Tet-a-tet with DJ Guevo

Tet-a-tet with DJ Guevo

Հավատարիմ մնալով սպասարկման ոլորտը ուսումնասիրելու մեր սկզբունքին՝ սկսում ենք նոր նախագիծ, որի շրջանակում Ձեր ուշադրությանն ենք ներկայացնելու վերջին ժամանակներում բավականին արդիական ու պոպուլյար դարձած, բայց միևնույն ժամանակ գրեթե չբացահայտված մասնագիտության ամենավառ ներկայացուցիչների՝ DJ-ների անկեղծ հարցազրույցների շարքը:

Նախագծի նպատակն է մեր ընթերցողներին ցույց տալ, թե որքան խորը և բազմաշերտ է այս առաջին հայացքից պարզապես զբաղմունք թվացող մասնագիտությունը իրականում, ինչպես նաև ծանոթացնել մայրաքաղաքում էլէկտրոնային երաժշտություն ստեղծելու, լսելու և ակումբներում նվագելու մշակույթը ձևավորելու գործում ներդրում ունեցող ամենավառ DJ-ների հետ՝ պատմելով ոչ միայն նրանցից յուրաքանչյուրի անցած երաժշտական ճանապարհի և անհատական ոճի մասին, այլև հենց «առաջին ձեռքից» ներկայացնելով, թե էլեկտրոնային երաժշտության աշխարհում ի՞նչ նոր թրենդեր կան և ի՞նչ քայլեր են ձեռնարկում հայ DJ-ները մեր փոքր քաղաքում այդ միտումների ներդրման համար:

Նախագծի բացումը անում ենք՝ ներկայացնելով այլ ոլորտի թեևս ամենավառ ներկայացուցիչներից մեկին՝ Dj Guevo-ին:

ReserVin,- Ձեզ հիմնականում ճանաչում են որպես DJ Guevo, ինչպե՞ս եք ընտրել Ձեր DJ «բեմական» անունը, այն որևէ այլ նշանակություն ունի՞:

Guevo,- Իրական անունս Գևորգ Մարգարյան է: Համալսարանում սովորելու տարիներին, երբ որ միջոցառումների ժամանակ փորձում էի warm up անել ու փաստացի արդեն ինչ որ քայլեր էի անում DJ դառնալու ուղղությամբ. այդ ժամանակ պարզապես որպես  DJ Գևորգ էի հանդես գալիս: Քանի որ համալսարանում էլ իսպաներեն էի սովորում ու իսպաներենը ինձ հարազատ էր դարձել, սկսեցի անունս իսպաներեն գրել՝ Guevorg: Բայց հաշվի չէի առել, որ բոլորը չէ, որ իսպաներեն գիտեն ու գիտեն, որ իսպաներենում երկու բաղաձայնների միջև “E” կարդալու համար “U” տառն է ավելանում, և մարդիկ հիմնականում անունս արտասանում էին UE-ով: Այդպես, ժամանակի ընթացքում, անունս մի քիչ կրճատվելով և սեղմվելով, ստացվեց Guevo և հենց այդպես էլ մնաց:

ReserVin,- Որքա՞ն ժամանակ է, որ հանդես եք գալիս որպես DJ:

Guevo,- Արդեն մոտավորապես 7-8 տարի է, որ պրոֆեսիոնալ նվագում եմ, դրանից առաջ չեմ հաշվում, քանի որ համարում եմ, որ այդ ժամանակվա գործունեությունս ավելի շատ հոբի կամ սովորել է եղել:

ReserVin,- Բոլոր Dj-ները ունեն իրենց առանձնահատուկ ոճը, ո՞րն է Ձեր ոճը:

Guevo,- Հայաստանում մի քիչ բարդ է առանձնացնել և հանդես գալ որևէ առանձին ոճով, քանի որ ակումբային ժամանցը մեզ մոտ, ցավոք, այդքան զարգացած չէ, որ մարդիկ կարողանան ճանաչել քեզ քո առանձին ոճով: Կան ոճեր, որոնք ես սիրում եմ նվագել և հաճույք եմ ստանում այդ ընթացքում, դրանք էլեկտրոնային երաժշտության TechHouse և Techno ոճերն են, սակայն աշխատանքի բերումով հիմնականում ստիպված եմ լինում նաև «կոմերցիոն» երաժշտություն  նվագել: Միակ ոճը, որ չեմ նվագում դա հայկական փոփ երաժշտությունն է: 

ReserVin,- Ունե՞ք այլ մասնագիտություն կամ այլ աշխատանք/զբաղմունք այլ ոլորտում: Մի փոքր կպատմեք այդ մասին:

Guevo,- Այո կրթությունս երաժշտական չէ, ես ավարտել եմ Ռուսաստանի Տուրիզմի և Սերվիսի Պետական Համալսարանը, մասնագիտությամբ տուր մենեջեր եմ, բայց այդ մասնագիտությամբ երբեք չեմ զբաղվել: Հակառակը՝ հենց ուսանողական տարիներից էլ DJ-ությամբ եմ զբաղվել: Ամեն ինչ սկսվեց այն պահից, երբ ես սկսեցի մեր համալսարանի թիմի կազմում մասնակցել ՈւՀԱ-ի մրցույթներին և պատասխանատու էի մեր թիմի ներկայացումների համար երաժշտության ընտրության համար: Այդ տարի մեր  թիմը հասավ մինչև եզրափակիչ փուլ, սակայն եզրափակչում մենք պարտվեցինք Բժշկական Համալսարանի թիմին:  

Սակայն ստացածս կրթությունը ինձ մասամբ օգնում է, որ հաջողությամբ վարեմ իմ սեփական բիզնեսը և ինչ որ չափով էլ կարողանամ հոբիներս ավելի պրոֆեսիոնալ մակարդակի վրա դնել: Ես ունեմ սեփական գործ՝ դա ամռանը արդեն 3 տարի հաջողությամբ գործող բացօթյա Corn Pop Cinema կինոթատրոնն է, որը իրականություն է դարձել իմ՝ երաժշտության հետ կապ չունեցող ընկերներց մեկի՝ Մխիթարյան Տաթևի հետ համագործակցության արդյունքում: Մյուս զբաղմունքս արդեն անմիջական կապ ունի երաժշտության հետ՝ ես աշխատում եմ ռադիոյում Ալեքսանդր Դուբասեսի հետ, մենք հինգշաբթի օրերին ունենք Two Guys Enterprise ռադիոշոուն, որի ժամանակ մենք անդրադառնում ենք ակումբային կյանքի, ակումբային երաժշտության, սպասարկման բնագավառին և այն ամենին,  ինչը վերաբերվում է Night Life ասվածին:
 

ReserVin,- Կա՞ որևէ առանձնահատուկ կամ հետաքրքիր դեպք, որ պատահել է ակումբերում որպես Dj հանդես գալու ընթացքում, որ հիմա կարող ես հիշել և պատմել:

Guevo,- Այս պահին առանձնահատուկ դեպք չեմ կարող հիշել, բայց կա շատ հաճախ հանդիպող դեպք, որին բոլոր DJ-ներն են հանդիպում: Դա այն դեպքն է, երբ այցելուներից մեկը մոտենում է վահանակին և խնդրում որևէ կատարում միացնել, որի ոչ կատարողին է հիշում, ոչ երգի անունը և փորձում են այդ աղմուկի մեջ երգել ինչ որ հատվածներ, որ ես գուշակեմ, որ երգի մասին է խոսքը: Այդպիսի, դեպքեր շատ շատ են պատահում և քաղաքում հատուկենտ ակումբներ կան, որ այդպիսի դեպքեր կամ չեն լինում կամ շատ հազվադեպ են պատահում, օրինակ՝ Paparazzi Club-ում, քանի որ այնտեղ DJ-ը լիովին առանձնացված է հաճախորդներից և կարողանում է ազատ լինել իր ընտրության մեջ:

ReserVin,- Վերջերս մի որոշ ժամանակով բացակայել եք Հայաստանից և The Triangulum Project-ի անդամներ և Ձեր ընկերներ Leo-ի /Լեո Սակեյան/ և Տիկո Խաչատրյանի հետ  մեկնել էիք Եվրոպա: Կպատմե՞ք այդ ճանապարհորդության մասին:

Guevo,- Ճանապարհորդույթան նպատակը եվրոպական տարբեր քաղաքներում ակումբներում համերգների մասնակցությունն էր և իրենց  DJ-ներին լսելը: Մենք այցելել ենք չորս քաղաք և ամեն քաղաքում մնացել 3 օր: Շրջագայության ընթացքում ամենատպավորիչը Բեռլին քաղաքի ակումբներն էին, որտեղ ամենահայտնի Berghain և Watergate ակումբներն ենք այցելել, մի քանի օր այնտեղ clubbing ենք արել: Տպավորություննե՞րը՝ աննկարագրելի և շատ վառ:

ReserVin,- Ի՞նչ է իրենից ներկայացնում The Triangulum նախագիծը:

Guevo,- Եթե բառացի վերցնենք, ապա ինչպես գիտեք,  The Triangulum նշանակում է եռանկյունի և խորհրդանշում է այն 3 մարդկանց, ովքեր կանգնած են այս նախագծի հիմքում և զբաղվում են նախագծի հիմնական կազմակերպչական գործերով. ինձ և DJ Լեոյին, և Տիկոյին Խաչատրյան: Ես և Լեոն DJ ենք, իսկ Տիկոն աշխատում է մանկական խանութների ցանցում, որպես օպերացիոն մենեջեր: Զավեշտալին այն է, որ նրա արտաքինից ոչ ոք երբեք չի կռահի, որ նա աշխատում է մանկական հագուստի ցանցում, բայց շատ սիրում է իր աշխատանքը և հաճույքով է անում: 

Իրականում գաղափարը շատ ավելի մեծ մասշտաբներ է ներառում՝ հայկական ակումբային միջավայրում տարածել TechHouse և Techno ոճերը, ակումբասեր հասարակության ականջին հասցնել բարձրաճաշակ և որակյալ երաժշտություն՝ մոտեցնելով եվրոպական ամենահայտնի ակումնբերի մակարդակին: Այժմ արդեն մեր բոլոր ընկերները և հարազատները ներգրավված են այս նախագծի մեջ, մեր միջոցառումների ընթացքում հանդես են գալիս մեր բոլոր DJ ընկերները. վերջին The Triangulum vol. 3-ի ժամանակ, որը տեղի ունեցավ դեկտեմբերի 4-ին Paparazzi Cafe-ում, բացի ինձանից ու Լեոյից, հանդես են եկել նաև բոլորի կողմից սիրված DJ-ներ՝ Serjo-ն, Alen Hz-ը, Teodi Teo Moradiyan-ը և Shant Ko-ն:


ReserVin,- Մի քանի բառով կնշե՞ք մեր ակումբասերների և արտասահմանի ակումբասերների միջև տարբերությունը:

Guevo,- Հիմնական տարբերությունը գալիս է այն բանից, որ ակումբային մշակույթը արտասահմանում արդեն վաղուց է գործում, իսկ Հայաստանում, ցավոք, այդպիսի ակումբներ դեռ չկան: Մեզ մոտ արտասահմանյան ակումբերին մոտ ոճով է աշխատում միայն Paparazzi Club-ը, որտեղ արդեն մի քանի տարի է միայն DJ-ներ են նվագում և ակումբային ժամանց է մինչև վերջին հաճախորդը: Մյուս ակումբներում ամեն ինչ համատեղում են, որպեսզի հաճախորդների հոսք ունենան, այսինքն վայրը միաժամանակ և ակումբ է, և փաբ է, և նույնիսկ ուտելիքներ են մատուցվում: Արտասահմանում բոլորովին այլ է, այլ են նաև DJ-ները և երաժշտական պահանջարկը: Հայաստանում ավելի պահանջարկ ունի փոփ երաժշտությունը, որը արտասահմանում արդեն իր տեղը զիջում է էլեկտրոնայինին: Այդ հարցում մենք զիջում ենք նույնիսկ մեր հարևան Վրաստանին, որտեղ շատ հաճախակի են կազմակերպվում էլեկտրոնային երաժշտության մեծ միջոցառումներ և հրավիրվում են հանրաճանաչ DJ-ներ այլ երկրներից, իսկ մեզ մոտ նման միջոցառումներ ցավոք լինում են տարվա կտրվածքով մի քանիսը, սակայն փորձում ենք զարգացնել այդ մշակույթը և հուսով եմ կստացվի :

ReserVin,- Վերջում մի փոքր էլ պատմեք Ձեր հետագա ծրագրերի մասին

Guevo,- հետագա բոլոր ծրագրերը կապված են The Triangulum նախագծի հետ, որի հիմնական նպատակը մեր երկրում Էլեկտրոնային երաժշտության զարգացումը խթանելն է: Այդ նպատակով պլանավորում ենք հաջորդ տարվա մեջ մի շարք միջոցառումներ կազմակերպել, որոնց կմասնակցեն Վրաստանից և Ռուսաստանից հրավիրված DJ-ներ: Արդեն ունենք հաստատված կապեր այնտեղի label-ների հետ, որպեսզի իրենց DJ-ները գան հանդես գան մեզ մոտ, իսկ մեր DJ-ները գնան հանդես գալու իրենց մոտ: Դրանից հետո  կփորձենք կապեր հաստատել Եվրոպայի հայտնի DJ-ների հետ, քանի որ հայտնի է, որ ամենահայտնի DJ-ները հենց այնտեղից են: Այդպիսով, կփորձենք նոր շունչ տալ մեր քաղաքի ակումբային կյանքին, և մեր ակումբասեր հասարակությանը ավելի որակյալ ու իրական ակումբային երաժշտություն մատուցելով, իրական ակումբային մշակույթը արմատավորել մեզ մոտ:

Մեր մյուս հետաքրքիր հոդվածները կարդալու համար այցելեք այստեղ:

1466

(*). նշվածները պարտադիր են լրացման

 

Gevork Դեկտեմբեր 20, 2016

Thanks ReserVin )
^ Վեր