Tet-A-Tet Արամ Չախոյանի հետ

Tet-A-Tet Արամ Չախոյանի հետ

Անհերքելի է այն փաստը, որ վերջին ժամանակներում բավականին արդիական ու պոպուլյար է դարձել DJ մասնագիտությունը, և շատ կարևոր է մեր քաղաքում այդ մասնագիտության առաջամարտիկներից ևս մեկի կարծիքը այս ոլորտի վերաբերյալ:

Այս անգամ մեր Tet-a-Tet նախագիծի շրջանակներում զրուցել ենք մեր հեռուստա-ռադիո ասպարեզում թերևս ամենաճանաչելի և ազդեցիկ ձայներից մեկը ունեցողների՝ Արամ Չախոյանի հետ: Հետադարձ հայացք գցելով՝ նշենք մի քանի տարեթվեր Արամ Չախոյանի կենսագրությունից, 1995-2007թթ նա աշխատել է «Հայ FM» ռադիոկայանում` որպես հաղորդավար և ծրագրերի տնօրեն: 1997թ-ից զուգահեռ աշխատել է  Հայաստանի հանրային  և «Արմենիա» հեռուստաընկերություններում: 2010թ-ից Հայկական Երկրորդ հեռուստաալիքով վարել է «Ակորդ» երաժշտական հաղորդումը: Ներկայումս Սպուտնիկ ռադիոկայանի եթերում վարում է հեղինակային «Ուրիշ նորություններ» հաղորդումը, և հանդիսանում է "Tospa"  ռադիոընկերության տնօրենը:

Արդեն բավականին հեռավոր թվացող 1993-1994թթ-ին, երբ մեր քաղաքում դեռ չկային ակումբներ, կար  Երևանի ճարտարապետաշինարարական ինստիտուտին հարակից Կանաչ դահլիճը, որտեղ ուսանողների համար կազմակերպվում էին դիսկո ծրագրեր, և հենց այդտեղից սկսվեց Ձեր DJ-ի կարիերան: Ըստ Ձեզ, կա՞ն արդյոք այնպիսի գործոններ, որոնք խանգարում են ՀՀ-ում DJ մասնագիտության ու էլէկտրոնային երաժշտության զարգացմանն ըստ Ձեզ:

Արամ Չախոյան: Նախ, անպայման անհրաժեշտ է առանձնացնել, որ DJ-ներն էլ ունեն իրենց դասակարգումները: Կան DJ-ներ, ովքեր ավելի շատ նվագավար են՝ այս ոլորտում շատ տարրական գիտելիքներով, որ կարող են միայն երաժշտության շարք հավաքել և նվագել օրինակ կարաոկե ակումբներում, ընդմիջումների ժամանակ: Կան այնպիսի DJ-ներ, ովքեր նվագում են հարսանիքների ժամանակ, կան այնպիսի DJ-ներ, որ միայն underground էլեկտրոնային երաժշտություն են ներկայացնում: Դրսում կան DJ-ներ, որոնք այնքան պոպուլյար են, որ մեծ մարզադաշտեր են լցնում, այսպես կոչված փառատոնային DJ-ներ են: Մեզ մոտ շուկայի փոքր լինելու պատճառով դեռ կարող են իրենց գործունեությունը ծավալել առաջին 3 դասակարգման DJ-ները: Շատ պարադոքսալ կարող է հնչել, բայց 2000-ականներին ակումբային կյանքը մեզ մոտ ավելի ակտիվ էր, քան այժմ: Ինչ –ինչ պատճառներով ժամանակի ընթացքում այս մշակույթը մեզ մոտ ռեգրես ապրեց, այնինչ պետք է լիներ հակառակը, քանի որ ամբողջ աշխարհում տարեց տարի էլեկտրոնային երաժշտության մշակույթը պրոգես է ապրում, քանի որ թե՛ քանակապես, թե՛ ֆինանսապես ներգրավածությունը այս ասպարեզում աճում է, բայց մեզ մոտ այդ նույն իրականությունը չկա: Հիմնական գործոնը, որ կարող եմ նշել, դա շուկայի շատ փոքր լինելն է:

Reservin: Չնայած այն հանգամանքին, որ այժմ՝ որպես DJ հանդես գալը, Ձեզ համար պարզապես հաճելի զբաղմունք է, այն ու ամենայնիվ, երբ նվագում եք, էլեկտրոնային երաժշտության ո՞ր ոճն եք նախընտրում ներկայացնել:

Արամ Չախոյան: Նվագում եմ բացառապես հաճույքի և ընկերներիս համար, նույնիսկ եղել են դեպքեր, որ հրավերներ եմ ստացել և արտասահմանում եմ նվագել, բայց, միևնույն է, դա անում եմ զուտ հաճույքի համար, եկամուտ ստանալու նպատակ չեմ հետապնդում: Ավելի շատ կարոտախտային բան կա այս ամեն ինչի մեջ, քանի որ իմ տարիքում՝ շուտով 44 տարեկան կդառնամ, մտովի և շոշափելի միակ երևույթը, որ ինձ կապում է իմ երիտասարդության հետ, դա որպես DJ հանդես գալն է: Իսկ ինչ վերաբերում է ոճին, ի սկզբանե ես երաժշտասեր եմ, մինչև էլեկտրոնային երաժշտությամբ զբաղվելը ես լսել եմ դասական ռոք, սևական սոուլի արքաներին, դասական երաժշտություն եմ շատ լսել: Ինձ համար երաժշտության մեջ կարևորագույն հանգամանքը դա ներդաշնակությունն է: Երաժշտությունը պետք է լինի գեղեցիկ, պետք է իր մեջ մեղեդի և ներդաշնակություն լինի, երաժշտություն լսելիս ես ակնկալում եմ հաճույք  ստանալ, նկատի ունեմ այն անբացատրելի դողը, որ հիմնականում լինում է սիրելի երաժշտությունը ունկնդրելիս: Այդ զգացողությունն ունի նույնիսկ իրեն բնորոշող բառ ՝ frisson ասված երևույթը: Բոլոր ժամանակներում սիրել եմ և գտնում եմ, որ ամենաինտելեկտուալ էլեկտրոնային երաժշտության տեսակը դա Deep House երաժշտությունն է, երբ երաժիշտը կամ DJ-ը ուղղորդում է իր գրած երաժշտությունը և որպես թիրախ վերցնում է ոչ թե ոտքերը, այսինքն որ ոտքերով շարժվես, այլ ավելի շատ քո սրտի համար է նվագում, որ ներքուստ լսես, որ ինչ-որ բան ներքուստ փոխվի: Ես ինքս էլ ներկայացնելուց փորձում եմ մատուցել հենց այդպիսի երաժշտություն, որ հուզականություն առաջացնի և ներթափանցի ավելի խորը, ստիպի մտածել:

Reservin: Ի՞նչ կասեք մեր ակումբների և ակումբասեր հասարակության և արտասահմանի ակումբների և ակումբասերների մասին: Որո՞նք են հիմնական տարբերությունները:

Արամ Չախոյան: Առաջնային երևի նշեմ ձևականությունը, մեզ մոտ ավելի շատ արհեստական ձևական բաներ կան, մեր ակումբ հաճախող երիտասարդությանը շատ հաճախ ավելի հետաքրքում է, թե ինչպիսի տեսք ունեն իրենք կողքից, լիարժեք չեն սուզվում այդ մթնոլորտի մեջ, իսկ արտասահմանում ամեն ինչ այլ է, մարդիկ գալիս են ակումբներ լիցքաթափվելու էներգիա ծախսելու, չեն կենտրոնանում մանրուքների վրա, թե ի՞նչ հագնեն կամ ինչպե՞ս իրենց դրսևորեն, պարզապես վայելում են իրենց հանգիստը և լիցքաթափված սպառված գնում են տուն: Ակումբների միջև ևս կան շատ տարբերություններ՝ սկսած տեխնիկական հագեցվածությունից մինչև հարմարավետությունը: Արտասահմանում, ակումբներում կան այդ հանգստին ուղեկցող բոլոր անհրաժեշտ պայմանները, բոլոր մանրուքներով՝ սկսած սանհանգույցից մինչև լուսային ու ձայնային հագեցվածությունը և գրեթե բոլոր խոշոր ակումբներին հարակից կա առանձին տեղ, որ կոչվում է Chill Out, որտեղ ակումբային աղմուկից և ակումբային հանգստի մնացած ուղեկցող երևույթներից վատ զգալու դեպքում կարելի է մի պահ դուրս գալ, նստել բազմոցին հանգստանալ, այնտեղ նույնիստ հոգեբաններ կան, որ անհրաժեշտ պահին կարող են զրուցել, որ մարդը սթափվի և հանգիստը ոչ մի անախորժ հետևանք չունենա:

Reservin: Կա՞ որևէ ակումբ, որ առանձնացնում եք Երևանում: Մի գուցե ակումբ, որտեղ հիմնականում նվագում եք:

Արամ Չախոյան: Չկա որևէ ակումբ, որ առանձնացնում եմ և չկա այնպիսի ակումբ, որ հիմնականում նվագում եմ, ինձ համար Երևանում ակումբ ասվածը ավելի շատ մարդիկ են, ակումբը ձևավորում են մարդիկ: Դա կարող է լինել պարզապես նկուղային որևէ տեղ կամ ավտոտնակ ամենամինիմալ հարմարություններով, որտեղ հավաքված կլինեն լավ մարդիկ և լինի լավ երաժշտություն նվագող DJ. հենց դա եմ համարում ակումբ:

Reservin: Վերջին ժամանակներում մեր քաղաքում իրենց գործունեությունը ծավալող DJ-ները տարբեր միջոցառումներ են կազմակերպում՝ էլեկտրոնային երաժշտությունը առավել ճանաչված դարձնելու համար և Դուք ևս ներկա էիք դրանցից մեկում, երբ միջոցառման հյուրն էր մեր հայրենակից, շատ տաղանդավոր DJ Վիգեն Արմանը:  Ի՞նչ եք կարծում միայն նմանատիպ միջոցառումները բավակա՞ն են այդ երաժշտության լսարանն ընդլայնելու համար: Ի՞նչ այլ տարբերակներ եք տեսնում Դուք:

Արամ Չախոյան: Այո, Վիգեն Արմանը շատ լուրջ արտիստ է և ես շատ ուրախ եմ, որ իրեն հրավիրել էին Երևան: Մեր երիտասարդ DJ-ները հնարավորություն ունեցան տեսնելու և հետևելու նրա աշխատանքին, ինչպես նաև ակումբային կյանքը սիրող երիտասարդներն էլ իրենց հերթին տեսան և  հասկացան, որ DJ-ը դա պարզապես երաժշտություն միացնող նվագավարը չէ, այլ արտիստ է, որ ներկայացնում է իր երաժշտությունը: Գտնում եմ, որ դա ամենաճիշտ տարբերակն է, նման միջոցառումներ հաճախ կազմակերպելով ու նման արտիստներին հրավիրելով, հնարավոր կլինի առավել մասսայական դարձնել այդ երաժշտական մշակույթը, քանի որ միայն մեր DJ-ների ելույթները և միջոցառումները բավական չեն, որ այնպես մատուցեն այդ մշակույթը, որ ավելի շատ մարդկանց ներգրավեն և ընդլայնեն այդ երաժշտության լսարանը:

Reservin: Ավելի քան 13 տարի լինելով հեռուստատեսության և ռադիոյի ոլորտում՝ ի՞նչ եք կարծում, որքա՞ն մեծ է մեդիայի դերը էլէկտրոնային երաժշտության պրոպագանդման հարցում: Արդյո՞ք մեր մեդիան բավականաչափ ակտիվ է այդ գործում:

Արամ Չախոյան: Դե առհասարակ ամբողջ աշխարհում էլ այդքան շատ ընդունված բան չէ, որ հեռուստատեսությամբ էլեկտրոնային երաժշտություն ներկայացնեն, հազվադեպ հատուկենտ հեռուստա և ռադիո ալիքներ են նման երաժշտություն հեռարձակում: DJ-ները առհասարակ, որքան էլ հանրաճանաչ լինեն, միևնույնն է նրանց ընկալումը որպես արտիստ, որի շուրջ կարելի է կոմերցիոն որևէ հաղորդում պատրաստել, մեզ մոտ դեռ չկա, այդտեղից էլ գալիս է մեդիայի պասիվ լինելը:

Reservin: Ի՞նչ եք կարծում մեզ մոտ Էլեկտրոնային երաժշտությունը երբևէ կլինի այնքան պոպուլյար ուղղություն, որ մեզ մոտ ևս հնարավոր լինի անցկացնել Էլեկտրոնային երաժշտության ամենամյա փառատոններ, ինչպես օրինակ մեր հարևան Վրաստանում են կազմակերպում:  

Արամ Չախոյան: Չէի ասի, որ Վրաստանում էլէկտրոնային երաժշտությունը այդքան պոպուլյար է և այդ պատճառով են նրանք դա անում, ավելի շուտ հակառակը փառատոնները նրանք սկսեցին կազմակերպել զբոսաշրջությունը զարգացնելու համար, որովհետև հրավիրեցին հայտնի արտիստների, որոնց համար տարբեր երկրներից եկան մարդիկ ելույթներին ներկա լինելու: Ամենակարևոր փաստը այստեղ այն է, որն նրանք ունեին դրա համար բոլոր պայմանները, իրենց երկիրն ունակ էր այդ քանակությամբ մարդկանց ընդունելու, իրենց հյուրանոցներով ապահովելու, իրենց տեղաշարժը, տրանսպորտային լոգիստիկան և այլ շատ ճիշտ նախօրոք նախապատրաստած էր: Իսկ մեր դեպքում երկակի հարց է առաջանում՝ ինչպե՞ս անել էլեկտրոնային երաժշտության փառատոն, եթե զբոսաշրջության ոլորտը համապատասխան զարգացած չէ, և ինչպե՞ս զարգացնել զբոսաշրջությունը, եթե նման միջոցառումներ չեն իրականացվում: Այս դեպքում կարելի է գալ այն եզրակացության, որ անհրաժեշտ է զարգացնել զբոսաշրջությունը, որպեսզի հնարավոր լինի մեծ միջոցառումների ժամանակ ապահովել հյուրերի, հանդիսատեսի մեծ քանակ, բայց միայն տեղական արտիստների շնորհիվ, ցավոք, մեր դեպքում դա հնարավոր չէ, և հենց այդ պատճառով զբոսաշրջության զարգացման ծրագրում անհրաժեշտ է ներառել նաև այնպիսի միջոցառումներ, որին ներկա կլինեն արտասահմանից կոմերցիոն արտիստներ՝ ինչու չէ հայտնի DJ-ներ: Այդպես հնարավորություն կլինի ցույց տալ զբոսաշրջիկներին, որ Հայաստանում, ոչ միայն պատմաշակութային դարավոր պատմություն ունեցող հուշարձաններ կան, այլ նաև երաժշտական փառատոններ, կինոփառատոններ և շատ այլ ուրիշ ժամանցային հետաքրքրություններ, որ կարելի է համատեղել այցելելով մեր երկիր:

Reservin: Ու՞մ աջակցությունն է հարկավոր, որ էլեկտրոնային երաժշտության ոլորտը այդ աստիճան  զարգանա և պահանջարկ ունենա մեզ մոտ:

Արամ Չախոյան: Ինչպես արդեն նշեցի այդ երկու երևույթները միմյանց սերտ փոխկապակցված են: Պետության աջակցությամբ հնարավոր կլինի, պետական ծրագիր պիտի լինի, ինչպես որ Վրաստանում է, այսինքն՝ զբոսաշրջության նախարարությունը կարող է աջակցություն ցուցաբերել նման միջոցառումների կազմակերպիչներին, որ միջոցառումը իրականացվի պետության հովանու ներքո, միայն այդ դեպքում նման միջոցառումը կունենա ակնկալվող հաջողությունը:

Reservin: Ձեր հարցազրույցներում բազմիցս ասել եք, որ կցանկանայիք այնպիսի հաղորդում հեղինակել և վարել, որն ուսուցողական բնույթ կկրի: Երբևէ ունեցե՞լ եք ցանկություն վարելու էլէկտրոնային երաժշտության մասին ուսուցողական բնույթ կրող հեռուստատեսային կամ ռադիո հաղորդում:

Արամ Չախոյան: Ուսուցողական բնույթի հաղորդում ասելով ես ավելի շատ ի նկատի ունեի գիտաճանաչողական բնույթի հաղորդում հեղինակելը, իսկ Էլեկտրոնային երաժշտության մասին նման հաղորդում վարելը իմ կարծիքով ավելի սազական կլինի երիտասարդ սերնդի ներկայացուցիչներին:

Reservin: Կխոսե՞ք մի փոքր ընթացիկ աշխատանքների և հետագա ծրագրերի մասին:

Արամ Չախոյան: Առհասարակ, բացի երաժշտությունից, ես նաև շատ մեծ սեր ունեմ դեպի գիտությունը, միշտ զուգահեռ հետաքրքրվել և ուսումնասիրություններ եմ արել:  Շատ հավանական է, որ մոտ ժամանակներում, համացանցում գործող հեռուստատեսությունում ունենամ իմ հաղորդումը, որը գիտաճանաչողական բնույքի է լինելու: Հանրամատչելի ձևով՝ օրինակներով, տեսանյութերով, պատմելու եմ գիտական հայտնագործությունների մասին, բնության մեջ առկա երևույթների մասին: Հաղորդումը ունենալու է նաև քիմիական փորձարկումների բաժին, որի ժամանակ բացի տեսականորեն ներկայացնելուց նաև զանազան քիմական փորձեր ենք անելու:

Մեր մյուս հետաքրքիր հոդվածները կարող եք կարդալ այստեղ

1683

(*). նշվածները պարտադիր են լրացման

 

Տվյալներ չկան
^ Վեր