Վերջին շրջանում Հայաստանում ակտիվացել են տարբեր տեսակի փառատոնները՝ Երևանի «Wine Days» գինու փառատոնին անմիջապես հաջորդեց Ծաղկաձորի Կոնյակի փառատոնը, իսկ այսօր արդեն բոլորը խոսում են հունիսի 2-ից 4-ի ընթացքում «Գոլդեն Գրեյպ ԱրմԱս»-ի կողմից կազմակերպված «Wine&Jazz» փառատոնի մասին: «Գոլդեն Գրեյպ ԱրմԱս»-ը հիմնել է հայրենադարձ Արմենակ Ասլանյանը 2007թ.-ին և այսօր իր դստրերի հետ միասին նա պահպանում է գինեգործության 80-ամյա ընտանեկան ավանդույթը՝ ԱրմԱսը կոչելով իր պապու՝ ընտանեկան գինեգործության հիմնադիր ավագ Արմենակ Ասլանյանի պատվին: Նրա տեսլականն է իր լուման ներդնել Հայաստանի գինեգործական ժառանգության պահպանման ու վերածնման գործում՝ օրեցօր զարգացնելով ԱրմԱս Իստեյթը խաղողագործության ու էնոլոգիայի այս հինավուրց տարածքում: Այսօր ԱրմԱսը միավորում է խանդավառ ու հագեցած կյանքի բոլոր բաղկացուցիչ մասերը՝ պատմությունը, մշակույթը, տոնախմբությունն ու ձեռքբերումները: Այն տալիս է կատարելագործման բազմապիսի ու բազմաբովանդակ հնարավորություններ: Հանուն ԱրմԱսի մեծ ընտանիքի, հայ համայնքի ու արդի մշակույթի՝ արմասցիներիը պահպանում են արտադրության, պատգամի ու կրթության, բարեգործության ու կատարելագործման ավանդույթներն՝ ի փառս մեր հարուստ մշակութային ժառանգության:
Դա է պատճառը, որ կազմակերպիչները ջանք ու եռանդ չէին խնայել փառատոնը գինու և ջազի իրական տոն դարձնելու համար՝ փառատոնի օրակարգից արդեն երևում էր, որ այս փառատոնը իրավացիորեն կարելի է համարել ամենասպասվածներից մեկը, քանի որ այդ երեք օրերի ընթացքում փառատոնի հյուրերը վայելել են ոչ միայն մեր հայրենական ջազի ամենավառ ներկայացուցիչների ելույթները, այլև համտեսել ArmAs գինիները հենց «ԱրմԱսի Թագավորությունում»: Միջոցառումների ընթացքում ելույթ են ունեցել Արտյոմ Մանուկյանը, Գողթ Բենդը, Վահագն Հայրապետյան Տրիոն, New Trio-ն Աննա Կոստանյանի հետ, Time Report էթնո-ջազ-քվինթետ-ը և հայկական ջազի վետերաններ՝ Մարտին Վարդազարյանը, Երվանդ Երզնկյանը, Արմեն "Chico" Թութունջյանը, Արթուր Իսպիրյանը և Լևոն Մալխասյանը:
Եվ այսպես ամռան բացումը գինու և ջազի սիրահարները արել են հրաշք փառատոնով՝ երեք անմոռանալի օր, չորս միջոցառում հայկական ջազի, ԱրմԱս գինիների և համեղ ուտեստների միջավայրում: Տոմսերի արժեքի մեջ ներառված էր նաև երկողմանի տեղափոխումը Երևանից «Գոլդեն Գրեյպ ԱրմԱս» և գինու հյուրասիրություն: Հատուկ միջոցառման համար կազմվել է նաև համեղագույն մենյու օրը ավելի տպավորիչ և հագեցած դարձնելու համար: Հյուրերը հնարավորություն են ունեցել շրջայցեր անել գինու գործարան, որտեղ «ԱրմԱս» գինեգործական ընկերության գործադիր տնօրեն Վիկտորիա Ասլանյանը սիրով ներկայացրել է գինեգործության պատմությունը և հայկական գինու մշակույթը:
Հարկ է նշել, որ ԱրմԱս գինիները ունեն 30-ից ավել միջազգային հեղինակավոր գինու փառատոնների մրցանակներ, որոնցից վերջինները Գերմանիայի Նոյշտադտ քաղաքում 2017թ. փետրվարին տեղի ունեցած «Mundus Vini 2017» հեղինակավոր միջազգային մրցույթին իրենց անվանակարգերում ոսկե մեդալ ստացած «Կարմրահյութ ռեզերվ» կարմիր անապակ և արծաթե մեդալ ստացած «Ոսկեհատ ռեզերվ» սպիտակ անապակ գինիներն են:
Փառատոնից հետո բոլոր ներկաները միաձայն պնդում էին, որ այն վստահորեն դառնալու է հայաստանյան մշակութային կյանքի վառ օրերից մեկը և շարունակական նպաստում է ունենալու ջազ երաժշտության և զբոսաշրջության զարգացման գործում: Այս մասին էր վկայում նաև մեծ թվով օտարերկյա հյուրերի ներկայությունը փառատոնին:
.jpg)
