Yerevan Jazz Fest 2016-ը արդեն մոտենում է իր ավարտին

Yerevan Jazz Fest 2016-ը արդեն մոտենում է իր ավարտին

Արդեն մի քանի օր է, ինչ մեր մայրաքաղաքը ապրում է ջազով։ Մեկնարկել է  Ջազի Հայկական Ասոցիացիայի և Mezzo Production ընկերության կողմից կազմակերպվող «Yerevan  Jazz Fest 2016» ամենամյա ջազ փառատոնը, որը այս տարի նվիրվում է ծագումով հայ, ամերիկաբնակ, ամերիկյան ջազ-ինդուստրիայի հիմնադիր, հայտնի «Գրեմմի» մրցանակի դափնեկիր Ջորջ Ավագյանին: 

Yerevan Jazz Fest‬ 2016-ը իրենից ներկայացնում է տարվա ամենաջազային իրադարձությունը Հայստանում և, ինչպես անցած տարի խոստացել էր Ջազի Հայկական Ասոցիացիայի հիմնադիր նախագահ Կամո Մովսիսյանը, փառատոնը այս տարի իր ծավալով ու հնչեղությամբ գերազանցում է նախորդին։ 

Փառատոնի բացումը տեղի է ունեցել հոկտեմբերի 13-ին Կ.Դեմիրճյանի անվան մարզահամերգային համալիրում տեղի ունեցած Dee Dee Bridgewater-ի համերգով, իսկ մինչ այդ հրավիրվել է մամուլի ասուլիս, որտեղ երգչուհին պատասխանել է լրատվամիջոցների կողմից տրված հարցերին և կիսվել իր՝ համերգի և մեր երկիր այցելության հետ կապված սպասելիքներով։ 

Հաջորդ օրը՝ հոկտեմբերի 14-ին, Մոսկվա կինոթատրոնում տեղի է ունեցել "Մայլս Դևիս" ֆիլմի ցուցադրությունը, իսկ երեկոյան բոլոր ցանկացողները կարող էին վայելել բարձորակ ջազ երաժշտություն Շառլ Ազնավուրի հրապարակում կազմակերպված բացօթյա համերգի ժամանակ։

Երեկ՝ հոկտեմբերի 15-ին Արամ Խաչատրյանի անվ․ համերգասրահում տեղի է ունեցել Լևոն Մալխասյան Ջազ Բենդի, Չիկո'ս Նյու Տրիոյի /գեղ.ղեկավար՝ Արմեն Թութունջյան/, Ալինա Ենգիբարյանի (վոկալ), Թավիթջան Եղբայրների և Մորիս Փլեժրի (բաս կիթառ) մասնակցությամբ համերգ։  Երեկոյի սկզբում Լևոն Մալխասյանը մեկ անգամ ևս նշեց, որ այս տարի փառատոնը նվիրվում է ամերիկյան ջազզի կնքահայր համարվող Ջորջ Ավագյանին, ով 1998 թվականին իմ հրավերով եկել էր Հայաստան մասնակցելու ջազզ փառատոնին և հույս հայտնեց, որ նա մյուս տարի մեկ անգամ ևս կայցելի Հայաստան։ 

Պարոն Մալխասյանը հատուկ մրցանակներ հանձնեց մի քանի ջազ երաժիշտների, այդ թվում փառատոնի շրջանակում Հոլանդիայից ժամանած Ալինա Ենգիբարյանին, ով համերգի երկրորդ կեսին Չիկոս տրիոյի հետ կատարեց "Gentleman friend", "Love dance", "Everything I love" երգերը: Ամբողջ երեկոն անցավ ջազի հեքիաթային երանգների ներքո, իսկ պարոն Մալխասյանի բենդն էլ ավելի հետաքրքիր երանգ մատուցեց համերգին, երբ գործիքներին ավելացավ նաև դուդուկը: Երեկոյի ընթացքում քաղաքապետի հատուկ մրցանակ ստացավ նաև ֆրանսահայ ջազզմեն Ստեփան Քոչարյանը, մրցանակը ստանալիս նշեց, որ «Ջազզը սեր է»:

Փառատոնը կեզրափակվի այսօր՝ հոկտեմբերի 16-ին, բրիտանացի հայտնի երգչուհի Joss Stone-ի մենահամերգով՝  Կ.Դեմիրճյանի անվան մարզահամերգային համալիրում։ Joss Stone-ը համարվում է այն եզակի երգչուհիներից, ովքեր լինելով սպիտակամաշկ կատարում են իրական "սև" սոուլ երաժշտություն, նրա երգերը և համերգները անտարբեր չեն թողնի նույնիսկ ամենաքմահաճ երաժշտասերին։ Նա իր համերգների ժամանակ միշտ առանձնանում է ոչ միայն իր բացառիկ երաժշտական տաղանդով, այլև բեմի վրա ներկայանալու ազատությամբ․ նա շատ հաճախ ելույթ է ունենում բոբիկ, քանի որ այդպես իրեն ավելի հարմարավետ է զգում։ Նա միշտ երգել է այն երգերը, որոնք իրեն հարազատ են եղել և ստեղծագործելիս երկայանալիս երբեք չի կախվել ուրիշների կարծիքից, այլ արել է այն, ինչ իրեն դուր է եկել։ Շատ հաճախ նրա տաղանդը համեմատում են այնպիսի աշխարհահռչակ երգչուհիների հետ, ինչպիսիք են Aretha Franklin-ը և Janis Joplin-ը, իսկ դա շատ բարձր գնահատական է երիտասարդ երգչուհու համար։ Առաջին "The Sоul Sessions” ալբոմի թողարկումից անմիջապես հետո, երգչուհին բարձրացավ բրիտանական հիթ շքերթների ամենաբարձր հորիզոնականների վրա, ինչպես նաև գրանցվեց ԱՄՆ լավագույն 40 ալբոմների շարքում։ Նրա հաջորդ “Mind Body & Soul”, “Introducing Joss Stone”, “Color Me Free!”  ալբոմները նույնպես շարունակել են բարձր հորիզոնականներ գրավել և վերջնականապես հաստատել երգչուհու բարձր տեղը շոու բիզնեսի աշխարհում։ Երևանյան համերգի ժամանակ նրա հետ ելույթ կունենա Մեցցո Բենդը, Պիտ Ինակոն (բաս կիթառ), Րիկի Ջորդնը (հարվածային գործիքներ) և Լեոն Քինգը (կիթառ)։ 

Reservin Armenia-ի թիմը բոլորին խորհուրդ է տալիս բաց չթողնել այս հնարավորությունը, պատվիրել տոմս և վայելել աշխարհահռչակ երգչուհու մենահամերգը Երևանում։ Համերգի և փառատոնի փակման ֆոտոռեպորտաժը կներկայացնենք շուտով։ 

Մեր մյուս հետաքրքիր հոդվածները կարդալու համար սեղմեք այստեղ:

 

1605

(*). նշվածները պարտադիր են լրացման

 

Տվյալներ չկան
^ Վեր