Tet-A-Tet Serjo-ի հետ

Tet-A-Tet Serjo-ի հետ

Բոլորի կողմից սիրված և շատ հայտնի Serjo-ն իր կարիերան որպես DJ պրոդյուսեր սկսել է 2005թ-ին: Մինչև օրս թողարկել է 6 ալբոմներ ` «Տժվժիկ» 2006թ, ''Reverse'' 2007թ, “Tomorrow”  2008թ,  2010թ.-ի հունվարին   “The 4th Reich” ալբոմը, 2011թ.-ի դեկտեմբերին ''Insomnia'' ալբոմը և 4 տարի դադարից հետո 2015-ին ''Colors'' ալբոմը: Հանդիսանում է ''HayTok'' Lable-ի հիմնադիրը, որ ստեղծվել է 2009թ-ին: Արդեն գրեթե 12 տարի այս ասպարեզում գործունեություն ծավալելու ընթացքում, նա համագործակցություններ և հիթեր է ստեղծել այնպիսի կատարողների հետ, ինչպիսիք են՝ Միշոն, Հայկոն, Արտո Թունջբոյաջյանը, Սիրուշոն, Էմմին, Արմինկան, Իվետա Մուկուչյանը, A.Chilla.-ն, Aram Mp3-ը և շատ այլ արտիստներ: Մեր պրոյեկտի շրջանակներում կփորձենք բացահայտել և խոսել հիմնականում այն թեմաների մասին, որոնց մասին համեմատաբար ավելի քիչ են խոսել:

Reservin: Լինելով Էլեկտրոնային երաժշտության մշակույթը քարոզող առաջին Dj-ներից մեկը՝ կարիերան սկսելիս ի՞նչ գործոններ են բարդություններ առաջացրել ցանկալի արդյունքին հասնելու ճանապարհին: Արդյոք այդ գործոնները դեռ կա՞ն, թե՞ հիմա արդեն անցյալում են և ներկայիս սկսնակ DJ-ները այլևս այդ խոչնդոտներին չեն հանդիպում:

Serjo: Դե եթե հաշվի առնենք, որ ամեն ինչ սկսվել է մոտ 12 տարի առաջ, այդ ժամանակ գործունեության շառավիղը այդքան մեծ չէր: Երբ մենք որևէ նոր գործ էինք ներկայացնում, դա արվում էր ձայնասկավառակների միջոցով: Գոյություն ունեին լեյբլներ, ստուդիաներ, որոնք կարող էին քո աշխատանքը թողարկվելով, դարձնել այն ավելի լայն հասարակությանը հասանելի: Օրինակ՝ ես իմ առաջին ալբոմը ներկայացնելիս տեսահոլովակով հեռուստատեսությամբ ներկայացրեցի՝ առաջին քայլերը եղան հեռուստատեսությամբ: Իսկ դժավարություն, որոշակի առումով ինձ համար եղել է այն, որ ես բոլորին անծանոթ էի, ու եթե հիմա բավականին շատ DJ-ներ կան, շատ հաճախ են միջոցառումներ կազմակերպում, և գրեթե բոլորը միմյանց գիտեն, այն ժամանակ այդ ոլորտում կար մարդկաց շատ փոքր խումբ: Այդ մարդիկ հիմա էլ կան և գործում են, և երբ դու մտնում ես այդ ասպարեզ, որտեղ քեզ ոչ մեկ չի ճանաչում, բոլորի մոտ հարցեր են առաջանում ո՞վ է այս տղան, նա ոչ մեկի աշակերտը չէ, ընկերը չէ, ոչ մի տեղ չի նվագել և մտել է այս ասպարեզ: Դա, ինքնըստինքյան, դժվարություն է առաջացնում, քանի որ պետք է ինքդ քո տեղը գտնես, գրավես, հաստատվես: Եվ երկրորդ դժվարությունը դա երաժշտության ռեալիզացումն էր, քանի որ չկար այժմ շատ օգտակար և կիրառելի դարձած համացանցը, որի միջոցով հիմա շատ ավելի հեշտ է շատ լայն լսարանին նոր գործ ներկայացնել: Ժամանակի ընթացքում ամեն ինչ ստացվեց և հիմա կա այն, ինչ կա: Ինչ վերաբերվում է ներկայիս սկսնակ DJ-ներին, չեմ կարող ասել, որքանով են իրենք առնչվում այն խոչնդոտներին, որոնց ժամանակին ես եմ առնչվել, բայց կարող եմ ասել, որ կան հաջող որակով երաժշտություն ներկայացնող DJ-ներ և կան այնպիսի տեղեր, որտեղ իրենք կարող են կազմակերպել իրենց միջոցառումները, ներկայացնել իրենց երաժշտությունը և հղկել իրենց աշխատանքը, ինչը շատ ողջունելի և ուրախացնող է:

Reservin: Ունենալով բավական երկար ստեղծագործական ճանապարհ, ինչպե՞ս եք կարողանում ինքներդ Ձեր մեջ պահել ստեղծագործելու, արարելու և չսպառվելու հատկությունը: Ի՞նչն է հիմնականում ոգեշնչման աղբյուր հանդիսանում Serjo-ի համար:

Serjo: Ես անընդհատ երաժշտության մեջ եմ՝ բոլոր ոճերի և ժանրերի, անընդհատ փորձում եմ գտնել նոր հնչողություն, նոր հնչյուններ, փորձարկումներ անել, փորձել ինքս ինձ, ինչ որ չափով նույնիսկ գերազանցել: Կարևորը որ, երբ ինչ որ միտք ծագում է իմ մեջ, ես փորձում եմ անպայման իրականացնել:

Ոգեշնչման հետ կապված միանշանակ հիմա որևէ կոնկրետ բան չեմ կարող ասել, քանի որ տարիներ առաջ ամեն ինչ բոլորովին այլ էր՝ տարիքն էր ուրիշ, ռիթմն էլ, պատկերացումներն էլ  և բնականաբար ոգեշնչման աղբյուրներն էին ուրիշ: Առաջ,  երբ ավելի երիտասարդ էի, ինձ դուր էր գալիս կյանքի բուռն ռիթմը ու ես ոգեշնչվում էի դրանից, հիմա ամեն ինչ այլ է՝  հիմա ավելի շատ մտքի և հոգու թելադրանքով եմ երաժշտություն գրում, ցանկացած պահի, ինչ որ իրադարձության հետ կապված, կարող է ունենամ ինչ որ հոգեվիճակ, որը մուսսա կհանդիսանա երաժշտություն ստեղծելու համար:



Reservin: Վերջին ժամանակներում, ի ուրախություն բոլորիս, մեր քաղաքում իրենց գործունեությունը ծավալող DJ-ները տարբեր միջոցառումներ են կազմակերպում էլեկտրոնային երաժշտությունը առավել ճանաչված դարձնելու համար, և Դուք գրեթե միշտ աջակցում և այդ ամենի մասն եք կազմում: Ինչպես վերջերս The Triangulum vol. 3-ի ժամանակ՝ դեկտեմբերի 4-ին Paparazzi Cafe-ում, որտեղ Ձեր հետ միասին հանդես են եկել  DJ-ներ՝ Guevo-ն, Leo-ն, Alen Hz-ը, Teodi Teo Moradiyan-ը և Shant Ko-ն: Ի՞նչ եք կարծում միայն նմանատիպ միջոցառումները բավակա՞ն են այդ երաժշտության լսարանն ընդլայնելու համար: Ի՞նչ այլ տարբերակներ եք տեսնում Դուք:

Serjo: Դա  պրոցես է, ամեն ժամանակշրջան իր հետ բերում է նոր դեմքեր, նոր արտիստներ, նոր DJ-ներ և նույնն էլ մեր քաղաքում: Ես շատ ուրախ եմ, որ այդ պրոյեկտի կազմակերպիչները պրոյեկտին լուրջ են վերաբերվում ու ամեն ինչ անում են, որ այն լինի որակով և ամեն հաջորդ անգամ ավելի լավ արդյունք են ունենում: Եվ եթե նման բան է արվում մեր քաղաքում, իհարկե, պետք է սատարել և օգնել, որ մեր քաղաքում զարգանա այդ մշակույթը: Նույն այդ միջոցառման ժամանակ ես տեսա նոր դեմքեր, ովքեր եկել էին երաժշտություն լսելու, իսկ դա արդեն շատ լավ է: Վերջին միջոցառումն էլ մեր տաղանդավոր հայրենակից՝ Վիգեն Արմանի մասնակցությամբ էր, ով եկել էր Երևան և հնարավորություն կար լսելու նրա երաժշտությունը: Եվ դա ևս ձեռքբերում է, ինչը, անշուշտ, միայն ողջունելի է:

Ես գտնում եմ, որ էլեկտրոնային երաժշտությունը մեր քաղաքում պետք է առավելապես պրոպագանդվի: Դա կարելի է անել ինչպես տարբեր միջոցառումներով, խնջույքներով, այնպես էլ պետք է լինի մեդիայում՝ հեռուստատեսությամբ, ռադիոյով: Այն պետք է դառնա պոպուլյար ֆորմատ, ինչը պահանջում է համախմբված աշխատանք: Եթե մենք ցանկանում ենք, որ մեր քաղաքում լինի էլեկտրոնային երաժշտության մթնոլորտ, միայն DJ-ների աշխատանքը բավական չէ: Դրան պետք է սատարեն նաև հովանավորները, որոնք կարող են աջակցել, որպեսզի մեր քաղաքում կազմակերպվեն լավ և որակով միջոցառումներ: Ամենակարևորը, որ լինեն այնպիսի հովանավորներ, ովքեր գիտեն այդ ամենի գրագետ իրականացումը: Մենք ունենք այդպիսի ընկերություններ, որոնք իրականացնում են այդ պրոցեսը և դա շատ ողջունելի է: Կարևոր է, որ շատ գրագետ և ճիշտ աշխատեն նաև միջոցառումների կազմակերպիչները, որպեսզի արդարացնեն բոլորի սպասելիքները, թե հանդիսատեսի և թե հովանավորների, որպեսզի համագործակցությունը լինի արդյունավետ և շարունակական:



Reservin: Մենք տեղյակ ենք, որ դուք նվագում եք նաև արտերկրում, կնշե՞ք տարբերությունը արտերկրի ակումբների և ակումբասերների և մեր ակումբների ու ակումբներ հաճախող հասարակության մեջ:

Serjo: Կարծում եմ՝ հիմնական տարբերությունը Էլեկտրոնային երաժշտության կուլտուրայի զարգացվածության մեջ է, ինչպես նաև մենտալիտետի մի փոքր հարց է երևի: Վերջին անգամ այլ հանդիսատեսի առջև ելույթ ունենալու և ամբողջ ընթացքին հետևելու հնարավորություն ունեցել եմ անցած տարի, երբ նվագում էի ամենամյա GemFest 2016-ի ժամանակ: Այնտեղ ինձ հետաքրքիր վիճակագրական տվյալ հայտնեցին, որ այդ միջոցառման շրջանակներում իրենք դիմավորել և ճանապարհել են մոտավորպես 40.000 մարդ և ամբողջ գործընթացը խաղաղ է կատարվել: Այնտեղ մարդիկ եկել էին նպատակային՝ լավ լիցքեր ստանալու, իրենց սիրելի արտիստներին տեսնելու կամ պարզապես նոր որևէ երաժշտի կամ երաժշտական ուղվածությանը ծանոթանալու: Մեզ մոտ այլ է, քանի որ էլեկտրոնային երաժշտություն լսող հասարակությունը այդքան շատ չէ, քանի որ տեղեկացված չէ, իսկ տեղեկացված լինելու համար պետք է, որ մեդիան ներգրավվի այդ ամենի մեջ և ներկայացնի հանրության ավելի լայն զանգվածներին: Եվ շատ կարևոր տարբերությունն այն է, որ արտերկրում այդ պրոցեսներին մասնակցում և սատար է կանգնում պետությունը, ամեն ինչ ընթանում է վերահսկողության տակ և անցնում է այնպես, ինչպես նախատեսվել էր՝ խաղաղ մթնոլորտում :

Reservin: Հպարտությամբ նշենք, որ շատ հաճելի է, երբ մեր երկրի երաժիշտները իրենց ոլորտում հասնում են այնպիսի մակարդակի, որ հնարավորություն են ունենում մեր երկիրը ներկայացնել արտասահմանում, ինչպես եղավ անցած տարի 2016թ.ի օգոստոսի 12-ին, երբ դուք նվագում էիք ամենամյա GemFest 2016-ի ժամանակ  KimonaStage-ում, կպատմե՞ք մի փոքր այդ մասին, ինչպե՞ս ստացվեց, որ Ձեզ հրավիրեցին, հնարավո՞ր է արդյոք մեր երկրում կազմակերպել նման միջոցառումներ: Ի՞նչ է հարկավոր, որ մեզ մոտ ևս լինեն ամենամյա AemFest( Armenian Electronic Music) երաժշտական միջոցառումներ:

