Tet-a-Tet Alen Hertz-ի հետ

Tet-a-Tet Alen Hertz-ի հետ

Հավատարիմ մնալով սպասարկման ոլորտը ուսումնասիրելու մեր սկզբունքին՝ սկսում ենք նոր նախագիծ, որի շրջանակում Ձեր ուշադրությանն ենք ներկայացնելու վերջին ժամանակներում բավականին արդիական ու պոպուլյար դարձած, բայց միևնույն ժամանակ գրեթե չբացահայտված մասնագիտության ամենավառ ներկայացուցիչների՝ DJ-ների, անկեղծ Tet-a-Tet հարցազրույցների շարքը:

Նախագծի նպատակն է մեր ընթերցողներին ցույց տալ, թե որքան խորը և բազմաշերտ է այս առաջին հայացքից պարզապես զբաղմունք թվացող մասնագիտությունը իրականում, ինչպես նաև ծանոթացնել մայրաքաղաքում էլէկտրոնային երաժշտություն ստեղծելու, լսելու և ակումբներում նվագելու մշակույթը ձևավորելու գործում ներդրում ունեցող ամենավառ DJ-ների հետ՝ պատմելով ոչ միայն նրանցից յուրաքանչյուրի անցած երաժշտական ճանապարհի և անհատական ոճի մասին, այլև հենց «առաջին ձեռքից» ներկայացնելով, թե էլեկտրոնային երաժշտության աշխարհում ի՞նչ նոր թրենդեր կան և ի՞նչ քայլեր են ձեռնարկում հայ DJ-ները մեր փոքր քաղաքում այդ միտումների ներդրման համար:

Ներկայացնում ենք այս ոլորտի հաջորդ ամենավառ ներկայացուցչին՝ DJ Alen Hertz-ին:

ReserVin,- Բոլորը Ձեզ ճանաչում են որպես Alen Hertz , ինչո՞ւ հենց այդպես որոշեցիք հանդես գալ

Ալեն,- Իրական անունս Ալեն Մուրադյան է, իսկ  HERTZ-ը ավելացրել եմ, որովհետև այն հաճախականության միավոր է։ Հետագայում բացահայտել եմ, որ HERTZ գերմաներեն սիրտ է նշանակում, բայց իմ ընտրությունը ի սկզբանե կապված է հաճախականության հետ։

ReserVin,- Ե՞րբ եք սկսել հանդես գալ որպես DJ։

Ալեն,- առաջին ելույթս, որպես DJ եղել է 2014 թվականին, հենց այդ տարվա մեջ եմ առաջին անգամ սկսել նվագել ակումբներում։

ReserVin,- Alen Hertz-ը ունի՞ այլ մասնագիտություն

Ալեն,- ես մասնագիտությամբ իրավաբան եմ, բայց այդ ոլորտում չեմ աշխատում, քանի որ նախ զգացել եմ, որ դա իմ ոլորտը չէ և երկրորդ, Հայաստանում երբեմն ավելի ձեռնտու է լինում զբաղվել երաժշտությամբ, քան մի մասնագիտությամբ, որտեղ հաջողություն ունենալու համար միայն գիտելիքը բավարար չէ։

ReserVin,- Բոլոր DJ-ները ունեն իրենց առանձնահատուկ ոճը, ո՞րն է Ձեր ոճը

Ալեն,- Ես գերադասում եմ ավելի շատ tech house ոճը, հենց սկզբից էլ tech house ոճի մեջ եմ նվագել և մինչ օրս էլ փորձում եմ այս ոճը զարգացնել Հայաստանում։ Ցավոք Հայաստանում այսօր  ավելի մեծ է կոմերցիոն երաժշտության պահանջարկը՝ այսինքն այժմյան հիթային երգերը միքս արած։ Ամեն դեպքում ամենափոքր հնարավորության դեպքում, ես փորձում եմ ակումբասեր հանրության մեջ սերմանել tech house ոճը։ Նաև նվագում եմ techno ոճի մեջ, բայց միևնույն է ավելի շատ tech house եմ սիրում։

