ՄԱՍ 1
Բոլորս էլ սիրում ենք համեղ սնվել։ Երբեմն էլ պատրաստ ենք ահռելի գումարներ ծախսել, միայն թե հնարավորություն ստանանք համտեսել "գաստրո-հրաշագործների" պատրաստած քմախորժ ուտեստները։ Շեֆ-խոհարարներ․ նրանք իրենց գործի վարպետներն են։ Նրանց մասին ֆիլմեր են նկարահանում, ռեալիթի-շոուներ ստեղծում։ Խոհանոցային այդ վարպետները մարդկանց նոր համային զգացողություններ են պարգևում․ դրա համար գուրմանները պատրաստ են վճարել ամենաթանկ գինը ու երբեք չփոշմանել դրա համար։ Reservin-ը ներկայացնում է մերօրյա բարձրաշխարհիկ, մեծահարուստ և տաղանդավոր շեֆերի թոփ-հնգյակը։
1. Ջեյմի Օլիվեր
Ընտանեկան գաստրո-ավանդույթները շարունակող այս երիտասարդի կարողությունը գնահատվում է ավելի քան 235 մլն դոլար։ Աշխարհի ամենահայտնի ու ամենահարուստ խոհարարներից մեկն ապրում ու ստեղծագործում է Մեծ Բրիտանիայում։ Ջեյմի Օլիվերն այսօր հայտնի է իր բաղադրատոմսերի գրքերով, որոնք սրընթաց սպառվում են աշխարհի տարբեր ծայրերում։ 2002 թ․խոհարարը գրավադրում է իր անշարժ գույքը, նպատակ հետապնդելով հիմնել “Fifteen” բարեգործական կազմակերպությունը, որի միջոցով տարեկան 15 մութ անցյալ ունեցող երիտասարդի հնարավորություն է տրվում որակյալ պրակտիկա անցնել ու աշխատել ռեստորանային բիզնեսում։
Օլիվերի հիմնած բիզնես-կայսրությունն իր մեջ ներառում է ռեստորաններ, խանութներ, սննդի արտադրություն, ամսագրեր, գրքեր, DVD և հեռուստահաղորդումներ։ Հասարակական ակտիվ գործունեության համար խոհարարը պարգևատրվել է Բրիտանական կայսրության շքանշանով։ Ի դեպ, Օլիվերի գաստրո-խորհուրդներին մենք արդեն առիթ ունեցել ենք անդրադառնալ. դրանց կարող եք ծանոթանալ հետևյալ հղումով:
2․ Գորդոն Ռամզի
Ջեյմի Օլիվերի հայրենակից Գորդոն Ռամզին թերևս խոհարար դառնալու մտադրություններ չի ունեցել։ Մանկուց նա երազել է կապել իր կյանքը ֆուտբոլի հետ,սակայն ծնկահոդի մահիկների վնասվածքի պատճառով ստիպված է եղել ընդմիշտ մոռանալ սպորտսմեն դառնալու մասին։ Ապագա շեֆն ուսանել է գաստրոնոմիայի այնպիսի հսկաների մոտ, ինչպիսիք են՝ Մարկ Պիեռ Ուայրը, Գի Սավոյը, Ալբերտ Ռուի Ժոել Ռոբուշոնը և 1998 թվականին հիմնադրել իր սեփական Gordon Ramsay at Royal Hospital Road ռեստորանը, որը տարիների ընթացքում վերածվեց հսկայական կայսրության։ Այսօր գործում են ավելի քան 9 հաստատություններ, որոնցից առնվազն 6 ունի Միշլենի մինիմում մեկ աստղ։ Մեծ Բրիտանիայի սահմաններից դուրս, մի քանի փաբեր ու 12 ռեստորան ունի։ Բրիտանական կայսրության շքանշանակիր է, Միշլենի երեք աստղ ունի որպես անհատ շեֆ-խոհարար։ 14 վարպետաց գրքի հեղինակ է։ Ռեալիթի-հեռուստատեսության աստղ, մի շարք ռեյտինգային շոուների հեղինակ կամ վարող։ Էքսցենտրիկ անձնավորություն է, պերֆեկցիոնիստ։ Հանդիսատեսին գրավում է իր կոպտությամբ, ոչ նորմատիվ լեքսիկոնի կիրառմամբ։ Ուղիղ եթերում կարող է նվաստացնել հաղորդման մասնակցին՝ վերջինիս կերակուրը "գետնին հավասարացնելով"։
3․ Ալեն Դյուկաս
Ֆրանսիացի շեֆ-խոհարարն ապրում ու գործունեություն է ծավալում Մոնակոյում։ Միշլենի երեք աստղ ունի, աշխարհի մի շարք քաղաքներում գործում են նրա հիմնադրած ոճային ռեստորանները։ Շշուկների համաձայն, Դյուկասը չափազանց կասկածամիտ անձնավորություն է։ Յուրաքանչյուր մանրուք արժանանում է նրա ուշադրությանը։ Ոչ մեկին չի վստահում, կայսրությունը ղեկավարում է անձամբ։ Միգուցե հենց դա է նրա հաջողության գրավականը։ Իր գաստրո-առաքելությունը ֆրանսիացին սկսել է պատանեական տարիներին։ Երբ 16 տարեկան էր, աշխատում էր Բորդո քաղաքի հյուրանոցներից մեկի ռեստորանում։ Ճակատագիրը միշտ ժպտացել է նրան․ նրա ճանապարհին միշտ հայտնվել են անհրաժեշտ մարդիկ՝ ժամանակի մեծն շեֆ-խոհարարները։ Քայլ առ քայլ, ասիստենտից նա վերածվել է շեֆի։ Դյուկասի խոհարարական գրքերն իսկական գլուխգործոցներ են, վարպետաց դասերը ճանապարհ են բացում սկսնակների համար։ Դյուկասը ֆրանսիական խոհանոցին բնորոշ հմայքի ու անկրկնելի համի կրողն է։
4․ Թոմաս Քելլեր
Ամերիկացի շեֆ-խոհարարի աստղային ճանապարհը սկսվեց 1996 թվականին։ Այդ օրվանից ի վեր, վերջինիս անունը զբաղեցնում է հեղինակավոր գաստրո-վարպետների ռեյտինգի գագաթնային սանդղակը։ Քելլերը բազմիցս ճանաչավել է ԱՄՆ լավագույն շեֆ։ Կասկած չկա՝ նա լավագույններից լավագույնն է։ Այսօր ժպտերես Քելլերը մի մեծ ռեստորանային կայսրության սեփականատեր է, ունի խաղողի եւ ձիթենու այգիներ։ Հատկանշականն այն է, որ Թոմասն իր աշխատանքային կարիերան սկսել է սովորական աման լվացողից, սակայն կերակուրներ պատրաստելու հանդեպ սերն ու տաղանդը ստիպեցին նրան փոխել իր ամպլուան և ճանապարհ հարթել դեպի խոհարարական բարձունքներ։ Թոմասը համարվում է ֆրանսիական խոհանոցի և հոլանդական սոուսի գիտակ։ Խոհարարի բնավորությունը ճանաչելու համար բավական է դիտել "Ռատատույ" անիմացիոն մուլտֆիլմը, որի ստեղծման աշխատանքներին Քելլերը մասնակցել է որպես խորհրդատու։
5. Ժան-Ժորժ Վոնգերիխտեն
Նյու-Յորքի մի շարք հեղինակավոր ամսագրերի պնդմամբ, աշխարհում չես գտնի նրան, ով կարող է բավարարել մեծ քաղաքի բնակիչների գաստրո-նախասիրությունները, բացի մեկից․ նրա անունն է Ժան-Ժակ Վոնգերիխտեն։
Թերևս ոչ մեկին չի զարմացնի այն փաստը, որ աշխարհի լավագույն խոհարարներից մեկը ծնվել է Ֆրանսիայում։ Մանկուց Ժան-Ժորժը գիտեր կյանքում խոհանոցի կարևորության մասին։ Ամեն օր երեխան ծածուկ հետևում էր, թե ինչպես են ծնողներն օրվա ընթացքում ուտեստներ պատրաստում նրանց ընտանեկան բիզնեսում աշխատող 50 բանվորների համար։ Իսկ երբ, ծնողները շքեղ ընթրիք նվիրեցին պատանուն ծննդյան կապակցությամբ, Վոնգերիխտենը վճռական որոշում կայացրեց՝ կյանքը կապելու է բարձրաշխարհիկ խոհանոցի հետ։ Ռեստորանային բիզնեսում իր ոդիսկանը նա սկսեց 1980 թվականին։ Այսօր Վոնգերիխտենը ռեստորաններ ունի Փարիզում, Շանհայում, Նյու-Յորքում, Լաս-Վեգասում և այլ մեգապոլիսներում։ Հինգ վարպետաց գրքի հեղինակ է։ Կոսմոպոլիտ։ Խոհարարական արվեստում համադրում է Արևելյան և Արևմտյան գաստրո-ավանդույթները։
Անշուշտ, անգնահատելի է այս հանճարների դերը մեր կյանքում։ Չէ որ նրանք ոչ միայն օգնում են ճիշտ ու գեղեցիկ սնվել, այլ նաև՝ իրենց անցած ճանապարհով, ստիպում են հավատալ, որ կյանքում յուրաքանչյուր հաջողության գրավականն ուղիղ համեմատական է քրտնաջան աշխատանքի, հավատի ու համարձակության հետ։
Ի դեպ, շուտով Reservin-ը կներկայացնի հայկական խոհարարներին նվիրված իր սեփական նախագիծը։ Իսկ ո՞վ է Ձեր սիրած հայ խոհարարը։
