Անբուժելի «գաստրո» վերքեր

Անբուժելի «գաստրո» վերքեր

Շատերի համար գաղտնիք չէ, որ գաստրո բիզնեսն իրականում դժվար գործ է: Յուրաքանչյուր ռեստորատոր, բարի, փաբի տնօրեն առաջին հերթին ճաշակ պետք է ունենա, ապա այդ ճաշակը կարողանա ծառայեցնել իր բիզնեսին: Որակյալ սնունդի դեպքում պետք է, որ գինը «չափը չանցնի», և ոչ էլ որակն անցնի իր «չափերը»: Հաջողության հասնելու համար բացի մարքեթինգային գիտելիքներից անհրաժեշտ են նաև ժպիտ, վստահություն և հաճելի մթնոլորտ:

Բայց ամենակարևորը, կարծես թե, չսայթաքելն է… Պետք է զգուշանալ «անբուժելի վերքերից», որը կարող է թողնել յուրաքանչյուր հաճախորդ՝ (բառի բուն և փոխաբերական իմաստով) դժգոհելով Ձեր կողմից մատուցված կերակուրից և վերաբերմունքից: 

Հենց այս պատճառով Resevin Armenia-ն որոշեց մեկտեղել համաշխարհային գաստրո սկանդալները մեկ հոդվածում և ձեզ ներկայացնել հետաքրքիր փաստեր, որոնց մասին միգուցե դեռ չէիք լսել։ Այսպիսով, Ձեզ ենք ներկայացնում հաստատություններ, որոնք  «չափել են մեկ անգամ, կտրել՝ յոթը…»



Ի՞նչ սպասել հավից

Գրեթե բոլորի կողմից սիրված KFC-ն ստիպված եղավ շատ թանկ վճարել իր «Թվիսթերի» համար: Այս ուտելիքից 2005-ի հոկտեմբերին տասներեք տարեկան աղջկա եղբայրն ու ծնողները վարակվել էին սալմանելոզով, իսկ աղջիկը կորցրել էր խոսելու ունակությունը: Նոր Հարավային Ուելսի Գերագույն Դատարանի որոշմամբ KFC-ն տուժողներին վճարեց $8.300.000։:



Ինչպե՞ս իջնել «վերև»

Հանրահայտ նյույորքյան «Դանիել» (Daniel) ռեստորանը կորցրեց իր միշլենյան չորս աստղերից մեկն ու 50 լավագույն ռեստորանների ցանկում 29-րդ հորիզոնականից տեղափոխվեց 40-րդ: Անկման բացառիկ «հովանավորն» էր The Times-ը: Պարբերականի քննադատ Փիթ Ուելսն իր հոդվածներից մեկում անդրադարձել էր «Դանիել»-ին, գրելով, որ իր բազում այցելություններից հետո բացահայտել է ռեստորանի անձնակազմի անհյուրընակլությունը սովորական հաճախորդների նկատմամբ: Հատուկ ուշադրության էին արժանանում միայն VIP հյուրերը:



Սնունդը հղի կին չի ճանաչում

Թուրքական արագ սննդի ամենահայտնի ցանցերից մեկի մի ամբողջ մասնաճյուղ  փակվեց մի քանի հաճախորդի թունավորումից հետո: Մի հղի կին ստամոքսի ցավեր էր զգացել Marmara Istanbul-ում սնվելուց ժամեր անց, ինչի արդյունքում կինը վաղաժամ ծննդաբերեց: Հետաքննությունից հետո պարզվեց, որ հանրային սնունդ մատուցող հաստատության սանիտարահիգիենիկ վիճակը հեռու է իդեալականից։



Սննդային ռասիզմ

Թվում է, թե սպասարկման ոլորտում հաճախորդների հանդեպ մաշկի գույնի հետ կապված ոտնձգությունները մնացել են Մարթին Լյուրթեր Քինգի ժամանակներում։ Բայց արի ու տես, որ «Դեննի» ազգային ռեստորանների ցանցը ստիպված եղավ վճարել ավելի քան $54.000.000 սևամորթներին չսպասարկելու և հօգուտ սպիտակամորթների խտրականության համար։



Ատամնաբույժն ու համբուրգերը համագործակցում են

Չիկագոյի հյուսիսային արվարձաններում ապրող մի կին դատի է տվել արագ սննդի գիգանտ McDonald’s-ին՝ պնդելով, որ այն ինչ մատուցել են, իր պատվիրածը չէր. կրկնակի «չիզբուրգեր» ոսկորի հետ:

Միլիսենթ Բրաունը պահանջում է McDonald’s-ից $50.000, ինչպես նաև հոգալ դատական գործընթացի ծախսերը: Նա պնդում է, որ երբ կծել է բուրգերը, ատամի տակ ոսկոր է ընկել, և այդ պատճառով նա ստիպված է եղել դիմել ատամնաբույժի՝ վնասված ատամնաշարը բուժելու համար:

Հ.գ. Բայց, իհարկե, ինչպես ասում էր հանճարեղ «Ռատատույ» մուլտֆիլմի հերոս կլորիկ խոհարար Գյուստոն. «Յուրաքանչյուր ոք կարող է կերակուր պատրաստել»: Եվ դա ճիշտ է: Սակայն խնդիրն այստեղ ոչ թե, «ո՞վ է պատրաստում», այլ՝ «ինչպե՞ս»:

1404

(*). նշվածները պարտադիր են լրացման

 

Տվյալներ չկան
^ Վեր