Serjo: Երկկողմանի համաձայնության արդյունքում ինձ հրավիրեցին, որ ես էլ այնտեղ նվագեմ, և առաջարկեցին, որ մենք մեզ մոտ էլ ներկայացնենք, որ կա նման միջոցառում և ես ներկա եմ լինելու: Փորձը այնքանով էր լավ, որ ես հանդես եկա բոլորովին այլ լսարանի առաջ՝ շատ ավելի լայն ու բազմազան, չնայած ինձ շատ հաճելի էր այնտեղ ևս տեսնել այն երիտասարդությանը, ով գալիս է ինձ լսելու մեր քաղաքում, հաճելի էր իրենց ներկայությունը: Այնտեղ բոլորովին այլ մթնոլորտ էր: Մի քանի բեմեր կային, և տարբեր արտիստներ տարբեր երաժշտություն էին ներկայացնում, կային նույնիսկ էքսպերիմենտալ ինչ-որ նոր բաներ ներկայացնող արտիստներ, ամեն ինչ շատ ազատ էր՝ չկար որևէ սահմանափակում, և ամեն ինչ շատ բնական էր ընթանում:



Մեզ մոտ նման միջոցառում կազմակերպելու համար հարկավոր է բյուջե և որ ամեն ինչ կազմակերպվի ճիշտ և գրագետ՝ ինչպես այնտեղ էր արված: Առաջնային շատ կարևոր նախապայմաններից էր անվտանգությունը, քանի որ նման մեծ միջոցառումներին հավաքվում են տարբեր ազգության և մշակույթի, տարբեր մտածելակերպ ունեցող մարդիկ, և շատ կարևոր էր, որ ամեն ինչ ընթանա խաղաղ պայմաններում: Ամեն ինչ այդպես էլ կար, այդ հարցում մեծ աջակցություն էր ցուցաբերում պետությունը: Այնտեղ կար մի գյուղ, որն այդ միջոցառման շրջանակներում դարձել էր փառատոնային քաղաք, ինչը նպաստել էր նաև տուրիզմի զարգացմանը: Կարծում եմ, որ հնարավոր է մեզ մոտ ևս կազմակերպել նման փառատոններ, քանի որ մենք էլ ունենք բոլոր նախապայմանները՝ ունենք տարածքներ, որտեղ կարելի է անցկացնել նմանատիպ միջոցառումներ, ունենք արտասահմանում հայտնի հայ DJ-ներ, ովքեր իրոք շատ պրոֆեսիոնալ են, շատ լուրջ նվաճումներ ունեն, ում ճանաչում են, սիրում են, և շատերը կգան այստեղ իրենց ելույթները դիտելու, պարզապես անհրաժեշտ է այդ ամենը համախմբված և գրագետ կազմակերպել և անցկացնել:

Reservin: Կհաստատե՞ք արդյոք, որ նման միջոցառումները կարող են նպաստել մեր երկրում նաև այլ ոլորտների զարգացմանը, ինչպես օրինակ զբոսաշրջությունը: Ու՞մ աջակցությունն է հարկավոր, որ էլեկտրոնային երաժշտության ոլորտը այդ աստիճան զարգանա և պահանջարկ ունենա:

Serjo: Իհարկե կհաստատեմ, որպես օրինակ նշեմ այն, որ մենք ամեն տարի գնում ենք հարևան երկիր՝ Վրաստան տարբեր համերգների և երաժշտական միջոցառումների մասնակցելու, ու հիմա պատկերացնենք հակառակը, որ մենք մեր երկրում ունենանք նման միջոցառումներ, ունենանք հյուրեր՝  հայտնի արտիստներ, ես վստահ եմ, որ նույն Վրաստանից և այլ տեղերից շատերը կգան, որ մասնակցեն այդ միջոցառումներին: Անկասկած, դա կնպաստի տուրիզմի և առևտրի զարգացմանը, քաղաքում այդքան պակասող շարժը կավելանա: Մեր քաղաքում նման միջոցառումները պակասում են, մենք ունենք շատ լավ երիտասարդություն, որը բավականին մեծ թիվ է կազմում, նրանք ունեն լավ ճաշակ և իրենց այս լճացումը այլևս հետաքրքիր չէ, իրենք այլ բան են ակնկալում: Ինձ պարբերաբար հրավիրում են մաստեր կլասերի, և երիտասարդների հետ զրույցների ժամանակ ես տեսնում եմ, որ նրանց մեր այսօրվա հատկապես հեռուստատեսությամբ մատուցված երաժշտությունը հետաքրքիր չէ, ոչ ոք հեռուստացույց չի դիտում: Այս դեպքում շատ կարևոր է, որ մեդիան, հատկապես հեռուստատեսությունը, ուշադրություն դարձնի մեր երիտասարդության երաժշտական ծարավի բավարարմանը:  

