Այսօր մարզվողների թիվը տրամագծորեն մեծացել է, ինչքան էլ զարմանալի է, հենց համացանցի շնորհիվ: Ամեն օգտատեր ունի բոլոր անհրաժեշտ պայմանները «մկանաշոթեր» անելու համար՝ սմարթֆոն, հայելի և ամենակարևորը՝ մարմին: Իհարկե շատերը սրան ավելացնում են նաև «շինծու տրանսֆորմատոր» Ֆոտոշոփ անունով, բայց ինչևէ:
Այսպիսով մարզվելը շատերի համար դառնում է պարզապես մոդայի մի մաս: Եվ, անկեղծ ասած, միայն ուրախ կլինեմ, որ թե՛ աղջիկ, թե՛ տղա մարզեն մարմինները գոնե ինստագրամյան և ֆեյսբուքյան «մկանաշոթի» համար: Սակայն այստեղ էլ հարցեր են առաջ գալիս. Ի՞նչ է պետք և ի՞նչ պետք չէ արդյունավետ մարզումների համար:
Առաջինը ձու՞ն էր, թե՞ ստերոիդը
Համացանցը նկարներով ողողելուց առաջ պետք է իմանալ գեղեցիկ մարմին ունենալու ամենաարդյունավետ բանաձևերը: Առաջին հերթին, պետք է հաջողություն ասել քիմիական հավելումներին: Ամենաանհրաժեշտ նյութերը առկա են ձվի, բանջարեղենի, մրգեղենի, կաթնային կերակուրների և մսի մեջ: Առավոտյան ձուն և կեսօրի բանջարեղենային կամ մսային կերակուրը լիովին կապահովեն ձեզ բոլոր այն նյութերով, որոնք անհրաժեշտ են մարմինը մարզելու, զարգացնելու համար: Ոչ մի այլ քիմիական կամ այլ բնույթի հավելումների կարիք չկա:
Պողպատե Առնին դանդաղ էր շարժվում
Մարզվող երիտասարդությանը թվում է, թե մետաղյա ձողերի խրձի մեջ թաղվելն ու օրական երեք ժամ պարապելը ամենալավ տարբերակն է «գեղեցիկ» մարմին ձեռք բերելու համար: Նախ իմ փորձից ասեմ, որ մարզասարքերով մարզվելու դեպքում մկանները քարանում են, կծկվում են և մեկ-երկու ամիս անց նկատվում է շարժունակության նվազում. դառնում ենք դանդաղաշարժ: Եվ այսպիսով մարզասրահներում ժամեր սպանելու փոխարեն կարելի է պարզապես մարզվել տանը կամ գոնե զբաղվել ինչպես ես եմ անվանում «շարժուն» մարզաձևերով՝ գնդակի կամ ջրի հետ կապված սպորտաձևեր, մարմնամարզություն, աթլետիկա և այլն: Ի դեպ, այս դեպքերում ֆիզիկական ուժը մի քանի անգամ գերազանցում է մարզասարքերի «գերիների» մկանային կարողությանը:
«Ամենապարզ երրորդություն»
Հաշվի առնելով վերոնշյալը, կարելի է ստեղծել «ամենապարզ երրորդություն» համադրությունը… Ինչու՞ երրորդություն, որովհետև սնվելու և մարզվելու ենք օրը երեք անգամ: Առավոտյան նախաճաշից առաջ պետք է նախ (բառի բոլոր իմաստներով) արթնանալ: Պարզագույն նախավարժանքը մարզման երեք փուլերից առաջինն է: Նախավարժանքին կարելի է միացնել մի քանի թեթև վարժություններ փոքրիկ «չափաբաժիններով»: Ճաշից հետո հարկավոր է դուրս գալ մոտ 30 րոպե քայլելու… ուշադրությու՛ն… քայլել չի նշանակում քայլել-քայլել ու «գնանք մի տեղ նստենք»: Սա երկրորդ փուլն է: Իսկ երեկոյան, պետք է անցնել բուն մարզանքին՝ ծախսելով օրվա ընթացքում կուտակած էներգիան: Պետք չէ հավատալ այն միֆին, թե մարզումից հետո ուտել չի կարելի: Մրգերը կամ մի բաժակ հայկական մածունը կեզրափակեն «ամենապարզ երրորդությունը»:
Հ.գ. Իհարկե, այս ամենը ապարդյուն կլինի կամքի ուժի բացակայության դեպքում: Հենց դրա պակասի դեպքում են մարդիկ դիմում երկաթներին և երկաթե մարզիչներին:
