Tetatet DJ Donz-ի հետ

Tetatet DJ Donz-ի հետ

Արսեն Բեկեչյանը ավելի հայտնի որպես՝  Dj Donz,  Electronic Tech, Techno House Music-ի  ամենավառ ներկայացուցիչներից է: Սկսել է իր կարիերան որպես DJ 2007 թ.-ից, 2010թ.-ից ստեղծագործում է էլեկտրոնաին երաժշտություն, համագործակցել է մի շարք հայտնի արտասահմանյան երաժիշտների հետ՝ Betoko, Phonique, Oliver Deutschmann, Sergey Sanchez և այլն: Էլեկտրոնային երաժշտությանը նվիրված մի շարք միջոցառումների կազմակերպիչ է, որոնցից են՝ Area 51-ը, Echo "The Sunset"-ը, Contact-ը, The Future generation-ը, Evolution ½-ը, Hi Voltage-ը և այլն։  2015թ.-ից սկսած հանդես է գալիս A.B.T անվամբ: Այս անգամ մեր TetaTet նախագծի շրջանակում հանդիպել ու զրուցել ենք նրա հետ:

Reservin: Ձեր DJ-ի կարիերան սկսել եք մոտ տաս տարի առաջ՝ 2007 թվականին, երբ ակումբային երաժշտությունը այդքան մեծ տարածում չուներ Հայաստանում:  Ի՞նչ դժվարություններ կային սկսնակ DJ-ների համար, և արդյոք հիմա էլ են այդ նույն դժվարությունները առկա:

DJ Donz: Այո, այդ Ժամանակ դժվարությունները շատ էին, սակայն այժմյան իրականության հետ համեմատելը հեշտ չէ: Պետք է նշեմ, որ տարիներ առաջ ակումբային կյանքը Երևանում շատ ավելի թեժ էր, քան հիմա: Չնայած հիմա նկատվում է պռոգռեսս, կան ինչ-որ ակումբներ և միջոցառումներ, որոնք թեև հաճախակի չեն լինում, բայց շատ թեժ են անցնում: Սակայն առաջ ամեն weekend-ին ակումբներում ուղակի մտնելու տեղ չէր լինում: Հիշում եմ AfterShock club-ը, One club-ը, Kami club-ը, iBar-ը և այլն: Այդ ժամանակ էլեկտրոնային երաժշտությունը զարգացում էր ապրում Հայաստանում, այն ժամանակ նույնպես DJ-ները համացանցից կարող էին ձեռք բերել իրենց անհրաժեշտ track-երը: Դժվարություններ կային, ես ինքս ինքնուս լինելով, ուժ ու եռանդ չէի խնայում, որ հասնեմ իմ սիրած աշխատանքի բարձունքներին: Շատ դժվար էր, տարիներ հետո, ծանոթանալով, շփվելով, հասնելով որոշակի գնահատանքի, նկատեցի, որ դժվարությունները սկսեցին պակասել, թերևս հիմա նույնպես դվարություններ կան, բայց դրանք արդեն այն չեն:

Reservin: Դուք Էլեկտրոնային երաժշտությանը նվիրված մի շարք միջոցառումների և թիմերի կազմակերպիչ եք, որոնցից է՝ Area 51-ը, Echo "The Sunset"-ը, Contact-ը, The Future generation-ը, Evolution ½-ը, Hi Voltage-ը : Դժվա՞ր է  կազմակերպել նման միջոցառումներ Հայաստանյան պայմաններում:

DJ Donz: Այո, բավական դժվար Է: Շատերը կարծում են, որ միջոցառում կազմակերպելը դա Facebook-ով իվենթ բացել և ընկերներին հրավիրելն է: Այդ միջոցառումները թիմային բարդ աշխատանքի արդյունքեր են, սակայն, չունենալով ֆինանսական աջակցություն, դժվարությունները շատ են լինում: Շատ անգամ նման միջոցառումների կայացման համար ֆինանսավորում ենք հենց մեր գրպանից որպեսզի դրանք կայանան, քանի որ էլեկտրոնային երաժշտության նմանատիպ մարդաշատ միջոցառումները խիստ անհրաժեշտ են այս ոլորտի՝ որպես մշակութային տեսակ պահպանման և կայացման համար։ Մենք ողջունում ենք մեր թիմին միանալ բոլոր ցանկացողներին, ովքեր ուզում են օգնել և պրոպագանդել լավ ու որակյալ երաժշտությունը մեր քաղաքում։ Իմ կարծիքով լավ կայացած միջոցառումը կախված է լավ և միասնական թիմից, պետք է կարողանանք միասին ջրենք մի մեծ այգի, ոչ թե ամեն մեկը առանձին ջրի իր տնկին։