Reservin: Խոսենք «Սիմոնյան» նախագծի մասին: Մեզ հայտնի է, որ այդ նախագծի  շրջանակներում ներկայացնում եք ոչ կոմերցիոն ակումբային երաժշտություն: Տեղյակ ենք, որ հենց այդ անունով արտերկրի ստուդիաներում թողարկվել են Ձեր գործերը, ինչն, ի հպարտություն բոլորիս, հնարավորություն է տվել, որ Ձեր երաժշտական աշխատանքները հայտնվեն աշխարհի տարբեր երաժիշտների ստեղծագործությունների կողքին: Ինչո՞ւ որոշեցիք առանձին անունով հանդես գալ, ինչո՞ւ ոչ Ձեր արդեն ճանաչված անունով: Ի՞նչ հետագա պլաններ կան «Սիմոնյան» նախագծի հետ կապված:

Serjo: Երբ Գերմանիայում բնակվող իմ շատ մոտ ընկերներից մեկը առաջարկեց, որ մենք աշխատենք Underground ոճի մեջ և թողարկումներ ունենանք, այն լեյբլները, որոնք գտնվում են արտերկրում նշեցին, որ առհասարակ ուզում են ունենալ զրոյական արտիստ, իսկ Serjo-ն արդեն այդպիսին չի համարվում: Եթե մենք որոնողական համակարգերում փնտրենք Serjo, շատ տարբեր ուղվածությամբ գործեր կգտնենք՝ սկսած հիփ հոփ ոճի պրոդյուսինգներից, այլ կատարողների համար երգեր գրելուց մինչև այլ կատարողների հետ համատեղ կատարումեր և այլն: Հարկավոր էր այդ ամենը թողնել մի կողմ և ունենալ ալտերէգո պրոյեկտ, որը կունենար անուն, որը որոշեցի ազգանունս դնել, որ ինձանից շատ հեռու չլինի: Այդ ոճի Underground երաժշտությունը արդեն այդ անվան տակ արտադրություն տվեցինք և այն արդարացրեց իրեն, չխառնվեց իմ երկու աշխատանքները: Ամեն ինչ ընթացավ այնպես, ինչպես պլանավորում էի: Ստացվեց այն արդյունքը, որ հիմա ինձ Եվրոպայում գիտեն հենց այդ անունով և ոճով, և այդպես ես ունեցել եմ 2 ելույթ, չեմ չարաշահում, բայց հետաքրքրություն կա, արդեն հրավիրում են ելույթ ունենալ հենց այդ ոճում՝ «Սիմոնյան» պրոյեկտով: Դա հաճելի է և ուրախացնում է, որ այդ ոճում էլ իմ աշխատանքները ունեն իրենց լսարանը: «Սիմոնյան» նախագծի հետագա պլանների հետ կապված պլանավորում ենք ալբոմ թողարկել և կա համագործակցության առաջարկ, որի մասին դեռ չեմ խոսի, բայց ինտենսիվ աշխատում ենք այդ ուղղությամբ: Շուտով նորությունների մասին կտեղեկացնենք:



 

Reservin: Ի՞նչ անակնկալներ կարող են ակնկալել Ձեր երաժշտության երկրպագուները այս տարի: Կխոսե՞ք մի փոքր ընթացիկ աշխատանքների և հետագա ծրագրերի մասին:

Serjo: Շուտով լույս կտեսնի մեր «Մի Քանի Հոգի» նախագծի ալբոմը, որի ընթացիկ աշխատանքները վերջացրել ենք՝ ձայնագրությունները, միքսինգը և շատ շուտով այն կներկայացնենք մեր լսարանին:  Քանի որ երկար ժամանակ տեսահոլովակ չեմ ունեցել, վերջին ''Colors'' ալբոմից տեսահոլովակ եմ պատրաստում, շուտով կներկայացնեմ հանդիսատեսին: Մոտակա իրականանալիք նորությունները դրանք են, որ փետրվար ամսին կլինեն: Հետագա պլանների հետ կապված՝  կիսվեմ նաև իմ, որպես երաժշտական պրոդյուսեր, աշխատանքի մասին. այժմ համագործակցում եմ Իվետա Մուկուչյանի և Aram Mp3-ի հետ, աշխատանքները ընթացքի մեջ են և իրենց երկրպագուներին հաճելի անակնկալ է սպասվում, բայց թերևս այդքանը ,մյուս մանրամասները դեռ չեմ բացահայտի:  







Մեր մյուս հետաքրքիր հոդվածները կարող են կարդալ այստեղ;

Ձեր ժամանցը կազմակերպելու համար սեղմեղ այստեղ և ամրագրեք սեղան Երևանի ցանկացած ժամանց վայրում: 


 

1830

(*). նշվածները պարտադիր են լրացման

 

Տվյալներ չկան
^ Վեր