած յուղի պես կընթանա:



Քիթը: Ախ, այդ քիթը... մատներով փակեք ռնգերը, այո, դա մի քիչ ծիծաղելի է, բայց ի՞նչ արած, Ձեր կողքին ծխում են, իսկ Դուք դա տանել չեք կարող: Պարբերաբար կրկնեք գործողությունը, մինչև որ Ձեզ նկատեն:

Շփում բարմենի կամ մատուցողի հետ: Եթե սրահում չծխողների համար առանձնասենյակ չկա, իսկ Ձեր շուրջը ծխում են, Դուք կարող եք պարզապես արտահայտել Ձեր կարծիքը՝ «Ձեզ մոտ ինչ ծուխ ա» տողերով: Բնականաբար բոլորը Ձեր կողմ կշրջվեն, բայց դա կարևոր չէ, կարևորը Դուք դա ասացիք, թող իմանան ու օդափոխությունն ուժեղացնեն:

Խնդրանք: Պարզ ու մարդկային մի բան, որը կարող է շատ արագ Ձեզ հանձնել իրավիճակը կառավարելու վահանակը: Պարզապես նրանց խնդրեք կամ տեղափոխվեն կամ մի քիչ հեռու նստեն:

Փոքրիկ սուտ: Սա վեցերորդ կետի շարունակությունն է, երբ Դուք ծխող օբյեկտին խնդրեցիք տեղափոխվել կամ մի քիչ հեռու նստել, ասեք նրան, որ հիմա դուրս եք գալու, թող այդպես էլ մտածի, իսկ Դուք առանց շտապելու վայելեք Ձեր վիսկին:



Եթե ծխողները շատ են: Լինում են դեպքեր, երբ ծխողները շատ են, իսկ Դուք միայնակ, այստեղ կարող է բախում տեղի ունենալ, բայց տեղի չտաք: Նման դեպքերում ավելի լավ է ոչինչ չասել և լուռ տեղափոխվել, չնայած եթե պայքարող տեսակ եք, ապա ավելի ուշ կարդացեք անվտանգության աշխատակիցներին դիմելու և նրանց Ձեր կողմը գրավելու կանոնների մասին ևս:

Ծխող աղջիկներ: Վերոնշյալ դեպքերը հիմնականում տղամարդկանց էին վերաբերվում, աղջիկների դեպքում մի քիչ այլ է: Նրանք ավելի անկանխատեսելի են ու բռնկվող: Եթե Դուք իգական սեռի ներկայացուցիչ եք, ապա ապարդյուն է նրանց խնդրել չծխել, ավելի լավ է  ուշադրություն չդարձնել ու ի հեճուկս նրանց՝ ընկերանալ փաբի կամ ակումբի ամենազիլ տղայի հետ:

Ծխախոտի «վկաներ»: Այս տիպը շատ տարածված է, նրանք ընկերական են ու բարեհամբույր, կարող են չծխել, բայց առաջարկել ծխել, ամուր եղեք Ձեր սկզբունքներում ու գայթակղությանը մի տրվեք:

2565

(*). նշվածները պարտադիր են լրացման

 

Տվյալներ չկան
^ Վեր