Tet a Tet նախագծի հերթական հանդիպումը Հայկ Հարությունյանի և Վահե Ախպերջանյանի հետ է: Հայկը մեր երաժշտասեր հանրությանը հայտնի է «ՀԱՅՔ» խմբից, նա հանդիսանում է «Քամի փչի», «Իմ յարը սարին ա» և մի շարք այլ երգերի հեղինակը, իսկ հիմա էլ, լինելով հայտնի Apricota խմբի անդամներից մեկը, նաև հանդես է գալիս որպես DJ՝ ներկայանալով Haik Solar բեմական անունով: Վահեն առաջին անգամ իր բեմական Arni Rock անունով հանդես է եկել 2005թ.-ին Hay Fm-ում DJ Vakcina-ի Club Time հաղորդման շրջանակներում: Հայկն ու Վահեն միասին հանդես են գալիս 2011թ.-ից որպես Haik Solar & Arni Rock նախագիծ:
Հենց այդ տարվա մեջ էլ նրանց՝ Նարինե Դովլաթյանի հետ համատեղ Beautiful Sunday երգը ըստ Radio Van-ի մրցանակաբաշխության ճանաչվել է տարվա լավագույն փոփ երգ: Համագործակցել են նաև Սոնե Սիլվերի, Արփի Շահնուբարյանի, Մանե Սարգսյանի, Ջիվան Խաչատրյանի, Ծովինար Մելքումյանի և Իլոնայի հետ: Նրանց Tango with the wind-ը, թողարկվել է հայտնի George V Records Label-ով, որը թողարկում է հայտնի Buddha Bar-ի հավաքածուները, և հնչել է Միլանում` Ջիորջիո Արմանիի նորաձևության ցուցադրության ժամանակ, բացի այդ` Dancing in the Rain երգը՝ Առնո Բաբաջանյանի հայտնի հնչյուններով, թողարկվել է բրիտանական ամենահայտնի deep house record label-ներից մեկում՝ Seamless Recordings-ում, ինչը վկայում է այն մասին, որ մեր Dj-ների ստեղծագործությունները արտասահմանում ևս ակտուալ են:
ReserVin,- ինչպե՞ս եք ծանոթացել և ինչպե՞ս ծնվեց համատեղ հանդես գալու միտքը:
Հայկ,- Իրականում այսպես եղավ, Վահեի հետ մենք ծանոթացանք մաֆիա խաղալուց, ընթացքում ընկերացանք, հետո միասին մի երգ գրեցինք, այդ շրջանում Apricota խմբի մյուս անդամ Հայկի հետ միասին գրասենյակ էինք վարձակալում և Վահեն մեզ հաճախ հյուր էր գալիս, այդպես ստացվեց, որ որոշեցինք միասին մի երգ գրել, արդեն չեմ հիշում, որ երգն էր, այն չենք թողարկել, բայց լավ ստացվեց և որոշեցինք համագործակցել: Վահեն արդեն Dj էր, ես էլ նրա հետ այդ ուղղությամբ էի աշխատում , կեսօրին մինչ երեկո միասին էինք աշխատում, հետո երեկոյան ես նաև Apricota խմբում էի, այդպես տարիների ընթացքում աշխատելով ձևավորվեց մեր պրոեկտը Haik Solar & Arni Rock:
ReserVin,- Վերջին ժամանակներում Apricota խումբը, որ ժամանակին լավագույն հիթերի՝ «Այբուբեն», «Բարև Երջանկություն» և շատ ուրիշ ստեղծագործությունների համահեղինակն էր, այդքան էլ ակտիվ չէ, ինչո՞ւմն է պատճառը
Հայկ,- Ներկայումս ավելի շատ աշխատում ենք հեռուստատեսության ոլորտում՝ ֆիլմերի soundtrack-երի վրա՝ օրինակ «Ալա Բալա Նիցա» ֆիլմի soundtrack-ը Արտո Թունջբոյաջյանի հետ համատեղ, «Ազիզյաններ» սիթքոմի երաժշտությունը՝ Հայկ Պետրոսյանի կատարմամբ, գովազդների համար ենք երաժշտություն գրում:
ReserVin,- Իսկ ո՞րն է Haik Solar & Arni Rock նախագծի ոճը
Haik Solar & Arni Rock,- Քանի որ մեր իրականության մեջ այսօր ավելի շատ պահանջարկ ունի կոմերցիոն երաժշտությունը, մենք էլ, կախված միջոցառման բնույթից ու մասնակիցներից, նվագում ենք տարբեր ոճի երաժշտություն, այդ թվում նաև կոմերցիոն երաժշտություն՝ փակ միջոցառումներին, իսկ ստեղծագործում ենք հիմնականում Deep House, House և Lounge ոճերի մեջ: Եթե ավելի կարճ ասենք՝ Easy Listening երաժշտություն ենք ստեղծում՝ ականջին հաճելի և հեշտ ընկալելի: Իսկ առհասարակ մենք ունենք աշխատելու հետևյալ սկզբունքը՝ միշտ փնտրում ենք հետաքրքիր ձայն ունեցող կատարողներ, ում ձայնը կհամապատասխանի, համահունչ կլինի մեր ստեղծագործությանը ու մեր երաժշտությանը: Այնուհետև հանդես ենք գալիս տվյալ կատարողի հետ featuring և կազմում հետաքրքիր զուգերգեր:
ReserVin,- Արդյո՞ք երաժշտական կրթություն ունենալը կարևոր է Ձեր ոլորտում հաջողություն ունենալու համար:
Հայկ: Երաժշտական կրթություն ունենալը երաժշտություն գրերիս հաստատ իր դրական չափաբաժինը ունի, սակայն չեմ կարծում, թե դա հաջողություն ունենալու հիմնական գործոններից է: Ես ունեմ երաժշտական կրթություն՝ մոտ 10 տարի սովորել եմ՝ երաժշտական դպրոց եմ հաճախել, հետո Կոնսերվատորիան եմ ավարտել, նվագել եմ ֆլեյտա, բայց ներկայիս աշխատանքներում այդ գործիքը չեմ օգտագործում:
Վահե: Դե, ես էլ ընդամենը մեկ տարի դաշնամուրի եմ հաճախել, զուգահեռ երգել եմ երգչախմբում և երգի խմբակում, բայց երկու դեպքում էլ չեմ շարունակել, իսկ որպես DJ ինձ սովորեցրել է իմ ընկերը, ով այն ժամանակ հանդես էր գալիս DJ Davis մականունով, բայց հիմա այլևս DJ-ությամբ չի զբաղվում, այնուհետև ոլորտը իմ սեփական ուսումնասիրությունների ու փորձարկումների շնորհիվ եմ յուրացրել, իմ դեպքում հաջողությունը երաժշտական կրթության հետ կապ չունի:
ReserVin,- Դուք ունեք շատ հաջողված համագործակցության օրինակներ ինչպես մեր, այնպես էլ արտասահմանյան երաժիշտների հետ: Ունե՞ք արդյոք նոր համագործակցության առաջարկներ այլ խմբերի կամ անհատ կատարողների հետ:
Haik Solar & Arni Rock,- Վերջին ամենավառ համագործակցության օրինակը դա մեր ելույթն է Սիրուշոյի «Արմատ» ձայնասկավառակի շնորհանդեսի ժամանակ, որտեղ մենք հանդես ենք եկել որպես warm up Dj-ներ և ներկայացրել ենք հատուկ այդ միջոցառման համար նրա բոլոր հին ու հայտնի երգերի էքսկլուզիվ house ոճում remix տարբերակները մոտավորապես մեկ ու կես ժամանոց set-ով:
Ներկայումս ունենք շատ կիսատ նախագծեր, որոնք պլանավորում ենք վերջացնել տարվա ընթացքում, օրինակ՝ Մանե Սարգսյանի, Ջիվան Խաչատրյանի հետ համատեղ գործեր ունենք, որ պետք է թողարկենք, remix ստեղծելու առաջարկ ունենք ԱՄՆ-ից և էլի մի շարք այլ ընթացիկ աշխատանքներ կապված տարբեր հետաքրքիր միջոցառումների հետ, որոնց մասին դեռ չէինք ցանկանա պատմել:
ReserVin,- Կա՞ որևէ առանձնահատուկ դեպք, որ կարող եք հիշել, որ պատահել է համատեղ աշխատանքի ընթացքում:
Վահե,- Մեր բոլոր միջոցառումների ժամանակ գրեթե միշտ, որևէ հետաքրքիր բան է պատահում: Մի քանի տարի առաջ, երբ մենք նվագում էինք Հայաստանի Հանրապետությա Անկախությանը նվիրված միջոցառմանը Ազատության հրապարակում, մեզ սպիտակ թղթի վրա գրված հաղորդագրություն էին ուղարկել՝ «Ախպերս, մի հատ լեզգինկա դիր էլի»: Դե նման դեպքեր շատ շատ են լինում, բայց սա հատուկ տպավորվել է:
Հայկ,- Մի դեպք էլ ես պատմեմ, բայց Վահեի հետ նվագելուց չէր, Apricota խմբի ելույթներից մեկի ժամանակ է եղել: Կրկին շատ մեծ միջոցառում էր և այնտեղ կային նաև մեծ տարիքի մարդիկ, մի տղամարդ մոտավորապես 65-70 տարեկան շատ հարբած, չէր հավանել մեր երաժշտությունը, երկար ժամանակ դիմացել էր ու վերջում բռուցքով եկավ, որ հարվածի ինձ, որ էլ չնվագեմ: Ես չէի նկատել որ, մոտենում է, եթե այդ պահին ինձ Apricota-ի Հայկը չհրեր, որ հարվածից խուսափեմ, այս պատմությունը արդեն այլ տեսանկյունից հիշվող կլիներ: Բարեբախտաբար, հետո ամեն ինչ բարեհաջող ավարտվեց, բայց երբեմն ոչ այդքան զավեշալի դեպքեր էլ են լինում:
ReserVin,- Մեր Tet a Tet նախագծի շրջանակներում բոլոր DJ-ները նշում են, որ գոյություն ունի մեծ տարբերություն մեր ակումբների և ակումբասեր հասարակության և արտասահմանյան ակումբների և ակումբասերների մեջ: Դուք ի՞նչ կարծիք ունեք դրա վերաբերյալ: Որո՞նք են այն գործոնները, որ խանգարում են ՀՀ-ում DJ մասնագիտության ու էլէկտրոնային երաժշտության զարգացմանը ըստ Ձեզ:
Հայկ,- Այո, կա տարբերություն և այդ տարբերությունը իրականում շատ մեծ է: Նախ և առաջ, կարելի է ասել, որ մենք որպես այդպիսին Club չունենք, դա գալիս է հիմնականում նաև հասարակությունից, պահանջարկից: Մենք չունենք լսարան, որը կհաճախի ակումբներ հենց էլեկտրոնային երաժշտության համար, այնպիսի լսարան, որ մենք տեսնում ենք այլ երկրներում, ինչու չէ հենց նույն հարևան Վրաստանում:
Կուզեմ մի շատ կարևոր բան նշել այս առումով՝ կարծում եմ, դրա պատճառը հենց այն է, որ մենք շատ կոմպլեքսավորված ենք: Շատ դժվար է այսօր Հայաստանում հասարակությանը ոտքի հանել, որ պարեն էլեկտրոնային երաժշտության տակ: Արտասահմանում, հիմնականում Եվրոպական ակումբներում, կան կոնկրետ ուղղվածությամբ ակումբներ, որտեղ հնչում է կոնկրետ ոճի երաժշտություն և մարդիկ գիտեն, որ ոճի երաժշտության համար ուր գնան: Նրանք գնում են և վայելում են, պարում են անկախ իրենցից, իսկ մեզ մոտ այդպես չէ, մեզ մոտ հասարակությանը պետք է առաջարկես իրենց ծանոթ երաժշտություն, որի բառերը գիտեն ու կարող են արձագանքել ու պարել: Իսկ դա խոչնդոտում է DJ-ների և իրենց երաժշտության զանգացմանը, քանի որ չեն կարողանում նոր բան առաջարկել՝ իմանալով որ շատ մեծ հավանականություն կա, որ երկար չեն լսի կամ նույն ոգևորվածությամբ չեն արձագանքի:
Վահե,- Մեզ մոտ շատ հաճախ DJ-ների առջև դրվում է խնդիր՝ գոհացնել լսարանի ակնկալիքները: Այո, ժամանակ առ ժամանակ մենք առաջարկում ենք նաև մեր սեփական երաժշտությունը, բայց դա շատ փոքր չափաբաժիններով է լինում: Իսկ արտասահմանում DJ-ները իրենք են թելադրում նոր տենդենցները, նոր երաժշտություն են առաջարկում և մարդիկ հենց այդ նորի համար են գնում իրենց լսելու, այդպես էլ զարգանում է էլեկտրոնային երաժշտության մշակույթը` անընդհատ նորի պահանջարկը զգալով, DJ-ները մտնում են մրցակցության մեջ, անընդհատ աշխատում են, ստեղծագործում են, որ տարբերվող նոր բան առաջարկեն: Մեզ մոտ ցավոք այդ միտումները դեռ չկան:
Հայկ,- Բացի նրանից, որ հասարակության շրջանում հետաքրքություն չկա, պահանջարկ չկա, բայց իրականում խնդիրը ավելի գլոբալ է՝ հասարակությանը պետք է ծանոթացնել էլէկտրոնային երաժշտության հետ: Օրինակ, նույն մեդիայի միջոցով, որ ավելի ակտիվ լինեն այդ հարցում, ի՞նչ հաճախականությամբ եք հանդիպում DJ-ների կամ էլեկտրոնային երաժշտության մասին հոդվածների:
Վահե,- Օրինակ, նույն հարևան Վրաստանում Մշակույթի նախարարությունը ամեն կերպ նպաստում է էլեկտրոնային երաժշտության միջոցառումների կազմակերպմանը՝ արտասահմանից հայտի DJ-ներին և այլ կոմերցիոն երաժիշտներին հրավիրելով: Չէ, որ վերջիվերջո դա անուղղակիորեն զարգացնում է նույն զբոսաշրջության ոլորտը: Հիշեք, թե վերջին տարիների ընթացքում հենց Հայաստանից քանի հազար մարդ է գնացել Վրաստան հայտնի արտիստների համերգների համար: Պարզապես մեզ մոտ բավականաչափ ուշադրություն չեն դարձնում այդ իրար հետ այդքան սերտ կապ ունեցող երևույթներին: Հուսով ենք ժամանակի ընթացքում մեր ձայնը տեղ կհասնի և մեզ մոտ էլ կսկսեն ավելի շատ ուշադրություն դարձնել էլեկտրոնային երաժշտության ոլորտին:
.jpg)
.jpg)