ReserVin,- Դուք տարվա լավագույն ակումբի՝ Paparazzi Club-ի ռեզիդենտ DJ եք, արդյո՞ք դժվար է Paparazzi Club-ի մեծ կազմի մի մասը լինել։ Ե՞րբ և ինչպե՞ս սկսեցիք աշխատանքը Paparazzi Club-ում

Ալեն,- Ոչ, հակառակը, շատ հեշտ է և հաճելի, Paparazzi Club-ի  հետ համագործակցում եմ հենց բացման օրվանից և թիմը հենց բացման օրվանից ինձ հարազատ է դարձել։ Հաճախ եմ նվագում Paparazzi Club-ում, որովհետև ունի հիանալի համերաշխ անձնակազմ և շատ լավ մթնոլորտ, ինչպես հաճախորդի, այնպես էլ DJ-ի համար։ Հիմնականում հենց այդ պատճառով էլ համագործակցում եմ Paparazzi Club-ի հետ, քանի որ ինձ համար ավելի կարևոր է աշխատել երաժշտության նկատմամբ նմատատիպ մոտեցումներ ունեցող թիմի հետ, քան միայն զուտ կոմերցիոն մոտեցումներից ելնելով։  

ReserVin,- Կարո՞ղ եք հիշել որևէ առանձնահատուկ դեպք, որ տեղի է ունեցել որպես Dj հանդես գալու ընթացքում

Ալեն,- հետաքրքիր և զվարճալի դեպքեր շատ են տեղի ունեցել, սակայն ամենահետաքրքիրները միշտ երաժշտական պատվերներն են լինում։ Հիմնականում ծիծաղելի դեպքերը կապված են լինում կորպորատիվ երեկոների հետ, որովհետև ակումբներում, որպես կանոն, պատվերներ չեմ ընդունում, միայն հազվագյուտ, եթե հյուրերից մեկի ծնունդ է լինում, հնարավոր է հոբելյարի համար «ծնունդդ շնորհավոր» նվագեմ։ Մի անգամ Ամանորյա միջոցառման ժամանակ մի աղջիկ պատվիրեց թուրքական երաժշտություն և համառորեն պնդում էր, որ նվագեմ։ Հետո ոչ միայն ես, այլև՝ ամբողջ ակումբի թիմը փորձում էր նրան բացատրել, որ Հայաստանում, ակումբում և Նոր տարվա կորպորատիվին, հարմար չէ թուրքական արտիստի պոպ երգ նվագել։ Ավելի ճիշտ կլինի ասել NO COMMENT.



ReserVin,- Ի՞նչ հետագա ծրագրեր ունեք, բացահայտեք մի քանի փոքր ու մեծ գաղտնիք

Ալեն,- ունեմ մի քանի համագործակցության առաջարկ արտերկրից, այդ թվում նաև Մոսկվայից։ Կարծում եմ, որ կհամագործակցեմ, սակայն տեղափոխվելու պլաններ չունեմ։ Ունեմ նաև Չինաստան տեղափոխվելու և այնտեղ աշխատելու հետաքրքիր առաջարկներ, քանի որ վերջերս Չինաստանում մեծացել է արտասահմանից ժամանած DJ-ների պահանջարկը։ Եվ ինչպես միշտ այնպես էլ հետագայում շարունակելու եմ իմ համեստ ներդրումը ունենալ Հայաստանում tech house և techno աճի երաժշտության զարգացման գործում։

ReserVin,- շնորհակալություն հետաքրքիր հարցազրույցի համար։

Ալեն,- Ձեզ էլ շնորհակալություն, հուսով եմ կհանդիպենք ակումբում որակյալ երաժշտության ներքո :) 

Մեր մյուս հետաքրքիր հոդվածները կարող եք կարդալ այստեղ։ 

 

1782

(*). նշվածները պարտադիր են լրացման

 

Տվյալներ չկան
^ Վեր