Reservin: Բոլոր DJ-ները ունեն իրենց առանձնահատուկ ոճը: Դուք հիմնականում նվագում եք Deep, Tech House, Techno ոճով: Ինչո՞ւ ընտրեցիք հենց այս ոճը:

DJ Donz: Ես ինքս շատ տարբեր ոճերի երաժշտություն եմ նախընտրում լսել՝ ռոք, ջազ, սոուլ և այլն: Կարծում եմ ամեն մարդու համար լավ երաժշտությունը ճաշակի հարց է, ամեն ինչի լավը լսում եմ, բայց ներկայացնում, պրոպագանդում, ստեղծում և միքսում եմ էլեկտրոնաին House ոճի երաժշտություն։ Կարծում եմ այս ոճը, որը իմ սիրելի ոճերից է, ավելի ներդաշնակորեն է փոխանցում երաժտությունը ունկնդրին: Իմ մատուցած ոճի երաժշտությունը հոգուցս է գալիս, որի մեջ ես տեսնում եմ թե պարային ռիթմիկա, թե իմաստ, թե հոգեվիճակ։

Reservin: Հաճախ արտասահմանյան DJ-ների հոնորարները լինում են շատ  բարձր: Ինչպիսի՞ն է պատկերը Հայաստանում: Հայաստանում DJ լինելով հնարավո՞ր է «տուն պահել»:

DJ Donz: Իհարկե՝ ոչ: DJ-ները, ցավոք, Երևանում մեծ գումար վաստակում են կոմերցիոն՝ հարսանյաց, կորպորատիվ, ծննդյան միջոցառումների շնորհիվ: Իսկ դրանք թերևս մասնագիտական զարգացման ամենաճիշտ վայրը չեն: Ունենք արտիստներ, ովքեր աշխատում են ուրիշ հաաստատություններում՝ համընթաց զբաղվելով DJ-ինգով, որպեսզի կարողանան ապրելու համար վաստակեն ու միևնույն ժամանակ չկտրվեն արվեստից:

Reservin: Դուք ավելի հայտնի եք որպես DJ Donz, սակայն 2015թ.-ից սկսած հանդես եք գալիս A.B.T անվամբ:  Ինչո՞ւ այսքան տարի հետո որոշեցիք ներկայանալ այլ անունով և ի՞նչ է նշանակում ձեր նոր բեմական անունը:

DJ Donz: Դրանք իմ անվան, ազգանվան ու հայրանունի առաջին տառերն են: Քանի որ Donz անվանմամբ ես ստեղծագործում եմ շատ տարբեր ոճերում, որոշեցի բաժանել ճյուղերի: A.B.T. անվանմամբ ստեղծում և նվագում եմ Deep, Tech, Techno Undergraund ոճի երաժշտություն: Այս անունով ես նաև թողարկում եմ իմ նոր ալբոմները արտասահմանյան լեյբլնեում:

Reservin: Օրինակ, մեր հարևան երկիր Վրաստանում տեղի ունեցած Gem Fest-ը, որը անցկացվում է արդեն երկու անգամ ու մեծ իրադարձություն է դարձել էլեկտրանային երաժշտության աշխարհում, հովանավորվում է պետության կողմից: Ի՞նչ է պետք, որ Հայաստանում էլ էլեկտրոնային երաժշտությունը հասնի այդ աստիճան հայտնի ու տարածված մակարդակի:

DJ Donz: Կասեմ, որ Վրաստանում ակումբային կյանքը շատ արագ զարգացավ: Այնտեղ ելույթ են ունենում աշխարհահռչակ հայտնի արտիստներ, տեղի են ունենում էլեկտրոնային երաժշտության մեծ փառատոններ, որից մեկը Gem Fest-ն է: Այն լայնամաշտաբ էլեկտրոնային երաժշտության փառատոն է, որին կարծում եմ բոլոր պրոֆեսիոնալ DJ-ները կուզեն ոչ միայն ներկա լինել, այլ նաև հանդես գալ: Մենք էլ ունենք շատ պրոֆեսիոնալ ու կայացած արտիստներ, ովքեր իրենց բարձր մասնագիտական որակներով արժանի են ելույթ ունանալ մեծ փառատոնների պարահրապարակներում և բեմերում: Հարկ է նշել, որ Վրաստանում նմանատիպ միջոցառումների կայանալու հարցում մեծ լումա ունի երկրի ղեկավարությունը: Ինչի պակասը կա մեր երկրում, նաև պակաս կա հովանավորման, այլ բրենդների և աջակիցներիցների կողմից: Մենք և մեր թիմը նույնպես համագործակցում ենք GEM Fest-ի հետ, նաև մեր վրացի գործընկերների հետ շփվելիս իմացանք, որ այս տարի փառատոնը շատ ավելի մեծ է լինելու, նրանք նոր մեծ պրոմո թիմ են կազմել, որ տարեց տարի գնալով իրենց փառատոնը ավելի մեծ և մարդաշատ լինի: Օրինակ, այս տարի Gem Fest-ի շրջանակում ելույթ կունենա նաև Solomun-ը, ով շատ հայտնի արտիստ է: Դա իմանալով, հայերը արդեն գնում են տոմսեր, ինչը նպաստում է Վրաստանի տնտեսության ու տուրիզմի ոլորտի զարգացմանը: Վստահ եմ, եթե նա կամ նմանատիպ արտիստներ ելույթ ունենային Հայաստանում, մենք էլ կունենայինք տուրիստների մեծ հոսք:

Կարծում եմ մեդիայի դերը նույնպես մեծ է, էլեկտրոնաին ակումբային երաժշտությունը ավելի պետք է շատ պրոպագանդվի հեռուստատեսությամբ, պետք է ունենանք համացանցում հայկական մեծ էլեկտրոնաին երաժշտության պորտալ, որտեղ մարդիկ, նոր զարգացող սերունդը կծանոթանան և կուսումնասիրեն էլեկտրոնիկայի ոճերը, կլսեն հայ արտիստների ստեղծագործությունները և այլն։

Reservin: Gem Fest 2016-ին ներկա էին էլեկտրոնային երաժշտության համաշխարհային մաշտաբի աստղեր Paul Kalkbrenner-ը, Paul Van Dyk-ը, Boris Brejcha-ն, GusGus-ը: Իսկ Դուք հրավիրու՞մ եք արտասահմանյան արտիստներին Ձեր միջոցառումներին մասնակցելու համար:

Վերջին երկու տարիների ընթացքում, կազմակերպելով էլեկտրոնային երաժշտությանը նվիրված միջոցառումներ, հրավիրում ենք տարբեր աշխարհահռչակ արտիստներ Եվրոպայից, Ռուսաստանից, Վրաստանից և այլն: Սա անկասկած նպաստում է ակումբային կյանքի զարգացմանը և մենք մեր միջոցառումները կազմակերպում ենք ակումբային կյանքը զարգացնելու և մշակույթը պահպանելու համար:

Այդ նպատակով շուտով՝ մարտի 24-ին, Երևանում տեղի կունենա հսկայական իվեթ, ելույթ կունենա Olivier Giacomottօ-ն, Երևանին պետք են նմանատիպ արտիստներ և հսկայական էլեկտրոնային երաժշտության միջոցառումներ, պետք է միշտ ակտիվ որակյալ երաժշտությամբ լցված լինի մեր ակումբային մշակույթը և ժամանցը։

Նշեմ, որ Area 51 և Urban Trips Project-ը, համագործակցելով համատեղ, մարտի 31-ին և ապրիլի 1-ին հրավիրել են Aleceo-ին, ով կնվագի անալոգային սարգավորումներով և ելույթ կունենա live կատարմամբ: Բոլոր մելոմաններին ու էլեկտրոնային երաժշտության սիրահարներին խորհուրդ կտամ բաց չթողնել այս միջոցառումները:

Իսկ ապրիլի 30-ին ECHO-թիմը El Sky Bar-ի Rooftop-ում կկազմակերպի The Sunset Vol.2 միջոցառումը, որը արդեն երկրորդ անգամ պետք է տեղի ունենա, և այս տարի էլ շատ թեժ է անցնելու՝ արևային երեկո, լավագույն DJ-ներ, որակյալ թեժ երաժշտություն: Հաջորդը՝ միջոցառումը տեղի կունենա մայիսի 25-ից 27-ի հատվածում, որի ժամանակ կունենանք հյուր հանրաճանաչ արտիստ Եվրոպայից, ում անունը կուզեմ դեռ մնա անակնկալ։

Reservin: Նշեցիք, որ չունեք երաժշտական կրթություն: Արդյո՞ք դա ձեզ չի խանգարում նոր track-եր ստեղծելիս:

DJ Donz: Ճիշտ է չունեմ երաժշտական պրոֆեսիոնալ կրթություն, սակայն ունեմ որոշ գիտելիքներ սոլֆեջոյից և հարմոնիայից: Կարծում եմ էլեկտրոնային երաժշտություն ստեղծագործելու համար երևակայությունը, լսողությունը և ցանկությունը բավարար է, չնայած որ կրթությունը գիտության մայրն է, խորացված գիտելիքներ ունենալը ևս չէր խանգարի:

Reservin: 2013-ին աշխատել եք «Touch Sound» DJ-ների դպրոցում։ Կպատմե՞ք ավելի մանրամասն ձեր աշխատանքի մասին ու ընդհանրապես այս դպրոցի  մասին:

DJ Donz: «Touch Sound»-ը առաջին DJ-ների մասնագիտացված դպրոցն էր Երևանում, նաև միջոցառումների կազմակերպման և երաժշտության ստեղծման ստուդիա: Հիմնադիրներն եղել են Վարդան Սարգսյանը՝ DJ Play-ը, Կարեն Կայայանը՝ DJ Kret-ը: 2013 թվականից, լինելով թիմի անդամ, ինքս սովորել ու սովորեցրել եմ DJ-ինգ: Թիմով կազմակերպել ենք մի շարք միջոցառումներ «Touch Sound»–ի սաների, ակումբային կյանքի զարգացման և որակյալ  երաժշտությունը քարոզելու ու տարածելու համար: Կարող եմ միանշանակ փաստել, որ «Touch Sound»-ի հետ կապված միայն դրական ու շատ լավ հիշողություններ ունեմ: 

Reservin: Ունե՞ք այլ մասնագիտություն կամ աշխատանք ուրիշ բնագավառում:

DJ Donz: Ես ինքս բժշկական տեխնիկայի մասնագետ եմ՝ սովորել եմ սարքավորումների վերանորոգող և սպասարկողի մասնագիտությունը: Շատ քիչ ժամանակ եմ զբաղվել այդ գործով: Երբ հասկացա, որ DJ-ինգը իմ երազանքի մասնագիտությունն է ու այն դարձել է ինձ համար ապրելակերպ, անմիջապես թողել եմ այդ բնագավառը:

Reservin: Ի՞նչ նոր համագործակցություններ ու հետաքրքիր միջոցառումներ կան ձեր հետագա ծրագրերում:

DJ Donz: Այս տարի պատրաստում եմ թողարկել արտասահմանյան լեյբլներում չորս նոր ալբոմմներ Deep, Tech, Techno House ոճի մեջ, որոնց հիման վրա կլինեն տեսահոլովակներ: Համագործակցելու եմ թե լոկալ, և թե արտասահմանյան երգիչ և երգչուհիների հետ: Կլինի նոր պրոդյուսինգ, նոր որակ, մի շարք նոր միջոցառումներ: Վստահեցնում եմ, որ հաճելի անակնկալները շատ են լինելու:

​Reservin: Շնորհակալություն հետաքրքիր հարցազրույցի համար

DJ Donz: Ես էլ եմ շնորհակալ էլեկտրոնային երաժշտության ոլորտը հետևողականորեն ներկայացնելու և լուսաբանելու համար:

 

Մեր մյուս հետաքրքիր հոդվածները կարդալու համար սեղմեք այստեղ, քաղաքի ցանկացած ժամանցի վայրում սեղան ամրագրելու համար՝ այստեղ:

 

2015

(*). նշվածները պարտադիր են լրացման

 

Տվյալներ չկան
^ Վեր