Շաուրմայական Երևան. «Թումանյանի շաուրմա»

Շաուրմայական Երևան. «Թումանյանի շաուրմա»

Հեղինակ՝ Նունե Այլանջյան


Նախ մեծ ուրախությամբ ուզում ենք հայտնել, որ «Մաշտոցի շաուրմա»-ն վերանվանվել է «Շաուրմա լենդ»-ի: Արդյո՞ք մեր անդրադարձն այստեղ կապ ուներ թե ոչ, չեմ կարող ասել, բայց մի բան հաստատ է՝ Մեսրոպ Մաշտոցը կարող է հանգիստ շունչ քաշել: Հիմա հերթը «Թումանյանի շաուրմա»-յինն է: Սակայն դժվար այս ցանցը փոխի իր անունը, որովհետև այն դարձել է իսկական բրենդ՝ արժանանալով բազմաթիվ մրցանակների և պատվոգրերի: Սա մեր քաղաքի այն եզակի վայրերից է, որտեղ պահպանվում է ոչ միայն շաուրմայի որակն ու համը, այլև՝ տարածքի անթերի հիգիենիկ վիճակը: Պետք է խոստովանել, որ «Թումանյանի շաուրմա»-ն հեշտ կուլ գնացող «ոսկոր» չէ, ու թերություններ այստեղ գտնելն այդքան էլ հեշտ չէ, բայց, ցավոք, այս կյանքում ոչինչ անթերի չէ:

---------------------------

Պլյուսներ

---------------------------



Գերհզոր օդափոխություն: Շուտով ամառ է, ու օդափոխությունը դառնալու է բազմաթիվ վայրերի թիվ մեկ խնդիրը, սակայն «Թումանյանի շաուրմա»-յին դա չի սպառնում: Այստեղ ավելի շուտ կմրսեք, քան կշոգեք: Առաստաղով մեկ ձգվող օդափոխության համակարգը կարելի է համարել արվեստի գործ, այն ստեղծում է մի տեսակ ամերիկյան մթնոլորտ: Այստեղ սառը օդը գալիս է նույնիսկ բարի սեղանի տակից: Սա այն դեպքն է, երբ մարդիկ փող ունեն ու չեն խնայում այն:

Ժամանակակից ինտերիեր: Հանրությունը պետք է  դադարի այս վայրը «շաուրմայանոց» կոչելուց, որովհետև այն մի տեսակ ավելի վեր է պարզապես «հաց ուտելու տեղ» լինելուց: Ամեն ինչ այնքան ներդաշնակ է ու տրամադրող, որ ուզում ես այստեղ նախաճաշել, ճաշել ու ընթրել:

Հայելիների առկայություն: Պատերի մի մասն այստեղ հայելապատ է, սա սպասարկման ոլորտում երբեմն հատուկ մտածված քայլ կարող է լինել, որովհետև, երբ մարդ հաց ուտելիս իր արտացոլանքն է տեսնում հայելու մեջ, մի տեսակ զգաստանում է ու «հավաքվում»:

Ընտրված միս: Մեր քաղաքում քիչ են այնպիսի շաուրմայանոցները, որտեղ աչքերդ փակ կարող ես վայելել շաուրման, որովհետև չի բացառվում, որ ճարպի մի գունդ պատահաբար կոկորդիդ կանգնի, սակայն «Թումանյան»-ում նման բան չկա: Այստեղ կարող եք հանգիստ, առանց փորփրելու շաուրմայի միջուկն, այն ուտել:

Nonstop հսկողություն: Այստեղ ոչ մեկ ձեր շուրջը չի ավլում, պարզապես դուք զգում եք, որ ձեր մասին հեռվից-հեռու հոգ են տանում: Սեղանն անմիջապես հետո հավաքվում է ու մաքրվում, դուք չեք էլ մտածում նման մանրուքների մասին:

Պաղպաղակն ու ֆրեշը: Եթե այլ շաուրմայանոցում նման հավելումներ լինեին, գուցե նյարդայնացներ, բայց այստեղ սա միայն հաճելի պլյուս է: Ամենահամեղ լցնովի պաղպաղակն ու թարմ մրգերից պատրաստված ֆրեշը կարող են հավասարապես մրցակցել շաուրմայի հետ և կանգնեցնել ձեզ այլընտրանքի առաջ:

---------------------------

Մինուսներ

---------------------------



Բիստրո VS շաուրմայանոց: Բազմաթիվ տեղեկատուներում «Թումանյանի շաուրմա»-ն գրանցված է որպես «բիստրո», սակայն ապարդյուն, որովհետև, եթե անվան մեջ առկա է «շաուրմա» բառը, ապա հանրության համար դու հավերժ կմնաս որպես շաուրմայանոց, եթե նույնիսկ գտնվում ես Թումանյան փողոցի «սրտում» ու մատակարարում թարմ ֆրեշ ու պաղպաղակ:

Լոշիկի ակնհայտ փոքրությունը: Գուցե շատերը դա չնկատեն, որովհետև տարված կլինեն շաուրմայի համով, բայց փորձառու շաուրմայասերների աչքից այդ փաստը չի վրիպի: ՉԷր խանգարի մի քիչ շռայլություն ցուցաբերել այս հարցում:

tshaurma.com: Կայքը վաղուց չի գործում, բայց այն առկա է որոնողական համակարգերում, մարդիկ այցելում են ու ՝ «Site under construction. Please try again later».

Ոչ «հայեցի» լոգոն: Սոված մարդկանց համար, ովքեր եկել են մի կտոր բան ուտելու, հաստատ միևնույնն է, թե ինչպիսին է քո լոգոն ու անվան տառատեսակը, բայց այցելուները տարբեր են: Օրինակ՝ ինձ համար այդպես էլ հանելուկ կմնա, թե ինչո՞ւ են որոշել հայկական շաուրմայի լոգոյում օգտագործել իտալական դրոշի գույները:

2815

(*). նշվածները պարտադիր են լրացման

 

Տվյալներ չկան
^ Վեր