Երբ ճանապարհորդում ես, լինում ես աշխարհի տարբեր քաղաքներում, կարևոր է փորձել նաև տվյալ քաղաքի «համ»-ը: Շատ երկրներում, եթե դու անտեսում ես փողոցում մատուցվող ուտելիքը, ապա կորցնում ես ոչ միայն էժան ուտելու, այլև մշակույթին իսկապես ծանոթանալու հնարավորությունը: Միասին ծանոթանանք #musteat շարքից մի քանի ուտելիքի, որոնք դարձել են քաղաքների խորհրդանիշ:
SUPPLI (ՀՌՈՄ)
Suppli անվանումը ծագել է surprise՝ անակնկալ բառից, քանի որ նրա մեջ կարելի է գտնել թաքնված մոցարելլա պանիր: Այս իտալական ուտելիքը պատրաստվում է հավի քարաճիկով, որին ավելացնում են բրինձ, տավարի մսով ռագու, լոլիկ և իհարկե՝ մոցարելլա պանիր: Այսպիսով, Իտալիա այցելելիս պիցցայից բացի պետք է փորձել նաև Հռոմի «փողոցային» խոհանոցի այս նմուշը։
Halo-Halo (ՄԱՆԻԼԱ)
Հետաքրքիր անվանումով այս ուտեստը համարվում է գաստրոնոմիական ամենախենթ նմուշներից մեկը: Halo-ն պատրաստում են սառույցով և կաթով, սակայն այն միաժամանակ կարող է պարունակել՝ կոկոս, շաքարավազ, կարամել, քաղցր կարտոֆիլ, բրինձ, պաղպաղակ և ֆլան անունով կրեմ: Եթե համարձակ եք և սիրում եք համային էքսպերիմենտներ, ապա կարող եք տեղափոխվել Ֆիլիպիններ և փորձել Halo-Halo:
BANH Mi (ՀՈ ՉԻ ՄԻՆՀ)
Banh mi են կոչվում վիետնամական «ծագում» ունեցող գրեթե բոլոր հացերը։ Սակայն խոսքն այս պահին համանուն սենդվիչի մասին է։ Փողոցային սննդի այս ներկայացուցիչը կարող է Ձեզ մոտ առաջացնել տարբեր համային զգացողություններ: Այն իրենից ներկայացնում է հացի մեջ խորոված խոզի միս, վարունգի պատառներ, համեմ, թթու գազար և ծովաբողկ, տավարի լյարդի պաշտետ ու մայոնեզ: Այս ուտեստը կարելի է փորձել արևմուտքի բազմաթիվ քաղաքներում, բայց ամենահամեղը Սայգոնի փողոցներում է:
Rou Jia Mo (ԽԻԱՆ)
Rou Jia Mo-ն աշխարհի հնագույն սենդվիչներից է։ Այս «բրդուճը» հայտնի է մոտավորապես 2000 տարի: Ավանդական տեսակն իր մեջ պարունակում է խոզի միս, որը կծու չամանի մեջ մի քանի ժամ տապակում են, աղում և ավելացնում համեմ ու կծու պղպեղ: Այն հիմնականում կարելի է փորձել Շանխի նահանգի մայրաքաղաք Խիանում կամ Պեկինում:
ԽՈԶԻ Satay (ԲԱՆԳԿՈԿ)
Խոզի մսի կտորները մարինացնում են կոկոսի կաթով և այլ համեմունքներով, ապա խորովում ածուխի վրա: Այն մատուցում են վարունգի աղցանով և քաղցր-կծու գետնանուշի սոուսով: Այս ուտեստը տարածված է Թաիլանդում:
TACOS AL PASTOR (ՄԵԽԻԿՈ)
Al pastor տակոների միտքը Լիբանանից Մեխիկո են բերել էմիգրանտները: Նախնական տեսակը պատրաստվել է գառան մսով, բայց Մեխիկոյում գառան միսը փոխարինել են խոզի մսով, որը մարինացնում են չիլի պղպեղով, համեմունքներով և անանասով, որից հետո եփում են: Al Pastor-ը մատուցվում է տորտիլլայով, սոխով, համեմով և անանասով: Լայմի հյութն ու տաք սալսան ամբողջացնում են մեքսիկական ուտելիքի անմոռանալի համը:
CHORIPAN (ԲՈՒԵՆՈՍ ԱՅՐԵՍ)
Հարավային Ամերիկայում էլ տարածված Choripan-ի հայրենիքը համարվում է Արգենտինան: Այն խոզի և տավարի մսից պատրաստված նրբերշիկ է, որը մատուցում են խրթխրթան հացով և սխտորի սոուսով:
ESPETINHO (ՌԻՈ ԴԵ ԺԱՆԵԻՐՈ)
Պորտուգալերենից թարգմանաբար espetinho նշանակում է փոքրիկ շամփուր: Այս ուտեստի ամենատարածված տարբերակը հավի, կամ տավարի մսով տարբերակն է: Մատուցվում է այս ճաշատեսակը պանրով և կծու սուսով: Բրազիլացիների ամենասիրելի ուտելիքներից մեկն է և ինչ որ տեղ նման է հայկական խորովածին:
TAGINE (ՄԱՐԱԿԵՇ)
Tagine-ն տավարի կամ գառան մսից են պատրաստում, որին ավելացնում են բանջարեղեն, համեմունքներ, միրգ, գետնանուշ և դարչին: Այն մատուցվում է հացով և կարելի է գտնել Մարոկկոյի փողոցներում:
BHEL PURI (ՄՈՒՄԲԱՅ)
Հնդկաստանի փողոցներում կարելի է ուտել բազմատեսակ ուտեստներ, բայց դրանցից ամենատարածվածը Bhel puri-ն է: Եփած բրինձ, վերմիշել, բանջարեղեն, համեմունքներ և հնդկական չուտնեյ:
