Tet-A-Tet Dj Diana-ի հետ

Tet-A-Tet Dj Diana-ի հետ

Շարունակելով Tet a Tet նախագիծը, այս անգամ ReserVin-ը հանդիպել է գեղեցկուհի DJ Diana-ին

ReserVin,- Դիանա, ունենալով բժշկական կրթություն, լինելով հայտնի և սիրված մոդել, ե՞րբ և ինչու՞ որոշեցիք հանդես գալ որպես DJ

DJ Diana,- առաջին անգամ նման միտք մոտս ծագեց, երբ որպես մոդել աշխատանքի բերումով գնացել էի Չինաստան. այնտեղ ես առաջին անգամ տեսա, թե ինչքան շատ աղջիկ DJ-ներ կան տարբեր երկրներից ժամանած և, մոտիկից ծանոթանալով նրանց հետ և ուսումնասիրելով նրանց կատարած աշխատանքը, ես որոշեցի փորձել ինձ այդ ոլորտում՚: Երբ որ վերադարձա Հայաստան, սկսեցի շփվել մեր հայ DJ-ների հետ, այնուհետև խնդրեցի Ալենին /DJ Alen Hertz/, որ ինձ սովորեցնի օգտվել DJ-ի վահանակից: Սկզբից դա ուղղակի հոբբի էր, հետո ընկերներս լսելով իմ երաժշտությունը, սկսեցին ինձ ոգևորել ու խորհուրդ տալ ավելի լուրջ զբաղվել այս ուղղությամբ, շուտով էլեկտրոնային երաժշտությունը ինձ ամբողջովին կլանեց և ես որոշեցի մտնել այդ շուկա։

ReserVin,- արդյոք դժվար չէ՞ աղջիկ DJ-ին Հայաստանում հանդես գալ և հաջողություն ունենալ այս բնագավառում, երբ նույնիսկ երկար տարիներ այս ոլորտում աշխատող ու բավականին ճանաչված DJ-ներն են նշում, որ Հայաստանում դեռ մեծ տարածում չունի էլէկտրոնային երաժշտությունը և պահանջարկը մեծ չէ:

DJ Diana,- Այո, այս ոլորտում աղջիկներին մի փոքր ավելի դժվար է Հայաստանում, որովհետև շատ տեղերում մեզ լուրջ չեն վերաբերվում կամ չեն վստահում, մտածում են աղջիկ եմ և կարող է չկարողանամ նվագել, չնայած իմ կարծիքով պիտի հակառակը լիներ, աղջիկները ավելի լավ են զգում երաժշտությունը: Ամեն դեպքում, սա ուղղակի կարծրատիպ է, որը պետք է կոտրվի։ Եթե համեմատենք նախորդ տարիների հետ, այսօր էլեկտրոնային երաժշտության նկատմամբ հետաքրքրվողները և նախընտրողները ավելի շատ են, աղջիկ DJ-ն էլ սովորական կդառնան շուտով;

ReserVin,- ո՞ր ոճի մեջ եք նախընտրում նվագել և արդյոք ոճային ընտրության հարցում ևս հետևում եք Ալենին:  

DJ Diana,- Ես deep house ու tech house երաժշտություն եմ սիրում։ Մեծ հաճույքով մենակ այդ ոճերում կնվագեի, բայց դա այդքան էլ ճանաչված չի մեզ մոտ, դրա համար էլ հիմնականում նվագում եմ ավելի պահանջարկ ունեցող՝ հիթային երաժշտություն։ Ես շատ բան եմ սովորել Ալենից, նա շատ խիստ դասատու է /ծիծաղում է/, մինչև հիմա էլ ամեն անգամ ինձ լսելուց հետո, ինչ որ բան սովորեցնում է, ուղղություն է տալիս, տեղեկացնում է նոր միտումների մասին, կիսվում մասնագիտական գաղտնիքներով:  

ReserVin,- փաստորեն Ձեր մեջ մրցակցություն չկա ☺

DJ Diana,- Իհարկե չկա, մենք համագործակցում ենք, դա ընտանեկան բիզնես է, ☺

բացի այդ Ալենը ինձնից ավելի փորձառու է և միշտ աշխատում է իր մասնագիտական զարգացման վրա, ես դեռ շատ բան ունեմ նրանից սովորելու։

ReserVin,- Ձեր ելույթներից ո՞րն է ամենաշատը տպավորվել ու ամենաշատը որն եք հիշում

DJ Diana,- Շատ տպավորիչ ու էմոցիոնալ էր իմ առաջին ելույթը։ Առաջին անգամ Cosmopolitan shopping night-ին եմ նվագել։ Շատ լարված էի, անընդհատ նայում էի Ալենին, նա հայացքով ցույց էր տալիս, որ ամեն ինչ շատ լավ է և ես ավելի ինքնավստահ էի նվագում: Հետո բոլոր ներկաները նշել են, որ շատ լավ է անցել: Այդ ելույթից հետո սկսեցի արդեն այլ տեղերից առաջարկներ ստանալ:

ReserVin,- Եվ վերջում պատմեք՝ ի՞նչ սպասումներ և ի՞նչ ծրագեր ունեք այս տարի

DJ Diana,- Ինչպես բոլորը, այնպես էլ ես, տարեսկզբին միշտ դրական եմ տրամադրված, տոներին շատ հագեցած գրաֆիկով ու մեծ հաճույքով աշխատել եմ: Տարվա ընթացքում պլանավորում եմ այս ոլորտում ավելի հաստատվել, շարունակել զարգանալ և աճել: Հատկանշական է, որ արդեն ունեմ հետաքրքիր  առաջարկներ Չինաստանից, ժամանակավոր պայմանագրով աշխատելու համար։ Այնտեղ ակումբները շատ մեծ են և բացի նրանից, որ պետք է լավ նվագել իմանաս, փորձ ունենաս և ինքնավստահ լինես, նաև շատ կարևոր է, որ կարողանաս նվագելու հետ զուգահեռ շոու կազմակերպես, այսինքն՝ DJ-ը պետք է նաև շատ լավ հագնված լինի, արտաքնապես սիրուն տեսք ունենա և շոու անի։ Շատ եմ ուզում արտասահմանում ուժերս փորձել, պարբերաբար դիմում եմ DJ-ների համար նախատեսված տարբեր ծրագրերի։ Արտասահմանում աղջիկ DJ-երի պահանջարկը ավելի շատ է, որովհետև իրենք արտաքինին էլ են ուշադրություն դարձնում, իսկ ես նաև մոդել եմ ու դա իմ ուժեղ կողմն է ☺ ՝

ReserVin,- Այս դեպքում ինչու՞ ոչ մոդել, այլ՝ DJ:

DJ Diana,- Մոդելինգով դեռ զբաղվում եմ, համատեղում եմ, բայց հիմա դա ավելի երկրորդական է,՝ժամանակ առ ժամանակ, որ հետաքրքիր առաջարկներ են լինում, ես սիրով համաձայնվում եմ։ Վերջինը Atex-ի կատալոգն էր, որը կազմվեց  իտալացի դիզայներների կողմից իրենց հագուստները Ռուսաստանում ներկայացնելու համար՝ ինձ ընտրել էին որպես այդ զգեստները ներկայացնող մոդել: Ես հեշտությամբ եմ համատեղում, քանի որ երկու գործն էլ սիրում եմ։ Ես հավատում եմ, որ շուտով Հայաստանում այդ ոլորտները ավելի կզարգանան, քանի որ ես իմ օրինակի ու փորձի վրա զգում եմ այդ զարգացումը և առաջընթացը:

ReserVin,- Ի՞նչ է պետք ՀՀ-ում էլեկտրոնային երաժշտության և ակումբային կյանքի զարգացման համար

DJ Diana,- Շատերը դեռ չեն գալիս ակումբներ պարելու, քանի որ ուղղակի դեռ վստահ չեն անվտանգության հարցում: Օրինակ Paparazzi Club-ը անվտանգության մասով շատ ճիշտ է աշխատում, դու չես զգում անվտանգության աշխատակիցների ներկայությունը և միևնույն ժամանակ նրանք լիարժեք ապահովում են ակումբի ներսի անվտանգությունը՝ հսկելով հենց մուտքի մոտից։ Մարդիկ լիարժեք վայելում են որակյալ երաժշտություն առանց անհանգստանալու։ Եթե բոլոր ակումբները նման ձևով աշխատեն, և մարդկանց վստահությունը կմեծանա, և ոլորտը կզարգանա, որովհետև մարդիկ ուզում են գան ուրախանան և լիցքաթափվեն և ոչ թե կողքից խնդիրներ ունենան։ Համոզված եմ շուտով ոլորտում նկատելի առաջընթաց կլինի։ Հիմա նոր սերունդը ավելի շատ է գալիս ակումբներ, քան առաջ։ Վերաբերմունքը փոխվել է, սառույցը ջարդվել է: Առաջ բոլոր միջոցառումներին հիմնականում նույն մարդիկ էին գալիս, հիմա նոր դեմքեր շատ եմ տեսնում, և հենց իրենք են նպաստելու այս ոլորտի զարգացմանը։

ReserVin,- Շնորհակալություն հետաքրքիր հարցազրույցի և մեր Tet a Tet  նախագծին միանալու համար

DJ Diana,- Շնորհակալություն հետաքրքիր նախաձեռնության համար

1486

(*). նշվածները պարտադիր են լրացման

 

Տվյալներ չկան
^ Վեր